فوتو: اقوردا
«ەڭ الدىمەن, بارشاڭىزدى بۇقارالىق اقپارات قۇرالدارىنىڭ قىزمەتكەرلەرى كۇنىمەن شىن جۇرەكتەن قۇتتىقتايمىن! جۋرناليست – مارتەبەلى ماماندىق. ول – اقيقات ءسوزدىڭ, وتكىر وي مەن شىنايى پىكىردىڭ جانە ءادىل ءىستىڭ جاقتاۋشىسى. سوندىقتان ءبىز مەديا سالاسىنىڭ ماماندارىنا ءاردايىم زور قۇرمەتپەن قارايمىز», دەدى پرەزيدەنت.
مەملەكەت باسشىسى تۇپتەپ كەلگەندە, مەملەكەت تە, جۋرناليست تە ۇلت ءۇشىن قىزمەت ەتەتىنىن, ەل تاعدىرىن شەشۋگە اتسالىساتىنىن اتاپ ءوتتى. بۇگىندە ۇلت ءباسپاسوزى مەن ۇلت مۇددەسى قاي كەزدە دە وزەكتەس بولعانىن, قازىر دە سولاي ەكەنىن تىلگە تيەك ەتتى.
ء«بىزدىڭ ماقسات-مۇراتىمىز – ورتاق. بۇل – بارشاعا تەڭ مۇمكىندىكتەر بەرەتىن ادىلەتتى قازاقستاندى قۇرۋ. مەن بۇگىن مەديا سالاسى ماماندارىنىڭ وسى جولداعى قاجىرلى ەڭبەكتەرى ءۇشىن شىنايى ريزاشىلىعىمدى بىلدىرەمىن. ءاليحان بوكەيحان «گازەت-جۋرنال شىعارۋعا زور شەبەرلىك كەرەك» دەپ تالاپ قويعان. بۇل – بۇكىل اقپارات سالاسىنا ورتاق تۇجىرىم. جالپى, جۋرناليستەر مەملەكەتتىك ساياساتتى حالىققا ءتۇسىندىرۋ ىسىندە ايرىقشا ءرول اتقارادى», دەدى قاسىم-جومارت توقاەۆ.
