فوتو: ءماجىلىس
سارىارقا شاعىن اۋدانىنداعى جاڭا مەكتەپ «AMANAT» پارتياسىنىڭ سايلاۋالدى باعدارلاماسىن جۇزەگە اسىرۋ اياسىندا سالىنىپ جاتىر.
ء«بىزدىڭ اۋداندا كوپبالالى وتباسىلار سانى باسىم, ال 17-ءشى مەكتەپتە وقۋشىلار سىنىپتاردا قىسىلىپ وتىرۋعا ءماجبۇر. مەنىڭ ەكى بالام بار, بىراق ۇلكەنىم ءبىرىنشى سىنىپقا تەك كەلەسى جىلى بارادى. سوندىقتان ءبىز جاڭا مەكتەپتى اسىعا كۇتەمىز», دەيدى جەرگىلىكتى تۇرعىن سامال ساپارباەۆا.
اينا ءمىسىرالىموۆا ەلىمىزدەگى دەموگرافيالىق ءوسىم قارقىنى ءبىلىم بەرۋ جۇيەسىنە كۇش سالاتىنىن ەسكەرىپ, بۇل رەتتە مەكتەپتەردەگى ورىن تاپشىلىعى ەڭ وزەكتى ماسەلەلەردىڭ ءبىرى ەكەنىن ايتتى.
«كوكشەتاۋ قالاسىنداعى حالىق سانى ميگراتسيا ەسەبىنەن دە, تۋ كورسەتكىشىنىڭ ارتۋىنان دا ءوسىپ جاتقانى قۋانتادى. بيلىكتىڭ مىندەتى – قولايلى ءومىر ءسۇرۋ جاعدايىن جاساۋ, بۇل اسىرەسە بالالارعا قاتىستى. سوندىقتان ءبىزدىڭ سايلاۋالدى باعدارلامامىز مەكتەپتەر مەن بالاباقشالار سالۋدى كوزدەيدى. مەردىگەر وسى مەكتەپتى جىل سوڭىنا دەيىن پايدالانۋعا بەرەتىنىن ايتتى», دەدى اينا ءمىسىرالىموۆا.
دەپۋتات يۋليا كۋچينسكايا بۇگىندە مەملەكەت ءبىلىم بەرۋ سالاسىنداعى كادر تاپشىلىعىن ازايتۋ جانە جاستاردى پەداگوگ ماماندىعىنا تارتۋ بويىنشا قابىلدانىپ جاتقان شارالارعا نازار اۋداردى.
«مەملەكەت باسشىسىنىڭ باستاماسىمەن 2019 جىلى «پەداگوگ مارتەبەسى تۋرالى» ارنايى زاڭ قابىلداندى. سوڭعى بىرنەشە جىلدا مۇعالىمدەردىڭ جالاقىسى ەكى ەسە ءوستى. بالاباقشا تاربيەشىلەرىنىڭ جالاقىسى 30%-عا ارتتى. پرەزيدەنت دەپۋتاتتار ازىرلەگەن عىلىم جانە ءبىلىم ماسەلەلەرى جونىندەگى زاڭعا قول قويدى. باسقا ماسەلەلەرمەن قاتار, زاڭدا بەلگىلى ءبىر دارەجەلەرى مەن عىلىمي اتاقتارى بار پەداگوگتەرگە اي سايىنعى ۇستەمەاقى تولەۋ قاراستىرىلعان. بۇل مۇعالىمدەردى ىنتالاندىراتىن شەشىمدەردىڭ ءبىرى», دەدى يۋليا كۋچينسكايا.
ايتا كەتەيىك, بىلتىر اقمولا وبلىسىندا «AMANAT» پارتياسىنىڭ سايلاۋالدى باعدارلاماسى بويىنشا 1245 ورىنعا ارنالعان 16 بالاباقشا, 3512 ورىنعا ەسەپتەلگەن 5 مەكتەپ اشىلدى. جالپى العاندا, 2027 جىلعا دەيىن وڭىردە 39 مەكتەپ سالۋ, سونداي-اق 82 مەكتەپكە كۇردەلى جوندەۋ جۇمىستارىن جۇرگىزۋ جوسپارلانىپ وتىر.
