تورالقا قۇرامىنا مەملەكەت جانە قوعام قايراتكەرى, پروفەسسور دۇيسەن قاسەيىنوۆ, پرەمەر-مينيستر كەڭەسشىسى ەرالى توعجانوۆ, ءماجىلىس دەپۋتاتى, ەكونوميكالىق رەفورما جانە وڭىرلىك دامۋ كوميتەتىنىڭ توراعاسى نۇرتاي سابيليانوۆ, ءماجىلىس دەپۋتاتى, حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى ايگۇل قۇسپان, سەنات دەپۋتاتى, حالىقارالىق قاتىناستار, قورعانىس جانە قاۋىپسىزدىك كوميتەتىنىڭ حاتشىسى دارحان قىدىرالى, قوعام قايراتكەرى جانداربەك كاكىشەۆ, ساۋدا جانە ينتەگراتسيا ۆيتسە-ءمينيسترى قايرات تورەباەۆ, اۋىل شارۋاشىلىعى ۆيتسە-ءمينيسترى ەربول تاسجۇرەكوۆ, «قازاقستان-ازيا ساۋدا جانە مادەنيەتتى دامىتۋ قاۋىمداستىعى» باسقارما توراعاسى قانات بەيسەك كىرىپ وتىر.
جيىندا تورالقا توراعاسى مەن حاتشىسى سايلاندى. قاۋىمداستىق جارعىسىنا سايكەس, توراعا – كونسۋلتاتسيالىق-كەڭەسشى ورگاننىڭ قىزمەتىنە باسشىلىق جاسايدى. ال تورالقا حاتشىسى كونسۋلتاتيۆتىك-كەڭەسشى ورگاننىڭ قىزمەتىن ۇيىمداستىرۋدى, اقپاراتتىق جانە تەحنيكالىق قامتاماسىز ەتۋدى جۇزەگە اسىرادى. تورالقا مۇشەسى ەرالى توعجانوۆتىڭ ۇسىنىسىمەن توراعالىققا دۇيسەن قاسەيىنوۆ, سونداي-اق توراعا ۇسىنىسىمەن تورالقا حاتشىلىعىنا قانات توقاباەۆ سايلاندى.
كۇن تارتىبىنە ساي, وتىرىستا قاۋىمداستىقتىڭ ماقسات-مىندەتىن ايقىندايتىن ستراتەگيالىق تۇجىرىمداما تالقىلانىپ, قولداۋ تاپتى. وسى ماسەلە بويىنشا بايانداما جاساعان باسقارما توراعاسى قانات بەيسەكتىڭ ايتۋىنشا, قاۋىمداستىق بۇعان دەيىنگى «قازاقستان-قىتاي ساۋداعا جاردەمدەسۋ قاۋىمداستىعىنىڭ» تاجىريبەسىن ەسكەرە وتىرىپ, اۋقىمىن كەڭەيتۋ باعىتىندا قۇرىلعان. ول ءبىرىنشى كەزەكتە بيزنەس پەن مادەنيەت سالاسىنىڭ مەملەكەتتىك باعدارلامالاردان باستاپ, جەكە ۇجىمدىق باستامالاردى, ازيا ەلدەرىندەگى مۇددەسىن قورعاۋدى جۇزەگە اسىرادى.
«قازاقستان-ازيا ساۋدا جانە مادەنيەتتى دامىتۋ قاۋىمداستىعى» حالىقارالىق دەڭگەيدە ەل ءيميدجىن ارتتىراتىن اۋقىمدى ءىس-شارالار وتكىزۋدى دە قولدايدى.
تالقىلاۋ بارىسىندا تورالقا مۇشەسى دارحان قىدىرالى قاۋىمداستىقتىڭ ستراتەگيالىق تۇجىرىمداماسىنا قاتىستى پىكىرىن ءبىلدىردى. «ساۋدا جانە مادەنيەتتى قاتار الىپ ءجۇرۋ شەشىمى وتە دۇرىس. سەبەبى كەزىندە ۇلىق ۇلىس التىن وردانىڭ دا, ورتالىق ازيانىڭ باسقا دا ءىرى مەملەكەتتەردىڭ دە ىدىراۋىنا جىبەك جولىنىڭ ءۇزىلۋى ايتارلىقتاي اسەر ەتتى. شىعىستان باتىسقا سوزىلىپ جاتقان كەرۋەن جولدارىنىڭ, بارىس-كەلىستىڭ توقتاۋى – الپاۋىت مەملەكەتتەردىڭ مادەني دامۋىن دا, ەكونوميكاسىن دا, ساياسي جۇرىستەرىن دە توقىراۋعا ۇشىراتتى. قازىر مەملەكەت باسشىسى حالىقارالىق دەڭگەيدە ساۋدا ينتەگراتسياسىنا, ازيا ەلدەرىمەن جاقىن بايلانىستارعا باسا نازار اۋدارىپ وتىر. پارلامەنت سەناتىندا وسى ازيا باعىتى بويىنشا بىرنەشە زاڭناما تالقىلانىپ, ماقۇلدانىپ پرەزيدەنتتىڭ قول قويۋىنا جولداندى», دەدى سەناتور. سونىمەن قاتار ول قاۋىمداستىق اتقاراتىن ءىس-شارالار جوسپارىنىڭ اۋقىمى دا الداعى ۋاقىتتا كەڭەيە بەرۋگە ءتيىس ەكەنىن اتاپ ءوتتى.
ال تورالقا مۇشەسى ەرالى توعجانوۆ: «جاڭا تەحنولوگيالاردىڭ قارقىندى دامۋ ۇدەرىسىنە كۋا بولىپ وتىرمىز. سونىڭ ءبىرى – جاساندى ينتەللەكت. مۇنىڭ يگىلىگىن بيزنەسكە دە, مادەنيەتكە دە پايدالانا الماساق – ۇتىلامىز. وسىنى ەسكەرسەك», دەدى.
وتىرىستا قاۋىمداستىقتىڭ ستراتەگيالىق تۇجىرىمداماسى قولداۋ تاپتى. جيىن بارىسىندا تورالقا توراعاسى اتىنان «قازاقستان-ازيا ساۋدا جانە مادەنيەتتى دامىتۋ» قاۋىمداستىعىنىڭ توراعاسىنا «سەنىم گراموتاسى» تاپسىرىلدى.
