اداسقان قىزدار قۇم اراسىنان تابىلدى

قاڭتار ايىنىڭ قىسقا كۇنىنىڭ بىرىندە جاڭاقالا اۋدانىن­­­­دا­عى جاڭاقازان اۋىلدىق وكرۋگى اكىمدىگىنە شالعايداعى قىس­تاقتان ەكى قىزدىڭ اداسىپ كەتكەنى تۋرالى شۇعىل حابار ءتۇستى. وكرۋگ ورتالىعىنان 50 شاقى­رىم قاشىقتىقتاعى قىستاق­تا وتىرعان مالشى امانگەلدى مەڭ­­­دى­عاليەۆ ءتۇس كەزىندە ءوزىنىڭ جەكە كولىگىمەن جو­عالىپ كەتكەن مالىن ىزدەۋگە شىعادى. قاسى­نا جوعارى سىنىپتا وقيتىن قىزى مەن ونىڭ قۇربىسىن وتىرعىزىپ الادى. مۇنداعى ويى الىستان قاراي­ىپ كورىنگەن مالدى كورۋگە ولاردى پاي­دالانۋ ەكەن. ولار قىسقى مال ورنىنان التى-جەتى شاقىرىم ۇزاعان كەزدە كولىكتىڭ تەگەرشىگى جارىلادى. امانگەلدى  ونى اۋىستىراتىن قۇرالى ۇيدە قالىپ قويعانىن وسى كەزدە باي­قايدى. دەگەنمەن, دوڭگەلەكتى رەتتەۋگە كىرىسىپ كەتەدى. ونىڭ قاپەلىمدە اياقتالمايتىنىن بايقاعان ەكى قىز وسى كەزدە ۇيگە جاياۋ جۇرە بەرگەندى ءجون كورەدى. بۇل كۇندىزگى كەز ەكەن. بۇدان كەيىن ءبىراز ۋاقىت وتكەن سوڭ اۆتوكولىگىن جۇرگىزە المايتىنى­نا كوزى جەتكەن امانگەلدى دە جاياۋلاپ ءۇيىن بەتكە الادى. ول كەشكى ساعات توعىزدىڭ شاماسىندا قىستاققا كەلگەندە ەكى قىزدىڭ كەلمەگەنىن ءبىلىپ, وسى ساتتە زايىبى ەكەۋىنىڭ زارەسى ۇشادى. وتاعاسى بۇدان سوڭ ۇيگە كىرمەستەن قايتادان قىزداردى ىزدەۋگە كەتەدى. ونىڭ ارتىنان بالدىزى دا تۇيەگە ءمىنىپ كومەككە كەلەدى. وكرۋگ اكى­مىنە حابار بەرىلەدى. ول حاباردى الىسىمەن جولعا شىعادى. جەر جاع­دايىنا جەتىك اۋىل اكىمى س.عۇباشەۆ قۇمنان كىسى ىزدەۋ ءشوپ اراسىنان ينە ىزدەۋمەن بىردەي ەكەنىن ەسكەرىپ, شۇعىل قۇمعا جۇرە الاتىن ءتورت كولىكپەن وقيعا ورنىنا جەتەدى. بۇل كەزدە ساعاتتىڭ ءتىلى تۇنگى ون ەكىدەن اسىپ كەتكەن ەدى. كوزگە تۇرتسە كورگىسىز قاراڭعى تۇندە وتتىڭ الىستان كورىنەتىنىن ەسكەرگەن اۋىل اكىمى تايلانعان ءشوپتى بيىك شوقا ۇستىنە شىعارىپ جاعىپ اينالا كولىك جارىعىن ءتۇسىرىپ وتىرۋدى قاجەت دەپ تابادى. ءسويتىپ, ءتورت كولىك وسىلايشا ءىز كەسىپ, قۇم اراسىن شارلاۋعا كىرىسەدى. قىسقاسى, كەلەسى كۇنگە اۋىسقان ساعات تۇنگى ەكى شاماسىندا ون ءۇش ساعات بويى دالادا اداسقان ەكى قىز امان-ەسەن تابىلادى. – قۇم ىشىندە قاراڭعىلىق ەرتە تۇسەدى عوي. اسىرەسە, قىس كەزىندە. اداسقانىمىزدى بىلدىك. الايدا سونىڭ وزىندە قورقىنىش پەن ۇرەيگە بوي الدىرا قويعان جوقپىز. ءبىر كەزدە ءجۇرىپ كەلە جاتىپ تەرەڭ شۇڭقىرعا تاپ بولدىق.سوعان ءتۇسىپ دەمالدىق. شۇڭقىردىڭ ىشىندە ءشوپ بار ەكەن. ءبىرىمىز ۇيىقتاپ تا الدىق. قاتتى توڭا قويعان جوقپىز. ىزدەپ تاپقاندارىڭىزعا العىسىمىز شەكسىز, – دەيدى قىزدار. ومىرزاق اقباسوۆ, جۋرناليست. باتىس قازاقستان وبلىسى, جاڭاقالا اۋدانى.