كورسەتىلىمدەرگە قىتاي مەدياكورپوراتسياسىنىڭ 10-نان استام باعدارلاماسى مەن دەرەكتى ءفيلمى ىرىكتەپ الىنعان. جوبانىڭ ماقساتى – قازاقستان كورەرمەندەرىن قىتايدىڭ قازىرگى دامۋ بارىسىمەن تانىستىرۋ, ەكى ەل حالىقتارى اراسىنداعى ءوزارا تۇسىنىستىك پەن دوستىقتى بەكەمدەي ءتۇسۋ, ءوزارا ءتيىمدى ىنتىماقتاستىقتىڭ كەمەل كەلەشەگىن پاش ەتۋ.
جوبانى ۇيىمداستىرۋشى «قازاقستان رەسپۋبليكاسى پرەزيدەنتىنىڭ تەلەراديوكەشەنى» كەاق باس ديرەكتورى راۋشان قاجىباەۆا اتالعان ءىس-شاراعا قاتىستى تۇسىنىك بەرە كەلىپ, قىتايدىڭ «ناعىز دوس – ومىرلىك بايلىعىڭ» دەگەن ماقالىن مىسالعا كەلتىردى. ول قازاقستان رەسپۋبليكاسى پرەزيدەنتىنىڭ تەلەراديوكەشەنى مەن قىتاي مەدياكورپوراتسياسىنىڭ ىنتىماقتاستىعى ەكى ەل اراسىنداعى دوستىقتىڭ نىعايۋىنا وڭ ىقپال ەتەتىنىنە, ال قىتاي مەدياكورپوراتسياسىنىڭ باعدارلامالارى قازاقستان كورەرمەندەرىنە جاقسى پىكىر قالىپتاستىراتىنىنا سەنىم ءبىلدىردى.
جوبا قازاقستان قوعامىنىڭ ءتۇرلى توپتارى تاراپىنان جوعارى باعا الدى. جۋرناليست گۇلجان رامانقۇلوۆا كەيىنگى جىلدارى ەكى ەل ءتۇرلى سالادا تىعىز بايلانىس ورناتقانىن, ال قىتاي مەدياكورپوراتسياسىنىڭ باعدارلامالارىن كورسەتۋ قحر مەن قازاقستان حالىقتارى اراسىنداعى ءوزارا تۇسىنىستىكتى كۇشەيتىپ, ولاردى جاقىنداستىرۋعا مۇمكىندىك بەرەتىنىن اتاپ ءوتتى. استانا تۇرعىنى سايدا سەگىزباەۆا قىتايدىڭ ء«بىر بەلدەۋ – ءبىر جول» باستاماسىنا ارنالعان دەرەكتى فيلمنەن العان اسەرىمەن ءبولىستى. ونىڭ پىكىرىنشە, بۇل – جۇرەكتەرگە ىزگىلىك نۇرىن سەبەتىن شىن مانىندەگى اسا اۋقىمدى باستاما, ال فيلم جوبانىڭ بارلىق باعىتتا – ەكونوميكالىق, ساياسي, الەۋمەتتىك باعىتتا قانشالىقتى تابىستى جۇزەگە اسىرىلىپ جاتقانىنان حابار بەرەدى ءارى حالىقتارىمىز بەن مادەنيەتتەرىمىزدى جاقىنداستىرا تۇسەدى. سونداي-اق كورەرمەندەر تەلەباعدارلامالاردى ءبىر جاعىنان قىتايدىڭ وزىنە كوزقاراسى, ەكىنشى جاعىنان ولاردى كورەتىندەرمەن ۇنقاتىسۋ سياقتى قاراستىرۋعا بولاتىنىن اتاپ ءوتتى. سوندىقتان ولار قىتاي مەن قازاقستان حالىقتارىنىڭ ءبىر-ءبىرىن جاقسىراق بىلۋىنە جاردەمدەسەتىن ەكى جاققا دا قاراپ اشىلعان وزىندىك ءبىر تەرەزە بولىپ تابىلادى.
كورسەتىلىمدەر 30 ماۋسىمدا باستالىپ, 6 شىلدەگە دەيىن سوزىلادى. وسى ۋاقىت ارالىعىندا قازاقستان باق-تارى وزدەرىنىڭ كورەرمەندەرىنە قىتاي مەدياكورپوراتسياسىنىڭ بىرقاتار تەلەباعدارلاماسى مەن دەرەكتى ءفيلمىن ۇسىنادى. ولاردىڭ اراسىندا «سي تسزينپينمەن كەزدەسۋلەر», «جىبەك جولىنىڭ سيمفونياسى», «دۋنحۋانعا دەگەن ماحاببات», «تيان-شان تاۋلارىنىڭ ارعى بەتىندە», «عاجايىپ ساياحات» سەكىلدى قىتاي مادەنيەتىنىڭ جارقىن بوياۋىنا سۋارىلىپ, قاشاندا جالپىادامزاتتىق قۇندىلىقتار رۋحى مەنمۇندالاپ تۇراتىن تۋىندىلار بار. قىتاي مەدياكورپوراتسياسى اتالعان ءىس-شارانىڭ ناتيجەسىندە قازاقستان باق-تارىنداعى ارىپتەستەرىمەن پراگماتيكالىق ىنتىمىقتاستىعى بۇرىنعىدان دا كەڭەيەدى, سونداي-اق قىتاي-قازاقستان بايلانىستارىنىڭ جاڭا «التىن وتىز جىلدىعىن» قۇرۋ جولىنداعى بىرلەسكەن كۇش-جىگەرى ءارى قاراي دا جالعاسادى دەپ ۇمىتتەنەدى.
