شپاگامەن سەمسەرلەسۋدە ەلىمىزدىڭ ەرلەر قۇراماسى ازيا چەمپيوناتىنداعى قارسىلاستارىن ايقىن ەڭسەردى. ءتىپتى فينالدىق تارتىستا 2021 جىلى وتكەن توكيو جازعى وليمپيدا ويىندارىنىڭ چەمپيونى جاپونيا قۇراماسىن ايقىن ۇتتى. ال ىرىكتەۋ سىنىندا قاتار, قىرعىزستان, گونكونگ قۇراماسىن ىعىستىردى. وسىلايشا, ەرلىك سەرتاي, ەلمير ءالىمجانوۆ, رۋسلان قۇربانوۆ, ۆاديم شارلايموۆ تورتتىگى قۇرلىقتا قارا ءۇزدى. شىلدە ايىنىڭ سوڭىن الا تۇلىگى ءتۇرىلىپ, جالاۋى جەلبىرەيتىن ءحححىىى پاريج جازعى وليمپيادا ويىندارىندا وسى جىگىتتەر ەل سەنىمىن اقتاۋ ءۇشىن بارىن سالادى.
مەملەكەتتىك جاتتىقتىرۋشى تيمۋر بايتاسوۆ ەلىمىزدىڭ كومانداسى 2015 جىلدان بەرى ازيا قۇرلىعىندا جەڭىس تۇعىرىنا كوتەرىلە الماي كەلگەنىن ايتتى. «جىگىتتەردىڭ جەڭىسى وراسان تابىس دەپ ماقتاۋعا تۇرارلىق. سەبەبى ولار فينالدا الەمدىك رەيتينگتەگى كوشباسشى كوماندانىڭ ءبىرى, جازعى وليمپيادا ويىندارىنىڭ چەمپيونى, الەم چەمپيونى جاپونيا قۇراماسىن جەڭدى. توعىز جىلدىڭ ىشىندە ءبىزدىڭ جىگىتتەر ازيا چەمپيوناتىنىڭ فينالىنا دەيىن ءۇش رەت جەتىپ, كۇمىس مەدالدى مىسە تۇتتى, بەس مارتە قولا جۇلدەگەر اتاندى. كوماندالىق رۋحتى جانىپ, ەرىك-جىگەردى قامشىلاعان شاكىرتتەرىمىز جاپون سپورتشىلارىنىڭ ايبارىنان ىققان جوق», دەدى تيمۋر بايتاسوۆ.
قازاقستان قۇراماسى ازيا چەمپيوناتىنداعى جەڭىسىنەن كەيىن الەمدىك رەيتينگتە ءتورتىنشى ساتىعا كوتەرىلدى. ۇلتتىق قۇراما مۇشەلەرىنىڭ ەندىگى مەجەسى – پاريج جازعى وليمپياداسىنىڭ مەدالى.
