فوتو: naryk.kz
Fix Price-تىڭ احقو-عا رەدوميتسيلياتسياسى وسى جىلدىڭ ماۋسىم ايىندا ءوتتى. بۇل ءىس-شارا كومپانيا مەن احقو اراسىنداعى ءبىر جىلعا جۋىق ۋاقىتقا سوزىلعان ۇيلەستىرۋ جۇمىستارىنىڭ ناتيجەسى سانالادى.
Fix Price Group حولدينگتىك كومپانياسى جانە ونىڭ جەرگىلىكتى ەنشىلەس ۇيىمدارى الەمنىڭ 9 ەلىندە Fix Price حالىقارالىق برەندىمەن 6,5 مىڭنان استام دۇكەندى باسقارادى, ءىرى قاتىسۋ نارىقتارى – رەسەي, بەلارۋس جانە قازاقستان. قازاقستاندا جەلى «بەست پرايس قازاقستان جشس» جەرگىلىكتى ەنشىلەس كومپانياسى ارقىلى 300-دەن استام ساۋدا نۇكتەسىن باسقارادى جانە 1,9 مىڭ ادامدى جۇمىسپەن قامتاماسىز ەتەدى.
«ورتالىقتىڭ كومپلاەنس سالاسىنداعى جوعارى ستاندارتتارى جانە حالىقارالىق دەڭگەيدە تانىلعان رەتتەۋشى تاسىلدەرى بيزنەستى يۋريسديكتسياعا تارتا وتىرىپ, ەل ىشىندە جانە وڭىردە ءادىل ءارى اشىق قارجى نارىعى مەن كاپيتال نارىعىن قامتاماسىز ەتەتىن جاعدايلار جاسايدى. Fix Price جوعارى كاپيتالداندىرىلعان ءىرى جاريا كومپانيا رەتىندە احقو-نىڭ حالىقارالىق كومپانيالار ءۇشىن قولايلى يۋريسديكتسيا رەتىندەگى پوزيتسياسىن كۇشەيتەدى, ونىڭ ىشىندە ايماققا جاڭا ينۆەستورلار مەن ستەيكحولدەرلەردى تارتادى», دەپ تۇسىندىردى احقو باسقارۋشىسى رەنات بەكتۇروۆ.
كومپانيانىڭ حابارلاۋىنشا, قازاقستانعا رەدوميتسيلياتسيا Fix Price Group-تىڭ كاپيتال مەن جاڭا ينۆەستورلاردى تارتۋ مۇمكىندىكتەرىن كەڭەيتەدى, قازىرگى ستەيكحولدەرلەرمەن جۇمىس ىستەۋ پروتسەسىن جەڭىلدەتەدى. Fix Price Group حالىقارالىق كومپانياسىنىڭ باعالى قاعازدارىنىڭ قوسىلۋى احقو-نىڭ وڭىردەگى ماڭىزدى قارجى حابى رەتىندە ودان ءارى دامۋىنا ۇلەس قوسادى.
Fix Price Group PLC - احقو-عا باسقا يۋريسديكتسيادان رەدوميتسيلياتسيالانعان جەتىنشى كومپانيا. العاشقى رەدوميتسيلياتسيا 2019 جىلى بولعان, ول كەزدە Kazakhstan Energy Reinsurance Company بەرمۋد يۋريسديكتسياسىنان احقو-عا رەدوميتسيلياتسيالانعان ەدى. وتكەن جىلى ورتالىققا تاۋ-كەن ءوندىرۋ سالاسىنىڭ الپاۋىتى Polymetal International Plc (2024 جىلعى ماۋسىمنان باستاپ Solidcore Resources plc), سونداي-اق Tselina Capital Limited جانە Cheltenham Group Limited حولدينگتىك كومپانيالارى كوشىپ كەلدى. بيىل تاعى ەكى كومپانيا كوشىپ كەلدى, ولار – Specta Group Ltd. جانە KAZ Minerals Holding Limited.
