قۋىرشاق ترۋپپاسىنىڭ اشىلعانىنا ءبىر جىل ۋاقىت ەندى عانا بولدى. دەگەنمەن از ۋاقىت ىشىندە جاڭادان قۇرىلعان جاپ-جاس ۇجىم «قارلىعاشتىڭ قۇيرىعى نەگە ايىر؟» ەرتەگىسىمەن ومانداعى حالىقارالىق قۋىرشاق تەاترلارىنىڭ فەستيۆالىنە قاتىسىپ قايتتى. رەجيسسەرى – ايدىن سالبان. «كەرىك پەنەن مۇيىزتۇمسىق», «ويىنشىقتار ويانعاندا» دەگەن سەكىلدى ءتۇرلى قويىلىم بالالار نازارىنا ۇسىنىلدى. قۋىرشاق ترۋپپاسى العاشقى ماۋسىمىن شىعىس حالىقتارى ەرتەگىسىنىڭ جەلىسىمەن جازىلعان ء«الي بابا جانە قىرىق قاراقشى» قۋىرشاق قويىلىمىمەن اياقتادى. قويۋشى رەجيسسەر – انتون زايتسەۆ.
قۋىرشاق تەاترىمەن تىزە قوسىپ جۇمىس ىستەگەن «Total fest» تەاتر فەستيۆالىنىڭ ديرەكتورى, قويۋشى رەجيسسەر انتون زايتسەۆ قاراعاندىلىق ۇجىمنىڭ شىعارماشىلىق قابىلەتىنە جوعارى باعا بەردى. سونىمەن قاتار ول تەاتردا كوركەم تۋىندىلاردى ساحنالاۋعا بارلىق جاعدايدىڭ بارىنا ريزاشىلىعىن جەتكىزدى.
«جاس ۇجىممەن ءبىر اي جۇمىس ىستەدىم. ساكەن تەاترى ءبىرشاما جەتىستىككە جەتكەن ەكەنسىزدەر. اكتەر وينى مەنى تاڭعالدىردى. جۇمىس ىستەۋگە وتە قولايلى. اسىرەسە اكتەرلىك قۇرامنىڭ باسىم بولىگى جاستار ەكەنىن كورگەنىمدە, ونەر شاڭىراعىنىڭ بولاشاعى جارقىن ەكەنىنە كوزىم جەتتى. جەتكەن جەتىستىكتەرگە ماساتتانباي, ودان ءارى ىزدەنەتىن تالانتتار زور قۇرمەتكە لايىق. قۋىرشاق تەاترىن اشىپ, سونىڭ رەپەرتۋارىن تولتىرۋ, اكتەرلەردى جاساقتاۋ, ولاردى دايارلاۋ – استە وڭاي شارۋا ەمەس. بۇل كوپ ەڭبەكتى تالاپ ەتەدى. بولاشاقتى تاربيەلەۋ جولىندا قۋىرشاق تەاترىنىڭ ماڭىزى زور ەكەنىن اتاپ وتكىم كەلەدى. كورەرمەننىڭ ءار ساناتىن قامتي الاتىن تەاتردان ءۇمىت كۇتۋگە بولادى», دەيدى انتون زايتسەۆ.
92-ماۋسىمجاباردىڭ تاريحي ءساتى – مەموراندۋمعا قول قويىلدى. وبلىستىق «Saryarqa» تەلەارناسىمەن جاسالعان ورتاق مەموراندۋمنىڭ اياسىندا تەلەارنا ساكەن تەاترىنىڭ پرەمەرالىق قويىلىمدارىنان تىكەلەي ترانسلياتسيا جاسايدى. وعان قوسا, رەپەرتۋارداعى بارلىق سپەكتاكل التىن قوردا ساقتالادى.
«قور كەز كەلگەن ەلدىڭ مادەنيەتى مەن تاريحى ءۇشىن اسا ماڭىزدى. بۇنى ەلدىڭ جادى دەسەك تە بولادى. وبلىستىق «Saryarqa» تەلەارناسىنىڭ قورى – وبلىستىق ارنالاردىڭ ىشىندەگى ەڭ ۇلكەن قور. ىرگەمىزدە تۇرعان تەاتردىڭ ساحناسىنداعى ءار قويىلىم – ەرتەڭگى تاريح. وسىنداعى ءار اكتەر ەرتەڭگى تۇلعا دەپ سەنەمىن», دەيدى تەلەارنا ديرەكتورى بەرىك دۇيسەتاەۆ.
ساكەن تەاترىنىڭ ەندىگى العا قويعان ماقساتى – مۋزىكالىق دراما تەاترى مارتەبەسىنە قول جەتكىزۋ. سول ءۇشىن دە تەاتر ۇجىمى «قىز جىبەك» قويىلىمىن مۋزىكالىق دراما رەتىندە ساحنالادى.
اتاقتى «قىز جىبەك» مۋزىكالىق دراماسىن تاماشالاۋعا كەلگەن كورەرمەننىڭ قاراسى قالىڭ بولدى.
تەاتردىڭ مارتەبەلى كورەرمەندەرى بۇل جولى قارا شاڭىراق اكتەرلەرىنىڭ جاڭا قىرىنا كوز جەتكىزدى. اكتەرلەردىڭ اسقاقتاتا سالعان اندەرى قويىلىمنىڭ ءسان-سالتاناتىن كەلىستىردى.
«ساكەن تەاترىندا ۇمىتىلماس كۇن, ۇلكەن وقيعا. قازاق دراماتۋرگياسىنىڭ جاۋھارى «قىز جىبەك» مۋزىكالىق دراماسىنىڭ پرەمەراسى ساحنالاندى. «قىز جىبەك» وسىدان تۋرا توقسان جىل بۇرىن جازىلىپ, ساحنالانعانى تۋرالى از-كەم ءبىلۋشى ەدىك. سودان بەرگى ۋاقىتتا ەلىمىزدىڭ وڭىرلىك تەاترلارىندا ارەدىك قويىلىپ كەلەدى, ارينە. بىراق ءجيى ەمەس, سيرەك ساحنالانادى. سەبەبى شوقتىعى بيىك شىرقاۋ شىعارما. اركىمنىڭ جۇرەگى داۋالاپ بارا بەرمەيتىن ءدۇر دراما. كوزكورگەندەردىڭ ايتۋىنشا, قاراعاندى تەاترىندا وتكەن عاسىردىڭ ورتا تۇسىندا بۇل سپەكتاكلدى م ۇلىك سۇرتىباەۆ, ءجاميلا شاشكينا سىندى ساحنا ساڭلاقتارى سومداپتى. ودان بەرگى ۋاقىتتا ءتۇرلى سەبەپپەن قويىلماي كەلگەن ەكەن. سول ولقىلىقتىڭ ورنى تولدى. ساكەن ساحناسىندا تولەگەن بولىپ تولقىدىق, قىز جىبەكپەن قوسا قۋانىپ, قاتار قايعىردىق. شەگەنىڭ شىرقاي سالعان ارياسىن ايىزىمىز قانىپ تىڭدادىق. قىسقاسى, تەاتردىڭ ادەمى الەمىنە, تۇڭعيىق تەرەڭىنە سۇڭگىدىك. ليرو-ەپوستىق جىردىڭ وقيعاسى تەاتردىڭ ۇلت اسپاپتارى جانە سيمفونيالىق اسپاپتار وركەسترىنىڭ سۇيەمەلدەۋىمەن ارتىستەرىمىزدىڭ ورىنداۋىنداعى ءان-كۇي, مۋزىكامەن ءورىلدى. ديريجەر ابىلقايىر ساعىمباەۆقا, قويۋشى-رەجيسسەر ايدىن سالبانعا جانە بارشا تەاتر ۇجىمىنا زور العىسىمدى بىلدىرەمىن. جاڭا ماۋسىمعا جاقسى دەمالىپ, جاڭا يدەيالارمەن كەلۋلەرىڭىزگە تىلەكتەسپىن», دەدى وبلىس اكىمىنىڭ ورىنباسارى ەرلان قۇسايىن.
وسىلايشا, ساكەن تەاترىنىڭ جاڭالىعى بولعان مۋزىكالىق قويىلىمنىڭ شىمىلدىعى, تەاتردىڭ ماۋسىمى جابىلدى. كورەرمەن قيماي-قيماي قوشەمەت كورسەتتى.
قاراعاندى وبلىسى
