بايزاق اۋدانىنا قاراستى مىرزاتاي اۋىلدىق وكرۋگىندەگى قاڭقاسى عانا قالعان فابريكانى ساتىپ العان كەزدە فاريدا جۇنىسوۆاعا «توز-توزى شىققان فابريكانى قانداي ماقساتقا پايدالانباقشى؟» دەپ تاڭىرقاي قاراعاندار از بولعان جوق. الايدا تاۋەكەلگە بەل بايلاعان كاسىپكەردىڭ ءوز جوسپارى بار بولاتىن.
ىسكەر ازامات ماقساتقا جەتۋ جولىندا مۇمكىن بولعان بارلىق قادامعا باردى. قيراعان كاسىپورىندى قايتا قالپىنا كەلتىرىپ, فابريكانىڭ جۇمىسىن جۇيەلەۋ جولىندا بار كۇشىن سارقا جۇمسادى. شۇمەكتەپ توككەن تەر تەككە كەتكەن جوق. باستىسى دا سول ەمەس پە؟ بيزنەسكە بەت بۇرعان فاريدا «اگرارلىق نەسيە كورپوراتسياسىنان» جەڭىلدەتىلگەن نەسيە الىپ, جۇمىستى جانداندىرۋعا بىلەك سىبانا كىرىستى.
«اۋليە-اتا فەنيكس» 2016 جىلى قايتا ەڭسە تىكتەدى. كاسىپورىن جۇمىسىن شيراتۋدى ماقسات تۇتقان باسشى جولاي كەزىككەن كەدەرگىلەرگە سىنعان جوق. قايتا بارلىق قيىندىقتى ەڭسەرۋ ارقىلى ەرىك-جىگەرىنىڭ مىقتى ەكەنىن بايقاتتى. كاسىپورىن باسشىسى فابريكانى زاماناۋي تەحنيكامەن جابدىقتاۋعا ايرىقشا نازار اۋداردى.
ء«بىز «اگروەكسپورت» باعدارلاماسىنىڭ شاراپاتىن ءبىر كىسىدەي كوردىك. 2018 جىلى سول باعدارلاما ارقىلى 658 ملن تەڭگە نەسيە راسىمدەگەن بولاتىنبىز. ناتيجەسىندە, نيدەرلاندىدان قۇس وسىرۋگە قاجەت دەگەن بارلىق زاماناۋي قۇرال-جابدىق پەن اۋىل شارۋاشىلىعى تەحنيكاسىن اكەلدىك. ءسويتىپ, فابريكانىڭ جۇمىسىن جانداندىردىق. اتقارىلعان جۇمىستىڭ ارقاسىندا ءوندىرىس قۋاتى ۇلعايدى. اۋەلى جىلىنا 5 مىڭ توننا شاماسىندا قۇس ەتىن وندىرگەن بولساق, تەحنيكانى جاڭارتقاننان كەيىن كورسەتكىشتى 7 مىڭ تونناعا دەيىن جەتكىزدىك. وسىلايشا, جاڭا بەلەستەردى باعىندىرۋعا دەن قويا باستادىق», دەيدى «اۋليە-اتا فەنيكس» جشس ديرەكتورىنىڭ كومەكشىسى ءىلياس دۇيسەن.
ول كەلتىرگەن دەرەككە جۇگىنسەك, كاسىپورىننىڭ اۋماعى 536 گەكتار جەردى قۇرايدى. 18 قۇس قوراسىندا ەڭبەك ەتەتىن جۇمىسشىلاردىڭ كۇشىمەن قىرىققا جۋىق ءونىم شىعارىلىپ جاتىر. فابريكا قىزمەتكەرلەرى بالاپاندارعا بيداي مەن جۇگەرى بەرىپ باعىپ وتىر. سالماعىن 2 كيلودان اسىرۋعا بولمايدى. ويتكەنى حالىقارالىق ستاندارتقا باعىنۋ كەرەك. ال كورشىلەس قىرعىز رەسپۋبليكاسى مەن رەسەيگە ەكسپورتقا شىعارىلاتىن ءونىم جالپى ءونىمنىڭ بەس پايىزىن قۇرايدى ەكەن.
فابريكانىڭ ءونىم وندىرۋدەگى الەۋەتى جىل وتكەن سايىن ارتا ءتۇستى. مۇنىڭ بارلىعى ءار جىلعا ارنالعان ناقتى ستراتەگيالىق جوسپاردىڭ دەر كەزىندە ىسكە اسۋىنىڭ ارقاسىندا مۇمكىن بولعانى تالاس تۋدىرمايدى. ماسەلەن, 2017 جىلى 4 200 توننا تاۋىق ەتىنەن ءتۇرلى ءونىم شىعارىلسا, بۇل كورسەتكىش 2022 جىلى 7 040 تونناعا جەتتى. سونداي-اق 300 تونناعا جۋىق ەتسۇيەك ۇنى شىعارىلدى.
«2017 جىلى ەكى ەلگە جونەلتىلگەن ءونىم بار بولعانى 52 توننا بولسا, 2018 جىلى 172 تونناعا جەتتى. بۇل كورسەتكىش 2023 جىلى 463 تونناعا ارتقانىن ايتا كەتكەن ءلازىم. ايتسە دە فابريكا باسشىلىعى ءبىرىنشى كەزەكتە جەرگىلىكتى نارىقتى قامتۋعا دەن قويىپ وتىر. مەملەكەتتىك دەڭگەيدەگى قولداۋدىڭ ارقاسىندا كاسىپورىن جۇمىسى جىل وتكەن سايىن جاندانىپ كەلەدى. قازىر قۇس فابريكاسىندا 247 ازامات ەڭبەك ەتىپ ءجۇر. ولاردىڭ دەنى جەرگىلىكتى تۇرعىندار. كاسىپورىن قىزمەتشىلەرى جالاقىسىن دەر كەزىندە الادى. ون ءۇشىنشى جالاقى دا قاراستىرىلعان. ورتاشا ەڭبەكاقى – شامامەن 149 مىڭ تەڭگە», دەيدى فابريكا ديرەكتورىنىڭ كەمەكشىسى ءى.دۇيسەن.
قۇس فابريكاسى 2023 جىلى قۇس ءوسىرۋ قوراسىنىڭ سانىن 24-كە جەتكىزۋ ءۇشىن «اگرارلىق نەسيە كورپوراتسياسىنان» 1 ملرد تەڭگەدەن استام نەسيە الۋعا ءوتىنىم ءبىلدىردى. كورپوراتسيا بۇل ءوتىنىمدى ماقۇلداعان. «اۋليە-اتا فەنيكس» باسشىلارى وسى جىلى قوسىمشا 6 قۇس ءوسىرۋ قوراسى قۇرىلىسىن باستاۋدى جوسپارلاپ وتىر.
الەۋەتتى كاسىپورىننان جەرگىلىكتى قازىناعا دا كوپ-كورىم سالىق تۇسەدى. ماسەلەن, «اۋليە-اتا فەنيكس» قۇس فابريكاسى 2019 جىلى جەرگىلىكتى بيۋدجەتكە 280,2 ملن سالىق تولەسە, كورسەتكىش 2023 جىلى 481,73 ملن تەڭگەگە دەيىن جەتكەن. ەندى قوسىمشا تاعى 6 قۇس ءوسىرۋ قوراسى سالىنىپ, ءوندىرىس قۋاتى 12 مىڭ تونناعا ارتسا, قازىناعا تۇسەتىن قاراجات تا كوبەيمەك.
جامبىل وبلىسى,
بايزاق اۋدانى
