شيرەك فينالعا شىقتى

قازاقستاننىڭ ءبىرىنشى, الەمنىڭ ءتورتىنشى راكەتكاسى ەلەنا رىباكينا ءبىرىنشى كەزەڭدە رۋمىن تەننيسشىسى ەلەنا رۋزەنىڭ قارىمىن بايقاپ, ايقىن باسىمدىقپەن جەڭدى. ال ەكىن­شى اينالىمدا نەمىس تەننيسشىسى لاۋرا زيگەمۋندتى 2 ساعات 14 مينۋتتا ىعىستىردى. ءۇشىنشى كەزەڭدە ەلەنا دات قىزى كارولين ۆوزنياتسكيگە قارسى ويناپ, ەكى سەتتە جەڭىسكە جەتتى. بۇعان دەيىن الەمنىڭ ءبىرىنشى راكەتكاسى اتانعان كارولين دە قايراتتى تەننيسشى. 8/1 فينالدىق تارتىستا اسا كوپ كۇشىن سارقي قويعان جوق. رەسەيلىك تەننيسشى اننا كالينسكايا جاراقاتىن جەلەۋ ەتىپ ەكىنشى سەتتە جارىستان باس تارتتى. شيرەك فينالدا وتانداسىمىز ۋكراينا تەننيسشىسى ەلينا سۆيتولينانىڭ كۇشىن بايقاپ كورەدى.

تاعى ءبىر وتانداسىمىز يۋليا پۋ­تينتسەۆا جارىس جولىندا سەنسا­تسيا­لىق جەڭىس تىركەدى. العاشقى اينالىمدا گەرمانيالىق انجەليكا كەربەردى, ەكىن­شى كەزەڭدە چەح كاتەرينا سينياكوۆانى ءۇش سەتتە ىعىستىردى. ءۇشىنشى كەزەڭدە الەمنىڭ ءبىرىنشى راكەتكاسى پولياك يگا شۆەنتەككە قارسى كورتقا شىعىپ, ايبىنىنان دا, ايبارىنان دا ىققان جوق, كەرىسىنشە, ەكى سەتتە باسىم ءتۇستى. بىراق 8/1 فينالدىق تارتىستا لاتۆيالىق ەلەنا وستاپەنكوعا ەسە جىبەرىپ, لوندونداعى «ۇلكەن دۋلىعا» دوداسىن اياقتادى. دەگەنمەن دە الەمدىك رەيتينگتە 35-ساتىدا تۇرعان پۋتينتسەۆانىڭ شۆەنتەكتى ەڭسەرۋى – وراسان جەتىستىك.

ەلەنا رىباكينا ەكى جىل بۇرىن وسى «ۋيمبلدون» تۋرنيرىندە توپ جاردى, بىلتىر شيرەك فينالدا تۋنيس تەننيسشىسى ونس جابەرگە جول بەرىپ, جارىستى اياقتاعان ەدى. پاريج جازعى وليمپياداسىنىڭ قارساڭىنداعى ءدۇ­بىرلى دودا قىزدارىمىزدىڭ قاۋقارىن تانىتپاق.