«ەرەكشە مۇمكىندىكتەر ورتالىعىندا» استانا قالاسىنىڭ اكىمدىگى «دەنەشىنىقتىرۋ جانە سپورت باسقارماسىنىڭ» قولداۋىمەن «شوۋداۋن» سوقىرلار ۇستەل تەننيس فەدەراتسياسى» رەسپۋبليكالىق قوعامدىق بىرلەستىگى تارتىستى تۋرنير وتكىزدى. فەدەراتسياعا قاراستى استانا قالالىق فيليالىندا 40-قا جۋىق ۇمىتكەر دوداعا ءتۇسىپ, باعىن سىنادى.
كورۋ قابىلەتى مۇلدە سەمگەن, ءتۋابىتتى كوزىنىڭ سىرقاتى بار جاندار ءۇشىن «شوۋداۋن» زاعيپتار ۇستەل تەننيس ورتالىعىندا وتكەن تارتىس سپورت جارمەڭكەسى ىسپەتتى. مۇندا كەلۋشىلەر تەك ۇستەل تەننيسىمەن عانا شۇعىلدانىپ قويماي, سۋرەت تە سالادى, باسقا دا سپورت تۇرلەرىن مەڭگەرىپ, سالاۋاتتى ءومىر سالتىن قالىپتاستىرادى. «شوۋداۋن» زاعيپتار ۇستەل تەننيسى فەدەراتسياسىنىڭ پرەزيدەنتى ءجۇزباي سەرىك وسى سپورت ءتۇرىنىڭ كەڭ قانات جايىپ, قاتىسۋعا ىقىلاستى ازاماتتاردىڭ شوعىرى قالىڭداپ جاتقانىن ايتتى.
«الەمنىڭ 40-تان اسا ەلىندە شوۋداۋن زاعيپتار ۇستەل تەننيسى قارقىندى دامىپ, ءبىر ىزگە تۇسكەن. 2022 جىلى فەدەراتسيامىز قۇرىلسا, بۇگىندە 16 وبلىستا فيليالدارى جۇمىس ىستەيدى. ەلوردادا تۇراتىن زاعيپ تەننيسشىلەر اراسىندا تۋرنير جوعارى دەڭگەيدە ءوتتى. قاتىسۋشىلاردىڭ بىلىكتىلىگى ارتىپ كەلە جاتقانى قۋانتادى», دەدى ج.سەرىك.
فەدەراتسيا پرەزيدەنتى سايىستى ۇيىمداستىرۋداعى ماقسات, كوز جانارىنان ايىرىلعان جانداردىڭ قوعامنان تىسقارى قالماي ەلدىڭ وركەندەۋىنە, سالاماتتى عۇمىر كەشۋدىڭ ۇلگىسىن كورسەتۋگە وزىندىك ۇلەسىن قوسا الاتىنىن كورسەتۋ ەكەنىن العا تارتتى.
«كوزىم كورمەي قالدى دەپ ادام ءوزىن ۇيىققا يتەرىپ, ۋايىمعا سالىنا بەرۋگە بولمايدى. قولدىڭ شاپشاڭ قيمىلى ارقىلى جانە ەستۋ قابىلەتىنىڭ ناتيجەسىندە ۇستەل تەننيسىن ويناي الاسىز. فەدەراتسيا اتقارىپ كەلە جاتقان جۇمىسقا اقپاراتتىق قولداۋ قاشاندا كەرەك. قانشاما ۇيدە وتىرعان جاندار تەننيس ۇيىرمەسىنە جازىلسا, ءبىر ۋاقىت سەرگيدى, سپورتپەن شۇعىلدانادى, قان اينالىمى جاقسارادى. ءوزىنىڭ جىگەرى جانىپ, قايراتىن ارتتىرا تۇسەدى, ەرتەڭگە دەگەن سەنىمدىلىگى جوعارىلايدى. كورۋ قابىلەتىنەن ايىرىلعان جاندار دا قوعامنىڭ كەتىگىن بۇتىندەۋگە قۇقىلى, سپورتپەن شۇعىلدانۋىنا مۇمكىندىك بار», دەدى ج.سەرىك.
«شوۋداۋن» زاعيپتاردىڭ ۇستەل تەننيسىندە قاتىسۋشىلار كوزىن پەردەمەن تاڭىپ وينايتىندىقتان دا وزىندىك قيىندىعى بار. جارىس جەڭىمپازدارى مەن جۇلدەگەرلەرىنە دەمەۋشىلەر تاراپىنان باعالى سىيلىقتار تارتۋ ەتىلدى. ءتۋرنيردى ۇيىمداستىرۋشىلار ەلىمىزدە كەنجە دامىعان سپورت تۇرىنە قولداۋ نىعايىپ, دەمەۋشىلىك تانىتامىن دەگەن اتىمتاي جومارت ازاماتتاردىڭ قاتارى ارتسا دەگەن تىلەگىن ءبىلدىردى. سەبەبى شوۋداۋن ۇستەل تەننيسىنىڭ قۇرال-جابدىعى قىمبات. ءار وبلىستاعى فيليالدىڭ جۇمىسىن جانداندىرۋعا قاراجات قولبايلاۋ بولىپ وتىر ەكەن.
