قازاق ۋنيۆەرسيتەتىنىڭ الەمدىك مەرەيى

ءال-فارابي اتىنداعى قازۇۋ الەم ۋنيۆەرسيتەتتەرى كونسورتسيۋمىنا (World University Consortium) مۇشە بولدى. ءال-فارابي اتىنداعى قازاق ۇلتتىق ۋنيۆەرسيتەتى الەم ۋنيۆەرسيتەتتەرى كونسورتسيۋمىنىڭ (WUC) تولىق­قاندى مۇشەسىنە اينالدى. ەلىمىزدىڭ ءبىلىم بەرۋ سالاسىنىڭ مويىندالعان كوشباسشىسى ءوزىنىڭ جوعارى بەدەلى مەن حالىقارالىق تالاپتارعا ساي دارەجەسىن تاعى ءبىر دالەلدەدى. الەم ۋنيۆەرسيتەتتەرى كونسورتسيۋمى عالامنىڭ جەتەكشى جوو-لارى مەن عىلىم مەن ءبىلىم بەرۋ سالاسىنداعى حالىقارالىق ۇيىمداردى بىرىكتىرەدى. ونىڭ مىندەتى ادامزاتتىڭ ماڭىزدى ماسەلەلەرىن شەشۋدەگى ۋنيۆەرسيتەتتەردىڭ ءرولىن ارتتىرۋ, قولجەتىمدى جانە ساپالى ءبىلىمدى جان-جاقتى قولداۋ, ءبىلىم بەرۋ جۇيەلەرىن جەتىلدىرۋ بولىپ تابىلادى. اسىرەسە, ستۋدەنتتەر الەۋەتىن ارتتىرۋعا, ولاردىڭ تەوريادان العان بىلىمدەرىن ءىس جۇزىندە قولدانۋىنا ەرەكشە كوڭىل بولىنەدى. ايتا كەتەرلىگى, ءار مەملەكەتتەن تەك ءبىر عانا ۋنيۆەرسيتەت وسى كونسورتسيۋمعا مۇشە بولا الادى. ءال-فارابي اتىنداعى قازۇۋ – جاھاندىق حالىق­ارا­لىق ءبىلىم بەرۋ قاۋىمداستىعىنا مۇشە بولۋ ءمار­تە­بەسىنە يە بولعان ورتالىق ازياداعى العاشقى جانە جال­عىز ۋنيۆەرسيتەت. سوڭعى جىلدارى جوو جەتەكشى رەيتينگتەرىندە قارقىنمەن العا جىلجۋدا, حالىقارالىق ىنتىماقتاستىقتى كەڭەيتە وتىرىپ, الەمدىك دەڭگەيدەگى فورۋمدار مەن كونفەرەنتسيالار وتكىزۋدە. WUC مۇشەسى بولا وتىرىپ قازۇۋ ەندى الەمنىڭ اتاقتى جوو-لارىنىڭ عانا ەمەس, بۇكىلالەمدىك ونەر جانە عىلىم اكا­­دەمياسى, حالىقارالىق جاسىل كرەست, حالىقارالىق ۋني­­ۆەرسيتەت پرەزيدەنتتەرىنىڭ قاۋىم­داستىعى, مادەني ديپ­لوماتيا ينستيتۋتى, الەك­ساندريا كىتاپحاناسى جانە باس­قا دا بەدەلدى ۇيىم­داردىڭ ارىپتەسى بولىپ تابىلادى. بۇل الەمدە قازاق­ستاننىڭ جوعارى ءبىلىم بەرۋ جۇيەسىنىڭ يميد­جى مەن باسەكەگە قابىلەتتىلىگىن كوتەرۋگە ءسوزسىز ىقپال ەتەدى. قورعانبەك امانجول, «ەگەمەن قازاقستان». الماتى.