ول الەمدەگى ەڭ قارت جۋرناليست اتانعان. يزرايلدە تۇرادى. ۋولتەر ەكىنشى دۇنيەجۇزىلىك سوعىستىڭ باسى-قاسىندا جۇرگەن, حولوكوست ازابىن كورگەن. جاسى مەن دەنساۋلىعىنا قاراماستان ول ەۆرەي ەلىندەگى ۇلتتىق راديودا اپتالىق حابار جۇرگىزەدى. ۋولتەر دۇنيە جۇزىندەگى ەڭ قارت جۋرناليست جانە ەڭ ەجەلگى راديوشوۋ جۇرگىزۋشىسى رەتىندە گيننەستىڭ رەكوردتار كىتابىنا 2 رەت ەنگەن. «قول قۋسىرىپ وتىرمايمىن. ءبىر ءىستى اياقتاعان بەتتە بىردەن ەكىنشىسىنە كىرىسەمىن. ءالى كۇنگە دەيىن 2 راديوستانسادا 2 ءتۇرلى پودكاست جۇرگىزەمىن. ءوز ستۋديام بار. بۇدان بولەك گازەت-جۋرنالدارعا ۇنەمى ماقالا جازامىن», دەيدى ول.
توعىز جاستاعى تاۋەلسىز ءتىلشى
لاما ءابۋ جامۋستىڭ جاسى توعىزدا. ول وقيعا ورنىنان, ءتىپتى قاقتىعىس الاڭىنان حابار تاراتادى.
الەمدەگى ەڭ جاس جۋرناليست گازا سەكتورىندا تۇرادى. يزرايل اسكەرى مەن حاماس اراسىنداعى قاقتىعىس باستالعاندا ونىڭ وتباسى گازا قالاسىنان رافاحتاعى بوسقىندار لاگەرىنە كوشكەن. ول قازىر گازا سەكتورىنداعى جاعداي مەن پالەستينالىقتاردىڭ اۋىر تۇرمىسىن كۇندە جاريالايدى. ينستاگرامىنا جازىلعان ادامدار سانى – 900 مىڭعا جۋىق. سىرتتان قاراعاندا, تاۋەلسىز جۋرناليست دەرسىڭ. «مەن جۋرناليستيكانى جاقسى كورەمىن. ماعان كامەراعا قاراپ سويلەگەن, ادامدارمەن تىلدەسكەن ۇنايدى. تەزىرەك بەيبىتشىلىك ورناسا ەكەن! ءۇيىمىز بەن مەكتەبىمىزگە ورالىپ, الاڭسىز ويناعىمىز كەلەدى», دەيدى ول.
الەمدە قانشا جۋرناليست بار؟
جۋرناليست قوعاممەن تىنىستايدى. حالىق پەن اقپاراتتىڭ التىن كوپىرىنە اينالعاندار سانى كىم-كىمگە دە قىزىق شىعار.
نەگىزى بەلگىلى ءبىر دۇنيەنىڭ ناقتى سانىن ايتۋ قيىن ءىس. دەسە دە زەرتتەۋشىلەر جوبالاپ كورىپتى. «جۋرناليستەردىڭ حالىقارالىق فەدەراتسياسىندا» قىزىق اقپارات بار ەكەن. دۇنيە ءجۇزىنىڭ 146 ەلىندە 600 مىڭنان استام مەديا قىزمەتكەرى جۇمىس ىستەيدى. كەيبىر دەرەك بويىنشا, ولاردىڭ 57 پايىزى – ەر ادامدار. الەمدەگى جۋرناليستەردىڭ 50 پايىزى گازەت-جۋرنالدا, 23 پايىزى تەلەارنادا, 17 پايىزى راديودا جانە 16 پايىزى ونلاين سالادا ەكەن.
