تۋريزم جانە سپورت ءمينيسترى ەرمەك مارجىقپاەۆتىڭ قحر مادەنيەت جانە تۋريزم ءمينيسترى سۋن ەليمەن كەزدەسۋىندە وسى ساۋالداردىڭ دا جاۋابى ايتىلدى. استانادا وتكەن كەزدەسۋدە تۋريزم سالاسىن ورىستەتۋ باعىتى بويىنشا ەكىجاقتى ىنتىماقتاستىق تالقىلاندى. بىلتىرعى ناتيجە بويىنشا كورشى قىتاي ەلىنەن بىزگە كەلگەن تۋريستەردىڭ سانى ەداۋىر ارتقان.
«تۋريزم سالاسىنداعى ىنتىماقتاستىقتى جانداندىرۋ, تۋريستەر سانىن ۇلعايتۋ ماقساتىندا بىرقاتار شارا قابىلدانىپ, يگى ىستەر جۇزەگە اسىرىلدى», دەگەن ە.مارجىقپاەۆ 2023 جىلى قىتايدان ەلىمىزگە كەلگەن تۋريستەر سانى بىرنەشە ەسە ارتىپ, 367 مىڭ ادامعا جەتكەنىن اتاپ ءوتتى. سونىمەن قاتار بىلتىر 311 مىڭ وتانداسىمىز تۋريست رەتىندە قىتايعا ساپارلاعان. بۇل كورسەتكىش بىلتىرعا قاراعاندا ەكى ەسە كوپ. مينيستر قازاقستان مەن قىتاي اراسىنداعى اۋە رەيستەرى سانى اپتاسىنا 44 رەيسكە دەيىن ارتقانىن اتاپ ءوتتى.
«قحر توراعاسىنىڭ قازاقستانعا مەملەكەتتىك ساپارى اياسىندا قىتاي مەديا كورپوراتسياسىمەن (سمG) ەلدىڭ تۋريستىك الەۋەتىن ىلگەرىلەتۋ ماقساتىندا تۋريزم سالاسىنداعى ءوزارا تۇسىنىستىك جانە ىنتىماقتاستىق تۋرالى مەموراندۋمعا قول قويىلادى», دەدى ە.مارجىقپاەۆ.
قحر مادەنيەت جانە تۋريزم ءمينيسترى سۋن ەلي قىتايداعى قازاقستان ءتۋريزمى جىلى اياسىندا ءىس-شارالار جوعارى دەڭگەيدە ۇيىمداستىرىلعانىن, ەلدەستىرمەك يگى ءىس ەكى ەل اراسىنداعى ەكونوميكالىق, ساۋدا جانە گۋمانيتارلىق بايلانىستاردى ودان ءارى دامىتاتىنىن جەتكىزدى. قىتاي تاراپى قازاقستان ءۇشىن تۋريزم سالاسىنداعى ىنتىماقتاستىقتى نىعايتۋعا ارقاشان دا ءازىر ەكەنىن اڭعارتتى.
ە.مارجىقپاەۆ سۋن ەليگە ساۋىن ايتىپ, قىتايدىڭ ۇلتتىق قۇراماسى ونەر كورسەتەتىن V دۇنيەجۇزىلىك كوشپەلىلەر ويىندارىن تاماشالاۋعا كورشى ەل تۋريستەرىن دە شاقىردى. 8–13 قىركۇيەك ارالىعىندا استانا قالاسىندا وتەتىن ءدۇبىرلى دودانى تاماشالاۋعا بىرنەشە ەلدەن تۋريستەر كەلەتىنىن جەتكىزدى.
بيىل قىتايداعى قازاقستان ءتۋريزمى جىلىنىڭ جابىلۋ ءراسىمىن جەلتوقسان ايىندا الماتىدا وتكىزۋ جوسپارلانىپ وتىر.
