سۋرەتتى تۇسىرگەن – نۇرگۇل بالتاباەۆا
كەزدەسۋ شىمىلدىعىن NU پرەزيدەنتىنىڭ مىندەتىن اتقارۋشى يلەسانمي ادەسيدا اشىپ, ۋنيۆەرسيتەت تۇلەكتەرىنىڭ ەرەكشەلىكتەرىنە توقتالا كەلىپ: «جۇمىس بەرۋشىلەردەن ءبىزدىڭ تۇلەكتەر مەن باسقا وقۋ ورىندارى تۇلەكتەرى اراسىندا قانداي ايىرماشىلىق بار دەپ سۇراعان كەزدە, NU تۇلەكتەرى ماسەلە تۋعىزبايدى ولار كەرىسىنشە بار ماسەلەنى شەشۋگە بەيىم دەگەن جاۋاپ الامىز», دەپ ريزاشىلىعىن ءبىلدىردى.
ۋنيۆەرسيتەتتە ستۋدەنتتەردى كوشباسشىلىققا باۋلۋ بارىسىندا حاكىم ابايدىڭ «تولىق ادام» ءىلىمى نەگىزگە الىنادى. بۇل ءىلىم جاستاردى وتانسۇيگىشتىك رۋحتا تاربيەلەۋگە ارنالعان. سول سەبەپتى دە بۇگىنگى كەزدەسۋ تسيفرلىق كيىز ۇيدە ءوتىپ, NU-دىڭ يننوۆاتسيالار مەن مادەني مۇرا قۇندىلىقتارىن كورسەتەدى.
ۋنيۆەرسيتەتتىڭ ستۋدەنتتەر ءىسى مەن حالىقارالىق ىنتىماقتاستىق جونىندەگى ۆيتسە-پرەزيدەنتى قاديشا دايىروۆانىڭ ايتۋىنشا, جوعارى وقۋ ورنى قۇرىلعاننان باستاپ ونىڭ ۇلكەن ميسسياسى – ەلىمىزدە ارماننان تۋعان ءمىنسىز ۋنيۆەرسيتەت قۇرۋ. وندا XXI عاسىردىڭ «تولىق ادام» تۇجىرىمداماسىمەن سۋسىنداعان ماماندار جۇمىس ىستەپ, ساپالى ءبىلىم بەرەتىن حالىقارالىق عىلىمي باعدارلانعان ۋنيۆەرسيتەتكە اينالدىرۋ.
«سىزدەر بۇگىندە الەمنىڭ ۇزدىك ۋنيۆەرسيتەتتەرىنىڭ 30%-ى قاتارىنا كىرەتىن NU-دى ءتامامداپ وتىرسىزدار. بۇل جەتىستىككە ءبىر كۇندە جەتكەن جوقپىز. وسى ماقسات جولىندا ستۋدەنتتەر, پروفەسسور-وقىتۋشىلار قۇرامى, ۋنيۆەرسيتەت اكىمشىلىگى سەكىلدى ۇلكەن كوماندا ەلەۋلى ەڭبەك ەتتى. ءبىز ارقاشان ەكى قاعيدانى ۇستانامىز, ول – مەريتوكراتيا جانە سترەتەگيالىق ارىپتەستەرمەن ىنتىماقتاستىق», دەدى ول.
سونىمەن قاتار ق.دايىروۆا ءبىر قىزىق وقيعامەن ءبولىستى. 2009 جىلى گارۆارد ۋنيۆەرسيتەتىنە ءالى قابىرعاسى بەكىمەگەن اتالعان جوعارى وقۋ ورنىمەن سەرىكتەس بولۋعا ۇسىنىس جاسالعان ەكەن. الەمدەگى ەڭ مىقتى ۋنيۆەرسيتەتتىڭ سول كەزدەگى حالىقارالىق ىستەر جونىندەگى ۆيتسە-پروۆوستى حورحە دومينگەس ورتالىق ازياداعى NU-دىڭ بولاشاعى تۋرالى فۋتۋريستىك اڭگىمەنى تىڭداپ بولىپ, وسى ۇسىنىسپەن كەيىنىرەك ورالۋىن سۇراعان. ال بيىل گارۆارد ۋنيۆەرسيتەتىنىڭ دەلەگاتسياسى ءبىزدىڭ ەلىمىزگە ات باسىن بۇرىپ, NU سەرىكتەستىك تۋرالى ۇسىنىس جاساۋ ءۇشىن كەلىپ وتىر.
ۋنيۆەرسيتەتتە پاتريوت جاستاردى تاربيەلەۋ ماقساتىندا قۇرىلعان ۇلتتىق مادەنيەت ورتالىعىنىڭ ديرەكتورى گۇلتاس قۇرمانباي «تولىق ادام» تۇجىرىمداماسىنىڭ ىسكە اسۋىنا توقتالدى. «مەملەكەت باسشىسى «تولىق ادام» تۇجىرىمداماسى مەملەكەتتىك باسقارۋ جۇيەسى, ءبىلىم بەرۋ سالاسىنان باستاپ بيزنەس پەن وتباسى ينستيتۋتىنا دەيىن ءومىرىمىزدىڭ بارلىق سالاسىنىڭ نەگىزىنە اينالۋعا ءتيىس دەپ ايتتى. اقىلى مەن جۇرەگىن تازالىقتا ۇستايتىن شىن مانىندەگى «تولىق ادام» ىلىمىنەن ءنار العان ادام جاقسى ينجەنەر دە, جاقسى دارىگەر دە, جاقسى پرەزيدەنت تە بولا الادى», دەدى عالىم.
NU 2017 جىلعى تۇلەگى داۋكەن سەيىتقالي الما-ماتەردى اياقتاعاننان كەيىنگى جەتىستىكتەرىن تىلگە تيەك ەتتى. «Arlan Biotech» كومپانياسىنىڭ نەگىزىن قالاۋشىلاردىڭ ءبىرى, بيىل Forbes Kazakhstan «30 under 30» جاس كوشباسشىلار تىزىمىنە كىردى. ول ادامدار مەن جانۋارلار اۋرۋىن دياگنوستيكالاۋ ءۇشىن سينتەتيكالىق نانودەنەلەرگە نەگىزدەلگەن ونىمدەردى ازىرلەۋمەن اينالىسادى. سونداي-اق ونىڭ جۇمىسى بەلگىلى ءبىر اقۋىز انتيگەندەرىنە قارسى باعىتتالعان نانودەنەلەردى جاساۋعا جاساندى ينتەللەكتىنى پايدالانۋ قامتىلعان. بۇل ءوز كەزەگىندە ءدارى-دارمەكتەردى, سونىڭ ىشىندە ونكولوگيالىق اۋرۋلارعا قارسى پرەپاراتتاردى ازىرلەۋدە قولدانىلۋى مۇمكىن.
«قازاقستان جاڭا تەحنولوگيا سالاسىندا اۋىز تولتىرىپ ايتاتىن جەتىستىكتەرگە جەتە المايدى دەگەندى كوپ ەستيتىنمىن. بارلىق دامۋ شەتەلدە بولىپ جاتقانداي كورىنەتىن. مەنىڭ وسى ءنارراتيۆتى وزگەرتكىم كەلدى. ءوز جولىمدى باستاعان ساتتە ءبىزدىڭ ەلىمىزدە جاساندى ينتەللەكتىگە قىزىعاتىندار قاتارى از ەكەنىن بايقادىم. الايدا مەنىڭ عىلىمي جۇمىسىم جاپونيادا ۇزدىك دەپ تانىلدى. وسى ساتتە تالماي ەڭبەك ەتسەك, ءبىز دە كوپتەگەن جەتىستىككە جەتە الاتىنىمدى سەزىندىم. بۇل ءبىرىنشى كەزەكتە NU-دىڭ ارقاسىندا ەكەنىن بىلەمىن. وسىندا وقىپ ءجۇرىپ, زەرتتەۋ جۇمىسىن جۇرگىزىپ, عىلىمي ماقالا جازۋدى ۇيرەندىم», دەدى د.سەيىتقالي. 2024 جىلعى كوكتەمدە «Arlan Biotech» الەمدىك دەڭگەيدەگى «StartX» اكسەلەراتورىنا قابىلداندى.
اتالعان جوعارى وقۋ ورنىنىڭ «Alumni Association» قاۋىمداستىعىنىڭ اتقارۋشى ديرەكتورى ىرىمگۇل ىبرايىموۆا 2020 جىلى ۋنيۆەرسيتەتتى ساياسات جانە حالىقارالىق قاتىناستار ماماندىعى بويىنشا بىتىرگەن. ول بۇل وقۋ ورنىندا تاماشا ادال دوستار تاۋىپ, ءوز جولىندا جاڭا مۇمكىندىكتەر بولعانىن ايتادى.
«شىنىمدى ايتسام, الەم مەنىڭ اياق استىمدا جاتقانداي كورىنەتىن. ءبىز وتە ساپالى ءبىلىم الدىق. سوندىقتان وسىنداي ورتادا وسكەنىمدى ماقتان ەتەمىن. بۇگىن باسقا تۇلەكتەردى كورىپ, ولاردىڭ عىلىمداعى جەتىستىكتەرىن تىڭداپ, قۋانىپ وتىرمىن.
بۇل مەنى دە ىنتالاندىرادى. بۇدان دا جاقسى دۇنيە جاساپ, ودان دا جوعارى جەتىستىككە جەتۋگە تالپىندىرادى. ەڭ باستىسى, ءبىر-بىرىمىزگە قولداۋ كورسەتۋ دەپ بىلەمىن», دەدى ى. ىبرايىموۆا.
الداعى تاڭدا وسىنداي تاعىلىمدى باسقوسۋلار داستۇرگە اينالىپ, ول تۇلەكتەر مەن ۋنيۆەرسيتەت اراسىندا ىقپالداستىق پەن ىنتىماقتاستىق ورناتۋعا باعىتتالماق.
ءبيبىحان سەرىكوۆا
