بۇل ستۋدەنتتەردىڭ كوپشىلىگى وندىرىستىك تاجىريبەنى «Egemen Qazaqstan» گازەتىنىڭ رەداكتسياسىندا وتكەن بولاتىن. «قازاق گازەتتەرى» جشس باس ديرەكتورىنىڭ ورىنباسارى قامبار احمەت جۋىردا قابىلدانعان «ماسس-مەديا تۋرالى» زاڭنىڭ ارتىقشىلىعى مەن مەديا ورىستەگى جاڭاشىلدىق تۋرالى ءسوز قوزعادى. «Egemen Qazaqstan» گازەتىنىڭ باس رەداكتورى عابيت مۇسىرەپ قازاق جۋرناليستيكاسىنىڭ قارا شاڭىراعى سانالاتىن ۇجىمدا جاس جۋرناليستەر تاجىريبەدەن وتكەندە شىڭدالىپ قانا قويماي, وزىندىك جازۋ ماشىعىن قالىپتاستىرىپ تانىلۋىنا دا مۇمكىندىك زور ەكەنىن ايتتى. «جۋرناليستيكا ورىسىندە وزىندىك ءداستۇرى, سونى سوقپاعى بار ستيحياسى وزگەشە ۇجىمنان جاستاردىڭ ۇيرەنەرى مول. جازۋ ونەرى بويىنا دارىعان جاس ءجۋرناليستى تەلەارناعا, جۋرناليستيكانىڭ قاي سالاسىنا سالساڭ دا, كىبىرتىكتەمەيدى, ال تەلەارناداعى قىزمەتكەردىڭ كەيبىرى گازەتكە ماقالا جازۋدا ويى شاشىراپ, شاتقاياقتاپ قالاتىنى بەلگىلى. گازەت ۇستاحاناسىنىڭ ۇستىنى قانشالىقتى سالماقتى ەكەنىن وسىدان دا اڭعارۋعا بولادى», دەدى ع.مۇسىرەپ.
باس رەداكتوردىڭ ورىنباسارى تالعات باتىرحان: «جۋرناليستيكا – قىزىق ماماندىق. ۇنەمى ىزدەنىستە جۇرەسىڭ, اينالاڭنان, ورتاڭنان ۇيرەنەسىڭ. تەك ءوزىڭ قىزمەت ىستەيتىن رەداكتسياداعى قىزمەتكەرلەردىڭ جازۋ ماشىعىن عانا ەمەس, وزگە ۇجىمداعى ارىپتەستەرىڭنىڭ دە تاقىرىپتى قالاي تولعاپ جازعانىن, مالىمەتتى قالاي مايەكتى جەتكىزگەنىن وقىپ تا بىلىگىڭدى شىڭدايسىڭ. ءبىر شارانى جازۋعا بىرنەشە جۋرناليست بارادى, سولاردىڭ ارقايسى اقپاراتتى, بولعان ءىس-شارانى ءوز دەڭگەيىنە ساي جازادى. ءبىرى ەستىمەي قالعان مالىمەتتى, دەرەكتى ەكىنشى جۋرناليست زەردەسىنە ءتۇيىپ اپ اقپاراتىنا قوسۋى مۇمكىن. كوپ وقۋ دا كەرەك, بىراق سول وقىعانىڭدى توقىپ قانا قويماي قاعازعا تۇسىرە ءبىلۋ دە ءسوز ونەرى سانالادى», دەدى.
جاس جۋرناليستەر گازەت رەداكتسياسىندا وتكىزگەن وندىرىستىك تاجىريبە بارىسىندا كوپ جايتتى كوكەيگە تۇيگەنىن ايتتى.
