تۋرنيرگە اقاڭمەن ۇزەڭگىلەس جۇرگەن تاريحشى-عالىم قويشىعارا سالعارا ۇلى, جازۋشى تولەن ابدىك پەن كەيىنگى ءىزىن باسقان قالامگەر ىنىلەرى, شاكىرتتەرى مەن جۋرناليستەر قاتىستى.
ءتۋرنيردى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ اشتى. سونىمەن قاتار تاريحشى-عالىم قويشىعارا سالعارا ۇلى, جازۋشى تولەن ابدىك ەستەلىك ايتتى.
«مۇنداي ءداستۇر وركەنيەتتى ەلدەردىڭ بارىندە بار. ولاردا عىلىمي كونفەرەنتسيا نەمەسە سپورتتىق جارىس وتەدى. سونداي ءداستۇر ءبىزدىڭ ارامىزعا دا كىرىپ جاتىر. بۇل ءبىر جاعىنان وتە پايدالى. ۇرپاقتار ساباقتاستىعى ۇزىلمەۋگە ءتيىس. جاستاردى كورىپ جاتىرمىز. اڭگىمەلەسەمىز, ءجون بىلىسەمىز. بۇل ءتۋرنيردىڭ ۇلتتىق بىرلىككە قوساتىن ۇلەسى دە زور. اقسەلەۋ ءومىر بويى «سوتسياليستىك قازاقستان», «لەنينشىل جاس» گازەتتەرىندە ىستەدى. اقسەلەۋ شىن مانىندە جۋرناليست بولدى. ءتىپتى جۋرناليستىگى باسىم بولدى دەپ ويلايمىن. سوندىقتان بۇل ءتۋرنيردى جۋرناليستەر كۇنى قارساڭىندا ارىپتەستەرى اراسىندا وتكىزۋ زاڭدى», دەيدى مەملەكەتتىك سىيلىقتىڭ لاۋرەاتى, جازۋشى تولەن ابدىك.
ەۇۋ جۋرناليستيكا جانە ساياساتتانۋ فاكۋلتەتىنىڭ دەكانى ءارى ءتۋرنيردى ۇيىمداستىرۋشى قايرات ساقتىڭ ايتۋىنشا, جارىسقا باس-اياعى الپىسقا جۋىق ازامات قاتىستى.
«بۇل تۋرنير العاش 2009 جىلى اقسەلەۋ اعامىزدىڭ باستاۋىمەن باق وكىلدەرى اراسىندا ۇيىمداستىرىلدى. ماقساتى – كاسىبي مەرەكەنىڭ قارساڭىندا جۋرناليستيكانىڭ قازانىندا قايناپ جۇرگەن قالامگەرلەردىڭ باسىن قوسۋ ەدى. ءسويتىپ, اقاڭ ءوزىنىڭ اتىنان تۋرنير جەڭىمپازىنا اقشالاي جۇلدە تىگىپ, ءداستۇرلى بايگەنىڭ نەگىزىن قالاعان. ال 2010 جىلدان بەرى ءبىز وسى سايىستى اقاڭنىڭ اتىنان وتكىزىپ كەلەمىز. جىل سايىن بيلياردقا قىزىعۋشىلىق تانىتىپ, جارىسقا قاتىسۋعا نيەت بىلدىرگەن ويىنشىلار قاتارى ارتىپ كەلەدى», دەدى قايرات ساق.
تۋرنير شارتىنا سايكەس قاتىسۋشىنىڭ جاسى الپىستان اسقاندار – «اعالار» توبى, ال الپىسقا دەيىنگىلەر ورتا بۋىن وكىلدەرى مەن جاستاردان قۇرالعان ويىنشىلار «جاستار مەن جاسامىستار» توبى بولىپ باق سىناستى.
«اعالار» توبىنان I ورىندى ارداگەر فوتوجۋرناليست ماقسۇت ەرجانوۆ, II ورىندى بەلگىلى ساتيريك-جۋرناليست بازاربەك تۇكىباي, III ورىندى ارداگەر جۋرناليست سادىبەك تۇگەل, IV ورىندى اقىن, جۋرناليست تۇرماعامبەت كەنجەباەۆ يەلەندى. ال جاستار مەن جاسامىستار اراسىندا بولعان سايىستا I ورىندى «حابار» اگەنتتىگىنىڭ قىزمەتكەرى احمەتالى ساق, II ورىندى «ايقىن-ليتەر» جشس ديرەكتورى, اقىن تالعات ەشەن ۇلى, III ورىندى «Qazaqstan» تەلەارناسىنىڭ رەجيسسەرى اسىلحان ماناپ, ال IV ورىندى ارىپتەسىمىز «Egemen Qazaqstan» گازەتىنىڭ ءفوتوتىلشىسى ەرلان وماروۆ جەڭىپ الدى.
بۇدان باسقا «ەڭ شەبەر», «ەڭ مەرگەن», «ەڭ شاپشاڭ», «تەحنيكاسى ەڭ مىقتى تاستاياقشى» جۇلدەگەرلەرى انىقتالىپ, يەلەرىن تاپتى. ءتىپتى «ەشكىمنىڭ كوڭىلىن جىقپاي, قارسىلاستارىنا جول بەرگەن» ويىنشى دا ماراپاتتالدى.
