فوتو: rail-news.kz
كاسىپكەر ەرلان اتامقۇلوۆ 2002-2007 جىلدار ارالىعىندا «قازاقستان تەمىر جولى» اق پرەزيدەنتى قىزمەتىن اتقاردى. 2005-2006 جىلدارى كومپانيانىڭ ۆيتسە-پرەزيدەنتى بولىپ قايرات ساتىبالدى بەكىتىلگەن.
كومپانيانىڭ بۇرىنعى باسشىسى ەرلان اتامقۇلوۆ قايرات ساتىبالدى ورىنباسارى بولعان تۇستا «قازاقستان تەمىر جولى» جۇمىسىنا كەلتىرگەن كەدەرگىلەرىن باياندادى.
«جۇمىس ءجۇردى, بىراق ودان كەدەرگى كوپ بولدى. 2006-2007 جىلدارى كوپ جۇمىس ىستەي المادىق, ۋاقىت قايرات ساتىبالدىنىڭ ارەكەتىمەن كۇرەسۋگە كەتتى. 2006 جىلى تامىز ايىندا ەكس-پرەزيدەنتكە كىرىپ قايراتتىڭ نە ىستەپ جاتقانىن, ءىس وسىلاي جالعاسا بەرسە تەمىرجولدى جاعدايى قالاي بولاتىنى ەسەپتەلگەن قاعاز بەن جۇمىستان كەتۋ تۋرالى ءوتىنىشتى الىپ باردىم. بۇرىنعى پرەزيدەنت ىنىسىنە «سەن ەندى تەمىرجولدا ىستەمەيسىڭ, كولىك ءمينيسترىنىڭ ورىنباسارى بولاسىڭ» دەگەندە, قايرات ەشقايدا بارمايتىنىن ايتىپ, اشۋلاندى», دەدى ەرلان اتامقۇلوۆ.
«قتج» كومپانياسى بۇرىنعى توراعاسىنىڭ ايتۋىنشا, قايرات ساتىبالدى ورىنباسارلىق جۇمىسقا كەلە سالا, قارجى تالاپ ەتە باستاعان.
«300 ميلليون بەرسەڭ, مەن جۇمىستان قازىر-اق كەتەم دەپ تە ايتتى. مەن بىرگە جۇمىس ىستەيىك دەپ, ونىمەن دۇرىس قارىم-قاتىناستا بولۋعا تىرىستىم. جۇمىس ىستەسىپ كەتەمىز, ول ماعان كومەك بولادى دەپ ويلادىم. كەرىسىنشە, ول ءارتۇرلى جوبالاردى سۇراپ, بارىنە ارالاسىپ كەتتى.», دەيدى ەرلان اتامقۇلوۆ.
بۇرىنعى باسشى «قتج» جۇمىسىنداعى وزگە دە ماسەلەلەردى ايتىپ بەردى.
