قالا حالقى كوپ جينالاتىن ورىنعا كيىز ۇيدەگى كىتاپحانا قۇرىلىپ, وقىرمان قاۋىم تابيعات تۋرالى كىتاپ-جۋرنال وقيدى. ۆيكتورينارلىق ويىندارىنا قاتىسىپ, ءتىپتى وسىمدىكتى وزدەرى ەگۋگە بولادى. كوشپەلى كىتاپحانانىڭ ۇيلەستىرۋشىسى – س.سەيفۋللين اتىنداعى ورتالىق كىتاپحانا. جىلجىمالى كىتاپحانانىڭ تۇراقتى وقىرمانى كۇن ساناپ ارتىپ كەلەدى. بۇعان قوسا تۋريستەردىڭ دە ارنايى ات باسىن بۇرىپ, كىتاپ وقىپ كەتەتىنى بار. اسىرەسە كيىز ۇيدەگى كىتاپحانادان بالالار ءبىر ەلى كەتپەيدى. ويتكەنى تابيعاتقا قاتىستى كىتاپتار مەن جاڭا باسىلىمدار كوپ. جازعى دەمالىسىن تاڭنان كەشكە دەيىن ويىنمەن وتكىزەتىن بالقاشتىق بالالار كىتاپ وقىپ, زەيىندەرىن اشىپ ءجۇر.
– جىلجىمالى كىتاپحانانىڭ باستى مىندەتى – مادەنيەتتى, ەكولوگيالىق وي-ءورىستى, ەكولوگيالىق ساۋاتتىلىقتى ناسيحاتتاۋ. ادامدار كەلىپ, تۋعان ولكەنىڭ تابيعاتى تۋرالى كىتاپتار, گازەتتەر, جۋرنالدار وقي الادى. ۆيكتورينالار, بايقاۋلار وتكىزىلەدى. ءتىپتى كوگالداندىرۋ بۇرىشى بار. ەڭ بەلسەندى تۇرعىندارعا سىيلىقتار بەرىلەدى. قازىردىڭ وزىندە وڭ اسەر بار دەپ ايتا الامىن. كۇن سايىن كىتاپحاناعا بارامىن. اينالامىزداعى قوقىس ازايدى. تۇرعىندار جينالعان قوقىس سۇرىپتالۋى ءۇشىن ءبىزدىڭ جاشىكتەردى تولتىرۋعا تىرىسادى, – دەيدى جوبانى ۇيىمداستىرۋشى بالقاش قالاسى اكىمىنىڭ ورىنباسارى ساياگۇل جاقسىلىقوۆا.
جوبا كىتاپ وقۋ مادەنيەتىن قايتا جاڭعىرتۋدى, تۇرعىنداردى ەكولوگيالىق مادەنيەتكە تاربيەلەۋدى كوزدەيدى. كوشپەلى كىتاپحانا وقىرمانداردى 1 قىركۇيەككە دەيىن قابىلدايدى.
قاراعاندى وبلىسى,
بالقاش قالاسى
