مامان داعدارىستىڭ باستى 5 سەبەبىن ايتىپ بەردى

استانا. 20 قاڭتار. ورتالىق كوممۋنيكاتسيالار قىزمەتىندە «عالامدىق سىناقتار كەزەڭى: جاڭا سىن-قاتەرلەر» تاقىرىبىندا وتكەن دوڭگەلەك ۇستەلدە قازاقستان ستراتەگيالىق زەرتتەۋلەر ينستيتۋتى ديرەكتورىنىڭ ءبىرىنشى ورىنباسارى ءلاززات مۇزاپاروۆا الەمدىك ەكونوميكالىق داعدارىستىڭ بەس نەگىزگى سەبەبىن كورسەتىپ بەردى. بۇل تۋرالى egemen.kz ءتىلشىسى حابارلادى. «بيىل باستالعالى تۇرعان الەمدىك ەكونوميكالىق قيىندىق 2007-2009 جىلدارداعى جاھاندىق قارجىلىق-ەكونوميكالىق داعدارىستىڭ جالعاسى بولىپ تابىلادى. ويتكەنى, جاھاندىق جۇيەنىڭ ءتۇرلى كەمشىلىكتەرى كەسىرىنەن تۋىنداعان 2007-2009 جىلدارداعى داعدارىستىڭ ماسەلەلەرى بۇگىندە دە شەشىلمەگەن. وسى ورىندا نەگىزگى بەس پروبلەماعا توقتالعىم كەلەدى. بىرىنشىدەن, الەمدىك نارىقتاردى ورتالىقتاندىرىپ, رەتتەۋ مۇمكىندىگىنىڭ جوقتىعى, ەكىنشىدەن, الەمدىك ەكونوميكانىڭ ناقتى سەكتورىمەن سالىستىرعاندا قارجىلىق سالانىڭ وزىق دامۋى. بۇنىڭ سالدارىنان اقشا وندىرىسكە ەمەس, الەمدىك نارىقتارداعى سپەكۋلياتسياعا تۇسەدى. ۇشىنشىدەن, شيكىزاتقا باعا قالىپتاسۋىنىڭ دەفورماتسياسى ماسەلەسى ىقپال ەتتى», – دەدى ساراپشى. سپيكەر بۇلارمەن بىرگە, شيكىزات باعالارى الەمدىك قارجى نارىقتارىنداعى اقشا كولەمىنە كوبىرەك تاۋەلدى بولا باستاعانىن دا نازارعا الدى. «ءتورتىنشى كەمشىلىك – قازىرگى قولدانىستا قارجىلىق جۇيەنىڭ جۇمىسى. بۇل ينۆەستيتسيالىق تالاپتاردىڭ بۇرمالانعان جۇيەسى, ياعني ول الەمدىك رەيتينگتىك اگەنتتىكتەردىڭ وبەكتيۆسىز رەيتينگتەرىنە نەگىزدەلگەن. سونداي-اق, بەسىنشى كەمشىلىك – بۇل دامىعان ەلدەردىڭ شارۋاشىلىق سۋبەكتىلەرى مەن ءۇي شارۋاشىلىقتارىنىڭ شامادان ارتىق نەسيەلەندىرىلۋى جانە شەكتەن تىس قارىزدارعا قىزمەت كورسەتۋدىڭ كۇردەلەنە ءتۇسۋى», – دەدى ول. نۇرباي ەلمۇراتوۆ. دەرەك: egemen.kz. سۋرەت: «قازاقپارات».