جاز باستالىپ, تۇرعىندار اراسىندا سۋعا, اسىرەسە اۋىزسۋعا قاتىستى ماسەلە قايتا كوتەرىلگەن تۇستا سايىن شاپاعاتوۆ اۋلىندا ماڭعىستاۋ وبلىسىنىڭ اكىمى نۇرداۋلەت قيلىبايدىڭ قاتىسۋىمەن سۋ تۇشىتۋ قوندىرعىسى ىسكە قوسىلدى. ون مىڭعا جۋىق تۇرعىنى بار سايىن اۋلىندا جاڭا سۋ تۇشىتۋ قوندىرعىسىنىڭ ىسكە قوسىلۋى بۇل باعىتتاعى كوڭىل كونشىتىپ, قيىندىقتى جەڭىلدەتەر جاڭالىقتىڭ ءبىرى بولدى.
جاڭا قوندىرعىنىڭ كومەگىمەن زاۋىت قۋاتى ەكى ەسە ارتتى. كاسىپورىن تاۋلىگىنە 4 500 تەكشە مەتر سۋ تۇشىتادى. بۇل ون مىڭعا جۋىق تۇرعىنى بار سايىن شاپاعاتوۆ پەن كورشى 15 مىڭ ادام تۇراتىن اقشۇقىر اۋىلىن اۋىزسۋمەن قامتاماسىز ەتۋگە تولىق مۇمكىندىك بەرەدى. سۋ تۇشىتۋ زاۋىتى شيكىزات رەتىندە جەراستى سۋىن پايدالانىپ, اۋىل حالقىنا سانيتارلىق تالاپقا ساي اۋىزسۋ ۇسىنادى. الداعى ۋاقىتتا ءوندىرىس وشاعىنىڭ تاۋلىكتىك قۋاتى 6 500 تەكشە مەترگە دەيىن ارتپاق. جاڭا زاۋىتتىڭ جالپى قۇنى – 1 000 000 000 (1 ملرد) تەڭگە, جوبانى «الەكا» جشس «حالىق» قايىرىمدىلىق قورىنىڭ قولداۋىمەن ىسكە اسىرىپ وتىر.
نۇرداۋلەت قيلىباي يگى باستاماعا مۇرىندىق بولعان كاسىپكەرلەرگە ماڭعىستاۋلىقتار اتىنان العىسىن جەتكىزدى.
«مەملەكەت باسشىسىنىڭ وڭىردەگى سۋ تاپشىلىعىن جويىپ, حالىقتى تازا سۋمەن قامتۋ جايىندا ارنايى تاپسىرماسى بار. جەرلەستەرىمىزگە تىرشىلىك ءنارىن جەتكىزۋ ءىسى كۇن تارتىبىنەن تۇسپەيدى. قازىر وبلىستا اۋىزسۋ تاپشىلىعىن جويۋ ءۇشىن بىرقاتار جوبا قارقىندى ءجۇرىپ جاتىر. ناتيجەسىن كورەتىن ءسات تە الىس ەمەس. تامىز ايىنا دەيىن «ماەك» جشس اۋماعىندا تاۋلىگىنە 6 مىڭ تەكشە مەتر سۋ تۇشىتاتىن قوندىرعى ىسكە قوسىلسا, «سك-ا-ستروي» جشس سۋ تۇشىتۋ زاۋىتى قۋاتىن 5 مىڭنان 9 مىڭ تەكشە مەترگە دەيىن ارتتىرادى. سونداي-اق تامىزدان باستاپ اقتاۋ قالاسىنا تاۋلىگىنە قوسىمشا 6 مىڭ تەكشە مەتر اۋىزسۋ, باياندى اۋىلىنداعى سۋ تۇشىتۋ قوندىرعىسى ارقىلى تاۋلىگىنە قوسىمشا 3 مىڭ تەكشە مەتر اۋىزسۋ مۇنايلىعا بەرىلەدى», دەدى ايماق باسشىسى.
ماڭعىستاۋ وبلىسى
