استانا تۇلەكتەرى 1-ءشى ورىندا

جاقىندا, استانا قالاسى ءبىلىم باسقارماسىنىڭ باستىعى ءاسيما بيمەندينا ۇلتتىق بىرىڭعاي تەس­تىلەۋ قورىتىندىسى بويىنشا استانا قالاسى مەكتەپ ءبىتىرۋ­شىلەرىنىڭ قول جەتكىزگەن ءناتي­جەلەرىنە ارنالعان ءباسپاسوز ءماسليحاتىن وتكىزدى. استانا قالاسى ءبىلىم باسقارماسى باستىعىنىڭ ايتۋىنشا, ەلور­دامىزدىڭ تۇلەكتەرى العاشقى سۇرىپتاۋ قورىتىندىلارى بويىنشا 1-ورىنعا يە بولدى. استانا قالاسى مەكتەپتەرىنىڭ بيىلعى ۇبت-نى تاپسىرعان 3444 وقۋشىسىنىڭ ورتاشا باللى 97,43 پايىزدى قۇرادى. ال رەسپۋبليكا بويىنشا بۇل كورسەتكىش 84,84 پايىز بولدى. وسىعان قوسا, استانا قالاسىنىڭ “ۇزدىك” وندىققا ەنگەن مەكتەپتەردىڭ ءتىزىمى جانە ورتاشا باللى ايتىلدى: دارىندى بالالارعا ارنالعان “زەردە” مەكتەبى – 113 بالل, №38 مەكتەپ-ليتسەي – 101,9 بالل, “ميراس” حالىقارالىق مەكتەبى – 101,5 بالل يەلەندى, سونىمەن بىرگە, №50, №60, №6, №48, №17 مەكتەپ-ليتسەيلەرى ۇزدىكتەردىڭ قاتارىنا كىردى. “التىن بەلگىدەن” ۇمىتكەر 133 وقۋشىنىڭ 90-ى ءوز بىلىمدەرىن دالەلدەپ شىقسا, 102 تۇلەكتىڭ 39-ى عانا ۇزدىك اتتەستاتتى ەنشىلەدى. استانا قالاسىندا ەڭ جوعارى كورسەتكىش – 125 باللعا №40 ورتا مەكتەپ تۇلەگى ساعىندىق عيزات يە بولدى. كونفەرەنتسيادا اپەللياتسيالىق كوميسسيانىڭ اتقارعان جۇمىسىنا, وعان قوسا ءبىر جىل بويى دايىندالعان ۇبت سۇراقتارىنا سىن ايتىلدى. ءاسيما بيمەندينا مەكتەپ پسيحولوگ­تارىنىڭ ءوز جۇمىستارىن جاقسى جاعىنان كورسەتكەنىن مالىمدەپ, العىسىن ءبىلدىردى. شىڭعىس مىرزاحمەت, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى.