فوتو: تۇركى اكادەمياسىنىڭ ءباسپاسوز قىزمەتى
كونفەرەنتسيانىڭ اشىلۋ سالتاناتىنا تۇركى اكادەمياسىنىڭ پرەزيدەنتى شاھين مۇستافاەۆ, قىرعىز رەسپۋبليكاسىنىڭ ءبىلىم جانە عىلىم ءمينيسترىنىڭ ءبىرىنشى ورىنباسارى بەكجان سۋپاناليەۆ, تۇركى مەملەكەتتەرى ۇيىمىنىڭ باس حاتشىسى كۋبانىچبەك ومۋراليەۆ, قىرعىز رەسپۋبليكاسى پرەزيدەنتىنىڭ كەڭەسشىسى ارسلان كويچيەۆ, تۇرىك لينگۆيستيكالىق قوعامىنىڭ پرەزيدەنتى وسمان مەرت, تۇركيانىڭ يۋنەسكو ىستەرى جونىندەگى ۇلتتىق كوميسسياسىنىڭ توراعاسى ءودجال وعىز جانە قىرعىز-تۇرىك «ماناس» ۋنيۆەرسيتەتىنىڭ رەكتورى الپاسلان دجەيلان قاتىستى.
جيىننىڭ ماقساتى - ماحمۇد قاشقاريدىڭ «ديۋاني لۇعات-ات-تۇرك» اتتى ەڭبەگىنىڭ تاريحي ماڭىزدىلىعىن تالقىلاۋ. قىرعىزستان, قازاقستان, وزبەكستان, ازەربايجان جانە تۇركيا ەلدەرىنەن جينالعان تۇركىتانۋشىلار اۆتوردىڭ ءومىربايانى, «ديۋاني لۇعات-ات-تۇرك» تۋىندىسىنىڭ جازىلۋ ماقساتى, شىعارمانىڭ ءتىلى, سونىمەن قاتار ەڭبەكتە قامتىلعان تاريحي-ەتنوگرافيالىق مالىمەتتەر مەن ادەبي ماتەريالدار سەكىلدى عىلىمي ماسەلەلەردى ورتاعا سالدى. اسىرەسە شىعارمانىڭ اۋدارمالارى مەن زەرتتەۋلەرىنە جانە ونىڭ تۇركى تىلدەرىنىڭ تاريحىن, قازىرگى ديالەكتىلەردى, ادەبيەتتى, ەتنوگرافيانى, سالىستىرمالى ءتىل ءبىلىمىن زەرتتەۋدەگى ماڭىزدىلىعىنا ەرەكشە نازار اۋدارىلدى.
ءىس-شارانىڭ اشىلۋ سالتاناتىندا ءسوز سويلەگەن تۇركى اكادەمياسىنىڭ پرەزيدەنتى شاھين مۇستافاەۆ XI عاسىردا جازىلعان ماحمۇد قاشقاريدىڭ شىعارماسى تۇركى حالىقتارى مەن تايپالارىنىڭ الەۋمەتتىك قۇرىلىمىن, گەوگرافياسىن, تۇرمىس-تىرشىلىگىن, نانىم-سەنىمدەرىن, ميفولوگياسىن جانە حالىق ادەبيەتىن قامتيتىن تۇركى ەنتسيكلوپەدياسى بولىپ سانالاتىنىن اتاپ ءوتتى. سونداي-اق ش.مۇستافاەۆ «ديۋاني لۇعات-ات-تۇركتىڭ» تۇركى حالىقتارى ينتەگراتسياسىنىڭ عىلىمي-مادەني نەگىزىن قامتاماسىز ەتۋدەگى ماڭىزدىلىعىنا ەگجەي-تەگجەيلى توقتالدى.
«بۇل جيىن وسى سالاداعى جاڭا زەرتتەۋلەردىڭ كوكجيەگىن كەڭەيتەرىنە سەنىم بىلدىرەمىن», دەدى ش.مۇستافاەۆ.
كونفەرەنتسيا تۇركىتانۋشىلارعا ماحمۇد قاشقاري مۇراسىن تەرەڭ تالقىلاۋعا جانە ءوزارا پىكىر الماسۋعا ەركىن الاڭ قامتاماسىز ەتكەن ينتەراكتيۆتى پىكىرتالاس پەن پرەزەنتاتسيا فورماتىندا ءوتتى. وسىلايشا, قاتىسۋشىلار باسقوسۋدىڭ تۇركى مەملەكەتتەرىنىڭ عىلىم مەن مادەنيەت سالاسىنداعى ىنتىماقتاستىعىن نىعايتۋداعى ماڭىزدىلىعىن ەسكەردى.
