فوتو: svetland-oil.kz
قازاقستان مەن قىتاي باسشىلارى ترانسكاسپي حالىقارالىق كولىك باعىتى بويىنشا جۇك كولىكتەرى مەن تەمىرجول كونتەينەرلەرىن جونەلتۋ راسىمىنە تەلەكوپىر رەجيمىندە قاتىستى.
ءىس-شارا قاتىسۋشىلارىنا ۇلى جىبەك جولى باعىتىمەن جۇرەتىن ترانزيتتىك رەيس تۋرالى بەينەروليك كورسەتىلدى. ءىس-شارا سوڭىندا پرەزيدەنت قاسىم-جومارت توقاەۆ پەن توراعا سي تسزينپين جۇك پارومدارىنىڭ قوزعالىسىن ىسكە قوستى.
كەرۋەن قازاقستاننىڭ 8 وڭىرىنەن ءوتىپ, بۇگىن قۇرىق پورتىنا جەتتى. كولىك كەرۋەنىنىڭ ساپارى 10 كۇندى قۇرايدى, ال ۇزىندىعى - 4 800 شاقىرىم.
بۇل باعىت قوس ەل اراسىنداعى ەكونوميكالىق بايلانىستى ودان ءارى نىعايتۋعا سەپتىگىن تيگىزەدى.
كولىك كوميتەتىنىڭ توراعاسى التاي الى قۇرىق پورتىنان تىكەلەي بايلانىسقا شىعىپ, قىتايدان شىققان العاشقى كولىك كەرۋەنى اقتاۋ مەن قۇرىق پورتتارىنا كەلىپ جەتكەنىن حابارلادى.
«قىتاي ەلىنەن شىققان جۇك كەرۋەنى مەن كونتەينەر پويىزى اقتاۋ مەن قۇرىق پورتتارىنا كەلىپ جەتتى. ولار ازەربايجان, گرۋزيا, تۇركيا جانە ەۋروپا ەلدەرىنە بەت الدى. بۇل - ۇلى جىبەك جولىنىڭ قايتا جاڭعىرۋى. كەرۋەن اتتانۋعا دايىن», دەدى كولىك كوميتەتىنىڭ توراعاسى.
التاي ءالى ەكى ەلدىڭ باسشىلارىنان كەمەلەردىڭ جۇزۋىنە رۇقسات بەرۋىن سۇرادى.
