سۋرەتتى تۇسىرگەن - جانگەلدى ابدىعالىم
گاز تاراتۋ جەلىلەرى 4 166 جەكە تۇرعىن ۇيگە جالعاندى. وسى جىلدىڭ 28 مامىرىنا جەكە تۇلعالار ءۇشىن كوگىلدىر وتىنعا قوسىلۋعا 3 046 تەحنيكالىق شارت بەرىلىپ, 2 459 ءۇي قاجەتتى جابدىقپەن قامتىلدى. 5 جىل مەرزىمگە پايىزسىز نەسيە راسىمدەۋ ارقىلى جاڭعىرتۋ ارقىلى تاعى 260 ۇيگە گاز كىرىپ ۇلگەرگەن. جۇمىستى ارمەن قاراي جالعاستىرۋ ءۇشىن اكىمدىك جاڭعىرتۋ ورتالىعىنا قوسىمشا تاعى 300 مەكەنجاي ءتىزىمىن بەردى.
– گازدى اركىم ءوز قالتاسىنان قاراجات شىعارا سالىپ, قوسا المايتىنى انىق. سوندىقتان تۇرعىندارعا پايىزسىز, ءبولىپ تولەۋ وتە ءتيىمدى. ۇيىنە گاز تارتقىسى كەلەتىندەر بىزگە حابارلاسادى. مەردىگەر گازعا قوسىلۋ اقىسىن ەسەپتەيدى. ءبىز ونى اتاۋلى مەرزىمگە پايىزسىز نەگىزدە ءبولىپ, مەردىگەرگە قاراجاتىن تولەيمىز. ال قوسىلعان ءۇي يەسى مەجەلەنگەن ۋاقىت ارالىعىندا بەرەشەگىن بىرتىندەپ وتەيدى. بىلتىر بۇل باعدارلاما قاناتقاقتى قالىپتا ىسكە قوسىلىپ, اجەپتەۋىر تيىمدىلىگىن كورسەتكەن ەدى. ناتيجەسى بار. 300-گە تارتا ءۇي كوگىلدىر وتىنعا قوسىلدى. بيىل 70 ءۇي گازبەن قامتىلدى. ەندىگى جوسپار بويىنشا 420 ءۇي مەجەلەندى. گازعا قوسىلۋدىڭ ورتاشا باعامى 800 مىڭ تەڭگەدەن باستالادى, – دەيدى وبلىستىق تۇرعىن ءۇي قورىن جاڭعىرتۋ ورتالىعى ديرەكتورىنىڭ ورىنباسارى الىبەك ادەنوۆ.
كيرزاۆود اۋماعى, تاۋگۇل جانە كۇنگەي شاعىن اۋداندارى ماڭىنداعى 4, 5, 6 ىسكە قوسۋ كەشەندەرىنە جاۋاپتى تالدىقورعاندىق «مبك قۇرىلىس» جاۋاپكەرشىلىگى شەكتەۋلى سەرىكتەستىگى مەردىگەر بولىپ تانىلسا, تەحنيكالىق قاداعالاۋ «گراندتاۋەرسەرۆيس» ۇيىمىنا جۇكتەلگەن. بەسىنشى ىسكە قوسۋ كەشەنىندە مەردىگەر ەسكى اۋەجاي اۋدانىندا شتۋرمانسكايا, سامال كوشەلەرىندە گازبەن جابدىقتاۋدىڭ ورامىشىلىك جەلىسى تارتىلىپ, ابونەنتكە جالعاۋدىڭ 512 تورابى ورناتىلدى. 29 تەحنيكا, 100-گە تارتا سالا مامانى جۇمىس ىستەپ ءجۇر. ەندى 2026 جىلى ءاليحان بوكەيحان اۋدانىن گازداندىرۋدى جوبالاۋ جۇمىستارى باستالادى.
رەيدوۆايا كوشەسىنىڭ تۇرعىنى ابىكەن كۋشكەنوۆ جىلدا 7-8 توننا كومىر جاعىپ كەلگەن. ەندى كۇنى-ءتۇنى پەشكە وتىن جارىپ, كومىر سالىپ جۇرمەيمىن دەيدى.
– 2011 جىلدان بەرى وسىندا تۇرامىن. وتباسىمىز ۇلكەن. كوشەمىزگە گاز تارتۋ جۇمىسى جەدەل جۇزەگە اسىپ جاتىر دەپ اشىق ايتار ەدىم. جۇمىسكەرلەر ىڭ-شىڭسىز شارۋاسىن ىستەپ جاتىر. پەش جاعىپ ءجۇرىپ, كەيدە بارار جەرىمىزدەن قالىپ قويىپ جاتاتىن ەدىك. ەندى ۇمىت بولدى. باسى باستالعان ەكەن, اياعى ويداعىداي ءتامامدالسا ەكەن. كومىر جىل سايىن قىمباتتاماسا, ارزاندامايدى. تونناسى – 22 مىڭ تەڭگە. ورتالىقتاندىرىلعان گازدى كوپتەن بەرى تاعاتسىزدانا كۇتكەن ەدىك, – دەيدى ابىكەن دوستاي ۇلى.
«QAZAQGAZ AIMAQ» اق كومپانياسى گاز تاراتۋ جەلىلەرىنە تەحنيكالىق قىزمەت كورسەتۋگە جانە جوندەۋگە جاۋاپتى. تۇراقتى تەكسەرىپ, ونى ۋاقتىلى جوندەپ وتىرسا, وندا ول گازبەن جابدىقتاۋدىڭ قاۋىپسىزدىگىن ساقتاۋعا كەپىل.
– گازعا قاۋىپسىز ءارى كەپىلدى نەگىزدە قوسىلۋ ايتقانعا وڭاي بولعانىمەن, ءىس جۇزىندە ساقتىقتى تالاپ ەتەدى. ءار تۇرعىن ءبىزدىڭ تاراپتان تەحنيكالىق شارت الادى. كەز كەلگەن قاراپايىم ابونەنت تەحنيكالىق قۇجاتتى تەگىن يەمدەنەدى. ارىزىن جازعان ادام ءۇيىنىڭ تەحنيكالىق كۋالىگىن, جەرىنىڭ اكتىسى مەن جەكە كۋالىگىن كورسەتەدى. مۇنان سوڭ قۇرىلىس جۇمىسى جالعاسادى. ناتيجەسىندە ماماندارىمىز جابدىقتىڭ قاۋىپسىزدىگىن تەكسەرىپ, گاز تاراتادى. تاريفكە كەلەتىن بولساق, الدىمەن شىعىن ەسەپتەلەدى. ارينە, كوپتەگەن كۇردەلى ۇيلەر بارلىعىن دا ەسكەرەمىز, – دەيدى «QAZAQGAZ AIMAQ» اق وڭىرلىك وندىرىستىك فيليالى ديرەكتورىنىڭ ورىنباسارى اماندىق تاڭىربەرگەنوۆ.
قاراعاندى قالاسىندا 7 018 تۇرعىن كوگىلدىر وتىنعا قوسىلۋ مۇمكىندىگىنە يە. جالپى العاندا گازداندىرۋ جۇمىستارى وتكەن جىلمەن سالىستىرعاندا الدەقايدا وسكەن.
– 2022 جىلعى ساراپتاماعا كوز جۇگىرتسەك, 500 ءۇي گازعا قوسىلعان. 2023 جىلى بۇل كورسەتكىش 1 500 ۇيگە جەتتى. بيىل قاڭتار ايىنان بەرى ەسەپتەگەندە 500 ۇيگە كوگىلدىر وتىن جەتكەن. جىل سوڭىنا دەيىن بۇل كورسەتكىش ءالى دە وسەدى. ايتا كەتەتىن جاعداي, كەز كەلگەن تۇرعىن ۇيگە گاز تارتۋى ءۇشىن تەحنيقالىق شارت الۋى مىندەتتى. ال ول قۇجاتتى جەڭىلدەتۋ ماقساتىندا ءبىزدىڭ فيليال ءۇش باعىتتا جۇمىس ىستەيدى. ياعني كەز كەلگەن تۇرعىن ۇيىندە وتىرىپ, eGov پورتالى ارقىلى نەمەسە فيليال سايتىنا كىرىپ ءوتىنىش قالدىرا الادى. ءتىپتى بولماسا, كەڭسەگە كەلىپ, مامانداردىڭ كومەگىنە جۇگىنۋگە بولادى, – دەدى فيليال ديرەكتورىنىڭ ورىنباسارى اماندىق تاڭىربەرگەنوۆ.
گازداندىرۋدىڭ بىرقاتار ارتىقشىلىعى بار. بىرىنشىدەن, ەكولوگيالىق جاعداي ايتارلىقتاي جاقسارادى. كومىرمەن جىلىتۋدان تابيعي گازعا اۋىسۋ اتموسفەراعا زياندى زاتتىڭ شىعارىندىسىن ەداۋىر ازايتادى. ەكىنشىدەن, گازداندىرۋ جاڭا جۇمىس ورىندارىن قۇرۋ جانە ينۆەستيتسيا تارتۋ ارقىلى ايماقتىڭ ەكونوميكالىق دامۋىنا ەداۋىر ىقپال ەتەدى. ۇشىنشىدەن, تۇرعىندار ءۇشىن ءتيىمدى.
قاراعاندى وبلىسى
