بيىل ءساۋىر ايىندا سۋ تاسقىنىنا بايلانىستى اقتوعاي اۋدانىنىڭ جالاۋلى اۋلىندا توتەنشە جاعداي جاريالانعان ەدى. ەلدى مەكەندەگى 14 ءۇيدى سۋ باسىپ, كەيىن سۋ تاسقىنى كەزىندە زارداپ شەككەن جانە كوميسسيانىڭ شەشىمىمەن تۇرۋعا جارامسىز دەپ تانىلعان بەس باسپانا انىقتالدى. ولاردىڭ ورنىنا جاڭا قۇرىلىستار سالىنا باستاعانى تۋرالى بۇعان دەيىن گازەت بەتىندە جازعان بولاتىنبىز.
جالاۋلى اۋلىنىڭ جۇرتى وتكەن جەكسەنبى كۇنى تايلى-تاياعى قالماي باسپانا تويىنا جينالدى. ۇيلەرى تاسقىننان زارداپ شەككەن بەس وتباسىعا جاڭادان سالىنعان ساپالى ۇيلەر پايدالانۋعا بەرىلدى. «اقتوعاي-اگرو» جشس باسپانالاردى 3 ايعا جۋىق ۋاقىتتىڭ ىشىندە اياقتاپ ۇلگەردى. اباي كوشەسىندەگى دوڭەستەۋ تۇستا پايدا بولعان جاڭا عيماراتتار جايلى ءارى سىرت كەلبەتى اسەم ەتىپ تۇرعىزىلعان.
«بيىل وبلىسىمىز بىرنەشە توتەنشە جاعدايعا تاپ بولدى. اسىرەسە كوكتەمگى سۋ تاسقىنى ەلدى مەكەندەرىمىزگە از شىعىن اكەلگەن جوق. مەملەكەت باسشىسى قاسىم-جومارت توقاەۆ بارلىق زارداپ شەگۋشىلەرگە كومەكتەسۋدى تاپسىرعان بولاتىن. ءبىز اۋىلدىق جەرلەردىڭ تۇرعىندارىنا جان-جاقتى كومەك كورسەتۋگە بارلىق كۇش-جىگەرىمىزدى شوعىرلاندىردىق. جالاۋلى اۋلى تۇرعىندارىمەن بۇعان دەيىنگى كەزدەسۋدە قاتتى ۋايىمداۋدىڭ قاجەتى جوق ەكەنىن ايتىپ, از ۋاقىتتىڭ ىشىندە بارلىعىن رەتكە كەلتىرەمىز دەپ ۋادە ەتكەنمىن. اۋىل جۇرتىنا توتەننەن كەلگەن اپاتتىڭ سالدارىنا مويىنسۇنباي, قيىندىقتارعا توتەپ بەرگەنى ءۇشىن, ال ءوڭىرىمىزدىڭ وزگە ازاماتتارىنا كورسەتكەن كومەكتەرى مەن دەمەۋشىلىكتەرى ءۇشىن العىس ايتامىن. جاڭا ۇيلەرگە قونىستانعان شاڭىراقتاردىڭ ىرىس-بەرەكەسى ارتا بەرسىن», دەدى باسپانالاردىڭ كىلتىن تابىستاۋ سالتاناتىندا پاۆلودار وبلىسىنىڭ اكىمى اسايىن بايحانوۆ.
سونداي-اق ايماق باسشىسى دەمەۋشىلىك كورسەتكەن ERG توبى مەن «پاۆلودارەنەرگو» اق-عا, ساپالى ۇيلەردى سالعان جەرگىلىكتى «اقتوعاي-اگرو» جشس قۇرىلىس كومپانياسىنا العىسىن ءبىلدىردى.
قونىستويىنىڭ قۇرمەتىنە بۇل كۇنى اۋىلدا وبلىستىق «شاڭىراق» حالىق شىعارماشىلىعى ورتالىعى مەن ي.بايزاقوۆ اتىنداعى وبلىستىق فيلارمونيا ارتىستەرى كونتسەرت ۇيىمداستىردى. سونداي-اق ۇلتتىق ويىندار وينالىپ, بالالارعا ارنالعان ويىن-ساۋىقتىق ءىس-شارالار ءوتتى. پاۆلودار وبلىسىنىڭ قۇرمەتتى ازاماتى, مادەنيەت سالاسىنىڭ ارداگەرى بەيسەنبى مۇقاجانوۆ اقتوعاي اۋدانى تۇرعىندارىنىڭ اتىنان العىس رەتىندە ارناۋ ايتتى.
جاڭا باسپاناعا يە بولعانداردىڭ ءبىرى – اتالعان اۋىلدىڭ تۇرعىنى سەرىك احمەتوۆ. «بۇگىن ءوز باسپانامىزدىڭ كىلتىن الىپ, قۋانىشقا كەنەلىپ جاتىرمىز. قۇرىلىس جۇمىسى جۇرگىزىلىپ جاتقاندا كەلىپ باقىلاپ جۇردىك. جاقسى سالىندى دەپ ويلايمىن, وزىمە ۇنادى. ءۇي كەڭ ءارى ىڭعايلى جەردە ورنالاسقان. جۇبايىم ەكەۋىمىز ءتورت ۇل تاربيەلەپ وتىرمىز. جەتى نەمەرەم بار. جاڭا باسپانامىزدا ءۇش ۇلىمىزبەن تۇراتىن بولامىز. باسىمىزعا تۇسكەن قيىن جاعدايدا كومەككە كەلگەن بارشا ازاماتتارعا, وبلىس, اۋدان, اۋىل اكىمدەرىنە راحمەت ايتامىن. كورگەن بەينەتىمىزدىڭ ءبارى ارتتا قالسىن. كەلەشەكتە مۇنداي جاعداي ەلىمىزگە كەلمەسىن», دەدى وتاعاسى.
سماتاەۆ, بايمانوۆ, مۋللين, دايىربەكوۆ وتباسى – كوپبالالى شاڭىراقتار, كۇمىس القا يەلەرى. اتالعان وتباسىلاردىڭ ۇيلەرى سۋ تاسقىنىنان سوڭ جارامسىز بولىپ تانىلعان. سۆەتلانا مۋللينا سۋ استىندا قالعان ۇيدە بالا كەزىنەن تۇرىپ كەلگەنىن ايتادى. قامىستان سالىنعان ەسكى باسپانا 1985 جىلى بولعان سۋ تاسقىنىنا دا شىداس بەرگەن ەكەن. بيىل كوكتەمدە قارعىن سۋ عيماراتتى تاعى شايىپ, بۇل جولى ول تۇرۋعا مۇلدە جارامسىز بولعان.
«ومىرىمدە ەكى مارتە كوكتەمگى سۋ تاسقىنىنا كۋا بولدىم. ەڭ قورقىنىشتى اپات 1985 جىلى بولىپ, ادامدار اۋىل ىشىندە قايىقپەن ءجۇزىپ ءجۇردى. قۇدايعا شۇكىر, بيىل بارلىعى امان-ەسەن اياقتالدى. سۋ ءبىزدىڭ اۋىلعا 29 مامىر كۇنى ءتۇن ورتاسىندا كىردى. بيىكتىگى جارتى مەترگە جەتەتىن سۋدى كورىپ, العاشىندا قاتتى قورىققانىمىز راس. قايدا بارارىمىزدى, ۇيدەن قانداي زاتتى الىپ كەتەرىمىزدى بىلمەي ساستىق. اينالانىڭ بارلىعى سۋعا تولعاندىقتان, قايدا بارىپ تۇراقتارىمىزدى دا بىلمەدىك. ۇيدەگى زاتتاردىڭ بارلىعى ءب ۇلىندى», دەپ ەسكە الدى سۆەتلانا سول تۇنگى قورقىنىشتى اپاتتى. انانىڭ التى بالاسى بار, جاڭا ۇيگە ول ەكى ۇلىمەن بىرگە قونىستاندى.
اتاپ وتەيىك, اتالعان باسپانالاردى وبلىستىق اكىمدىكپەن جاسالعان مەموراندۋم اياسىندا ERG كومپانياسى ءوز قاراجاتىنا سالىپ شىقتى. قۇرىلىسىنا 100 ملن تەڭگە ءبولىندى. دەمەۋشىلەر, سونىڭ ىشىندە دەپۋتاتتار اۋىل تۇرعىندارىنا توڭازىتقىش, تەلەديدار, سالقىنداتقىش, اس پليتاسى جانە وزگە ۇيگە قاجەت تەحنيكالاردى ساتىپ الىپ بەردى. قۇرىلىستى سالعان «اقتوعاي-اگرو» جشس بارلىق ءۇيدىڭ ساپاسىنا ءومىر بويىنا كەپىلدىك بەرىپ وتىر. ءار ءۇيدىڭ اۋماعى – 102 شارشى مەتر, عيماراتتاردىڭ ارقايسىنا 200 شارشى مەتردى جىلىتۋعا قابىلەتتى قازاندىقتار ورناتىلعان. مەردىگەر فيرمانىڭ باسشىسى الەكساندر تەرەنتەۆ جوبالىق-سمەتالىق قۇجاتتا كورسەتىلگەننىڭ بارلىعىن قامتىدىق دەيدى. باسپانالارعا اۋىز سۋ, كارىز جۇيەلەرى, ەلەكتر جەلىلەرى تارتىلىپ, ءار ءۇيدىڭ اۋلاسىندا اۋىز سۋ سكۆاجينالارى قازىلدى. ورتالىق سۋ جۇيەسىندە ماسەلە تۋىنداي قالعان جاعدايدا تۇرعىندار الگى سكۆاجينالاردى پايدالانا الادى.
ء«وزىم اقتوعاي اۋدانىنىڭ تۋماسى بولعاندىقتان, ءارى انام وسى وڭىردە تۇراتىندىقتان, بۇل جوبا مەن ءۇشىن بيزنەس ەمەس, الەۋمەتتىك جاۋاپكەرشىلىك تۇرعىسىنان ماڭىزدى بولدى. ۇيلەر ساۋلەتتىك تۇرعىدان ادەمى, ال ىشكى بولمەلەرى وتباسى مۇشەلەرى ءۇشىن جايلى بولۋى ەسكەرىلدى», دەيدى كاسىپكەر.
وبلىس اكىمدىگىنەن ءمالىم ەتكەندەي, الداعى ۋاقىتتا جالاۋلى اۋىلىنا تاسقىن سۋ قاۋىپ توندىرمەۋى ءۇشىن سالىنىپ جاتقان ارقايسىسى 200 مىڭ تەكشە مەتر بولاتىن ءۇش قازانشۇڭقىردىڭ قۇرىلىسى اياقتالىپ قالعان. اۋىل تۇرعىندارى مەن ءتورت ت ۇلىككە قاۋىپسىز بولۋى ءۇشىن جاساندى سۋ قويمالارىنىڭ اينالاسى قورشالماق. نىساندار شىلدە ايىنىڭ سوڭىندا تولىق اياقتالادى دەپ كۇتىلىپ وتىر.
پاۆلودار وبلىسى,
اقتوعاي اۋدانى,
جالاۋلى اۋلى
