فوتو: madeniportal.kz
اناسىمەن بىرگە قىرعىزستانعا تۋىستارىنا بارعان 19,16, 11, 8 جاستاعى ەكى قىز, ەكى ۇل بالا تاسقىن سۋ سالدارىنان قازا بولدى. كورشى ەلدىڭ اپشىر-اتا اۋىلىنان دەمالىس ايماعىنداعى سۋقويماعا تىنىعۋعا بارا جاتقان جولدا تاسقىنعا تاپ بولىپ قازاعا ۇشىراعان مارقۇمداردىڭ دەنەسى ەلگە توتەنشە جاعدايلار مينيسترلىگىنىڭ ۇشاعىمەن جەتكىزىلىپ, مارقۇمداردى جەرلەۋ ءراسىمى ءوتتى.
قىرعىزستاننىڭ توتەنشە جاعدايلار مينيسترلىگى, تاۋلى وڭىردە جاۋىن ءالى دە تولاستامايتىنىن, سەل ءجۇرۋ قاۋپى جوعارى ەكەنىن ەسكەرتىپ, جەرگىلىكتى تۇرعىندار مەن تۋريستەرگە قاۋىپسىزدىك ەرەجەسىن قاتاڭ ۇستانۋعا ۇندەدى.
قىرعىزستاننىڭ وش وبلىسىندا 28 ماۋسىمدا بەسىن اۋا باستالعان جاڭبىردان وننان استام ادام مەرت بولدى. وسى ەلدىڭ توتەنشە جاعدايلار مينيسترلىگى ناۋقات اۋدانىندا توتەنشە جاعداي رەجىمى جاريالانىپ, ابشىر-ساي دەمالىس ايماعىنان 1300-دەن اسا ادامنىڭ قاۋىپسىز ايماققا كوشىرىلگەنىن, كەزارت جايلاۋىندا قالعان 10 ادامدى دا قاۋىپسىز ورىنعا كوشىرۋ جۇمىسى جۇزەگە اسىرىلعانىن حابارلادى.
ەلىمىزدىڭ سىرتقى ىستەر مينيسترلىگى قىرعىزستاننىڭ سىرتقى ىستەر مينيسترلىگىمەن تىعىز بايلانىس ورناتىپ, جاعدايدى ءجىتى قاداعالاپ وتىر. ەلىمىزدەن اتتانعان قۇتقارۋشىلار, مەديتسينا قىزمەتكەرلەرى, پسيحولوگتەر دە كورشى ەل ازاماتتارىنا كومەك كورسەتىپ جاتىر. وش وبلىسىنداعى توتەنشە جاعدايعا تاپ بولعان حالىققا قازاقستاننان العاشقى گۋمانيتارلىق كومەك تە جەتكىزىلدى.
