س توبىنداعى 3-تۋر تارتىسىندا گول سوعىلمادى. دانيا مەن سەربيا قۇرامالارى اراسىنداعى ماتچتى باسىمدىقپەن وتكەرگەن دات فۋتبولشىلارى سەربتەردىڭ قورعانىسىن بۇزا المادى. دوپقا يەلىك ەتۋدە, ستاندارتتى (بۇرىشتاما) شابۋىلداردا دا دانيا قۇراماسى باسىم تۇرعانىمەن, جەڭىستى ج ۇلىپ اكەتە الماي, 0:0 ناتيجەسىن مىسە تۇتتى.
بۇل توپتاعى كەزەكتى ويىن انگليا مەن سلوۆەنيا اراسىندا وربىگەن. ءحارري كەين باستاعان انگليا قۇراماسى گول سوعا المادى. توپتىق كەزەڭنىڭ سوڭعى ماتچىنان ماڭىزدى 1 ۇپايدى ەنشىلەگەن سلوۆەنيا قۇراماسى دا تاريحي قادام جاسادى. بۇل توپتان انگليا قۇراماسى 5 ۇپاي جيناپ كوش باسىنا شىقسا, دانيا قۇراماسى 3 ۇپايمەن پلەي-وفف كەزەڭىنە ءوتتى. 3 ۇپاي ەنشىلەگەن سلوۆەنيا قۇراماسى دا توپتان شىعىپ وتىر. دانيا مەن سلوۆەنيا قۇرامالارى توپتىق كەزەڭدە وتكىزگەن ءۇش ماتچتا جەڭىلگەن دە, جەڭگەن دە جوق, تەڭ تارقاسىپ, ءار ويىننان 1 ۇپاي ولجالاۋمەن-اق پلەي-وففقا ءوتىپ الدى.
ەۋروپا چەمپيوناتىنىڭ فينالدىق كەزەڭىنە وسىمەن ەكىنشى رەت ات بايلاعان سلوۆەنيا توپتىق كەزەڭگە العاش رەت شىعىپ وتىر. 2018 جىلدان بەرى سلوۆەنيا ۇلتتىق قۇراماسىن باپتاپ كەلە جاتقان ماتياج كەك تاريحي ناتيجەنى ەنشىسىنە جازعانىنا قۋانىشتى ەكەنىن اڭعارتتى. «جىگىتتەرگە ءسوز جوق, كەرەمەت ويىن ورنەگىن كورسەتتى. سلوۆەنيا شاعىن عانا مەملەكەت بولسا دا, سپورتتا, اسىرەسە فۋتبولدا الپاۋىت ەكەنىمىزدى تاعى ءبىر كورسەتتىك. قۇرامانىڭ توپتىق كەزەڭنەن وتەتىنىنە سەنىم ارتقانداردىڭ قاتارى تىم سەلدىر ەدى, ءبىز ولاردىڭ كۇمانىن كۇل تالقان ەتتىك. جىگىتتەر ەۋروپا چەمپيوناتىنا تەككە كەلمەگەنىن دالەلدەدى. شاكىرتتەرىم تارتىستى ويىنى ارقىلى سلوۆەنيا فۋتبولىنىڭ كەلەشەگى قانداي ەكەنىن ايقىنداي ءتۇستى», دەدى ماتياج كەك.
D توبىنداعى سوڭعى ويىندا فرانتسيا مەن پولشا قۇرامالارى كەزدەستى. توپتىق كەزەڭدەگى ەكى ماتچتا جەڭىلىس تاۋىپ, ەۋروپا چەمپيوناتىن ەرتە اياقتاعان پولياك فۋتبولشىلارىنىڭ فرانتسيا قۇراماسىمەن تەڭ ويناۋى (1:1) ءبىراز جايتتى اڭعارتقانداي. كيليان مباپپەنىڭ 56-مينۋتتا پەنالتيدەن سوققان گولىنا 79-مينۋتتا روبەرت لەۆاندوۆسكي پەنالتيدەن گول توعىتۋ ارقىلى قارىمتا قايتارىپ, ماڭىزدى 1 ۇپاي ەنشىلەگەنىمەن, 2008 جىلدان بەرى ەۋروپا چەمپيوناتىنىڭ فينالدىق كەزەڭىنە تۇراقتى قاتىسىپ كەلە جاتقان پولشا قۇراماسى ەلىنە قايتتى. ءوزىنىڭ سوڭعى ەۋروپا چەمپيوناتىنا قاتىسقان روبەرت لەۆاندوۆسكي قۇرامانىڭ وسكەندىگىن, ازۋلى فرانتسيا فۋتبولشىلارىمەن تەڭ ويىن كورسەتكەنىنە كوڭىلى تولاتىنىن جەتكىزدى. ء«بىز قانداي تاڭداۋلى قۇراماعا قارسى ويناساق تا اتاعىنان ىقپايتىنىمىزدى كورسەتتىك, جىگىتتەر مىنەز تانىتىپ وينادى. وسى تەڭ ناتيجەنى باعالاي ءبىلۋىمىز كەرەك», دەدى پولشا قۇراماسىنىڭ كاپيتانى.
بۇل توپتان اۋستريا ۇلتتىق قۇراماسى كوش باستاپ پلەي-وفف كەزەڭىنە ءوتتى. 3-تۋر ماتچىندا نيدەرلاند قۇراماسىنا قارسى الاڭعا شىعىپ, 2:3 ەسەبىمەن ەڭسەرىپ كەتتى. 6-مينۋتتا دونيەلل مالەن اۆتوگول سوعىپ, اۋستريالىقتار العا شىقتى. 47-مينۋتتا كودي گاكپو ناتيجەنى تەڭەستىرگەن. 59-مينۋتتا رومانو شميد ەنشىسىنە گول جازىپ, قۇراماسىن العا شىعارعان. تاجىريبەلى مەمفيس دەپاي 75-مينۋتتا كومانداسىن جەڭىلىستەن قۇتقارعانىمەن, 80-مينۋتتا مارسەل زابيتتسەر جەڭىس گولىن سوقتى. 2008 جىلدان بەرى ەۋروپا چەمپيوناتىنىڭ فينالدىق كەزەڭىنە ءتورت رەت قاتىسقان اۋستريا ۇلتتىق قۇراماسى ءتورت جىل بۇرىن قۇرلىق دوداسىنىڭ 8/1 فينالىنا دەيىن جەتكەن بولاتىن.
سەلفيدىڭ سالقىنى: ۋەفا كۇزەتتى كۇشەيتپەك
ۋەفا گەرمانيادا ءوتىپ جاتقان ەۋروپا چەمپيوناتىندا ءتارتىپتى كۇشەيتۋدى مىقتاپ قولعا الدى. وعان پورتۋگاليا, تۇركيا اراسىنداعى تارتىس سەبەپ بولىپ وتىر. مۇنىڭ الدىندا گرۋزيا مەن تۇركيا جانكۇيەرلەرىنىڭ جاعا جىرتىسىنا اسا الاڭداي قويماعان ەۋروپا فۋتبول اسسوتسياتسياسى وداعى (ۋەفا) ايگىلى رونالدۋمەن سۋرەتكە تۇسۋگە ۇمتىلعان جانكۇيەرلەردىڭ ارەكەتىنەن كەيىن عانا قوزعالدى. تۇركيا مەن پورتۋگاليا قۇرامالارى اراسىنداعى تارتىستا الاڭعا ءبىر ەمەس, التى جانكۇيەر جۇگىرىپ شىعىپ, رونالدۋمەن سۋرەتكە تۇسۋگە ۇمتىلعان ەدى. ماتچتىڭ مازاسىن قاشىرىپ, شىرقىن بۇزعان كەلەڭسىزدىكتەن كەيىن قاۋىپسىزدىك شاراسى كۇشەيتىلەتىن بولدى. ۋەفا باسشىلىعى فۋتبولشىلاردىڭ ستاديوندا, الاڭدا عانا ەمەس, كيىم اۋىستىراتىن بولمەدە دە قاۋىپسىزدىگى زور جاۋاپكەرشىلىك جۇكتەيتىنىن جەتكىزدى. 2016 جىلى ەۋروپا چەمپيونى اتانعان پورتۋگاليا قۇراماسىنىڭ بيىلعى قۇرلىق دوداسىنداعى ماتچى گەرمانيانىڭ قاۋىپسىزدىككە جاۋاپتى قىزمەتكەرلەرىنە قوسىمشا جۇمىس تاۋىپ بەردى.
