ورتالىق كوممۋنيكاتسيالىق قىزمەتىندە وتكەن ءباسپاسوز ءماسليحاتىندا تۋريزم جانە سپورت ۆيتسە-ءمينيسترى سەرىك جاراسباەۆ جەڭىل اتلەتتەرىمىز جولدامانى ەسەلەي تۇسەتىنىنە سەنىم ءبىلدىردى.
«ليتسەنزيالىق تۋرنيرلەرگە قاتىسقان سپورتشىلارىمىز اراسىندا سەمسەرلەسۋشىلەر مەن وق اتۋ سپورتىنان دوداعا قوسىلاتىن ساڭلاقتارىمىز جوعارى ناتيجەگە جەتتى. جازعى وليمپيا ويىندارىنا العاش رەت ەنگەن برەيكينگ سپورتىنان بىزگە دە 1 ليتسەنزيا بۇيىردى. تەننيس پەن ەركىن كۇرەستەن سپورتشىلار كوزدەگەن جولدامانى تولىققاندى ەنشىلەي المادى, وكىنىشتىسى, اۋىر اتلەتتەرىمىز جولداماسىز قالىپ, جازعى وليمپيا ويىندارىنا قاتىسپايدى. مۇنداي ولقىلىق بۇرىن-سوڭدى بولعان جوق», دەدى سپيكەر.
پاريج جازعى وليمپيا ويىندارىنا باراتىن سپورتشىلارىمىز كيەتىن بىرىڭعاي فورماعا قاتىستى ۆيتسە-مينيستر ەشقانداي كىلتيپان جوق دەپ اتاپ ءوتتى. بىلتىر قىتايدىڭ حانچجوۋ قالاسىندا جالاۋى جەلبىرەگەن جازعى ازيا ويىندارىنا بارعان دەلەگاتسياعا ارنايى تىگىلگەن فورمانىڭ ساپاسىنا قاتىستى از سىن ايتىلعان جوق. ۆيتسە-مينيستر 5 شىلدەدە سپورتتىق فورمانى باق وكىلدەرىنە تانىستىرۋ شاراسى وتەتىنىن, ساپاسى, ديزاينى تۋرالى تالقىلاۋ بولاتىنىن جەتكىزدى.
اۋىر اتلەتتەرىمىزدىڭ الامانعا جولداما ولجالاي الماۋى ءبىزدىڭ رەزەرۆتىڭ الەۋەتى قانشالىقتى ەكەنىن ايقىنداپ بەرگەندەي. بۇل وليمپيا ويىندارىنان كەيىن دە كەزەگى كەلەتىن ءتورت جىلدىق دوداسى بار. 2026 جىلى يتاليانىڭ ميلان مەن كورتينا-د امپەتستسو قالاسىندا وتەتىن قىسقى جانە 2028 جىلى اقش-تىڭ لوس-اندجەلەس قالاسى قابىلدايتىن جازعى وليمپيا ويىندارىنا قوساتىن سپورتشىلارىمىزدىڭ دا الەۋەتىن بۇگىننەن باعامداۋ ماڭىزدى. بۇعان قاتىستى قويىلعان ساۋالعا جاۋابىندا ۆيتسە-مينيستر كەشەندى جۇمىس اتقارىلىپ جاتقانىن جەتكىزدى.
«ەلىمىزدە رەزەرۆتەگى سپورتشىلاردى دايارلاۋعا ارنالعان 510 بالالار مەن جاسوسپىرىمدەر سپورت مەكتەبى بار. ونىڭ ىشىندە وليمپيادالىق سپورت تۇرلەرىنە باسىمدىق بەرىلەدى. سونداي-اق ءار وڭىردە 20-عا جۋىق وليمپيادالىق دايارلاۋ ورتالىعى جۇمىس ىستەپ جاتىر. ونىڭ ەكەۋى جازعى رەسپۋبليكالىق دايارلاۋ ورتالىعى: استانا جانە الماتى قالالارىندا ورنالاسقان.
پاريج وليمپياداسىمەن عانا شەكتەلمەي, بۇگىندە 2028 جىلى لوس-اندجەلەستە, 2032 جىلى بريسبەندە وتەتىن وليمپيادالارعا دا دايىندىق كەشەندى جۇرگىزىلىپ كەلەدى», دەدى تۋريزم جانە سپورت ۆيتسە-ءمينيسترى سەرىك جاراسباەۆ.
قازىرگى ۋاقىتتا ليتسەنزيا جەڭىپ العان بارلىق سپورت ءتۇرىنىڭ ەرەكشەلىگىن, فيزيولوگياسىن جانە قاجەتتىلىكتەرىن ەسكەرە وتىرىپ, جەكە جوسپار بويىنشا دايىندىق پىسىقتالىپ جاتىر. دايارلاۋ جۇمىستارىن جۇيەلى جۇرگىزۋى ءۇشىن 10 سپورت تۇرىنەن 14 شەتەلدىك مامان دا شاقىرىلعان.
«مەملەكەت باسشىسىنىڭ تاپسىرماسى بويىنشا سپورت سالاسىنداعى باسقارۋ ينستيتۋتتارى اراسىندا ءتيىمدى كوممۋنيكاتسيالاردى ۇيلەستىرەتىن جانە قامتاماسىز ەتەتىن شتاب قۇرىلدى. سپورتتى دامىتۋ ديرەكتسياسى, تۋريزم جانە سپورت يندۋسترياسىن قولداۋ قورى تاراپىنان سپورتشىلاردى ساپالى دايارلاۋ ءۇشىن بارلىق مۇمكىندىك جاسالىپ وتىر. اسىرەسە مەديتسينالىق, فارماكولوگيالىق قۇرالدارمەن جانە سپورتتىق تاماقتانۋمەن قامتاماسىز ەتۋ جولعا قويىلدى», دەدى سەرىك جاراسباەۆ ءباسپاسوز ءماسليحاتىندا.
فرانتسياعا اتتاناتىن دەلەگاتسيا قۇرامىندا 118 ادام بار. باق وكىلدەرى, دارىگەرلەر, جاتتىقتىرۋشىلار, سپورتشىلار سىندى دەلەگاتسيا مۇشەلەرى اككرەديتتەۋدەن ءوتىپ, شەنگەن ۆيزاسىن الدى. سپورتشىلاردىڭ اراسىنان الدىمەن ەسكەك ەسۋشىلەر اتتانادى. ولار جاتتىعۋ جيىنىن فرانتسيانىڭ گراۆلين قالاسىندا وتكىزىپ, بىردەن پاريجگە ۇشادى. 22 شىلدەدە استانادان 4 كوماندا, الماتىدان 10 كوماندا, سونداي-اق ەۋروپادا جيىندا جۇرگەن جانە جارىسقا قاتىسىپ جۇرگەن 13 كوماندا وليمپياداعا جول تارتپاق.
سەرىك جاراسباەۆ پاريج جازعى وليمپيا ويىندارىندا مەدال ولجالايدى دەپ ءۇمىت ارتقان سپورتشىلار اراسىنان 54 سپورتشىعا باسا ەكپىن بەرىلىپ, دايىندىقتارىنا ايرىقشا كوڭىل ءبولىنىپ وتىرعانىن اتاپ ءوتتى. «ولار جوعارى ناتيجەمەن ورالادى دەپ ءۇمىت ەتەمىز. سوندىقتان دا كەشەندى جاتتىعۋى ءۇشىن عىلىمي توپ جۇمىس ىستەپ وتىر. مەديتسينالىق تەكسەرۋدەن وتكىزۋ, فارماكولوگيالىق قاجەتتىلىكپەن قامتاماسىز ەتۋ, تاماقتانۋىنا دەيىن جۇيەلى جۇزەگە اسىرىلادى», دەدى سپيكەر. ءار سپورتشىنىڭ جەكە دايىندىعىن باس باپكەر عانا ەمەس, فەدەراتسيا باسشىلىعى دا باقىلاۋعا الىپ, ءجىتى قاداعالاپ وتىرعانىن جەتكىزدى.
پاريج وليمپياداسىنىڭ سالتاناتتى اشىلۋ راسىمىندە ەلىمىزدىڭ دەلەگاتسياسىن باستاپ, تۋ ۇستاپ شىعۋشىلار دا بەلگىلى. بوكستان الەم چەمپيونى, ۇلتتىق قۇرامانىڭ كاپيتانى اسلانبەك شىمبەرگەنوۆ پەن جەڭىل اتلەت ولگا سافرونوۆاعا كوك تۋىمىزدى كوتەرىپ شىعۋ جۇكتەلمەك. رەزەرۆتە گرەك-ريم كۇرەسىنىڭ بالۋانى نۇرسۇلتان تۇرسىنوۆ پەن سەمسەرلەسۋشى ايگەرىم سارىباي دا تۇر.
