بيىل اقپان ايىنىڭ 29 جۇلدىزىندا سەمەي قالاسىنىڭ قاراعايلى شاعىن اۋدانىندا قىلمىسكەردى قۇرىقتاۋ ساتىندە ەرلىك كورسەتكەن اباي وبلىسى پوليتسيا دەپارتامەنتى سەمەي قالاسى پوليتسيا ءبولىمى كاۆالەريا بولىمشەسىنىڭ اعا سەرجانتى اسحات احاتوۆ تۋرالى اقپار تارادى. ول قاراعايلى شاعىن اۋدانىنىڭ ۋچاسكەلىك پوليتسيا قىزمەتكەرىنە كومەك قاجەت ەكەنىن ەستىپ وقيعا ورنىنا لەزدە بارادى. قاسىنداعى ارىپتەستەرىمەن بىرگە قىلمىسكەردى ۇستاۋعا بەكىنەدى. الايدا اسحات كۇتپەگەن جەردەن قارسى شابۋىلعا تاپ بولادى. پىشاق جاراقاتىن السا دا, سوڭىنا دەيىن كۇرەسىپ, كۇدىكتىنى قولعا تۇسىرەدى.
باسىن بايگەگە تىگىپ, قاۋىپ-قاتەردەن تايسالماي ەر مىنەزدىلىك تانىتۋ – ەكىنىڭ ءبىرىنىڭ قولىنان كەلە بەرمەيتىن ءىس. باسقا قارۋلاستارىن كۇتىپ تە شەشىم قابىلداۋىنا بولاتىن ەدى. بىراق بۇل دەگەنىڭىز ويلانىپ-تولعاناتىن ءىس ەمەس ەكەنىن ەستى جاننىڭ باعامدايتىنى راس. ءوزى قاۋىپتى قىلمىسكەر بولسا, قولىندا قارۋى بولسا, وندا قورشاعان اينالاسىنا, ەڭ باستىسى, قوعامعا دا قاۋىپتى ادام ەكەنى تۇسىنىكتى. اسحات شۇعىل شەشىم قابىلداپ, ونىڭ جولىنا كەسە كولدەنەڭ تۇرىپ تاپجىلتپاي ۇستاۋعا كۇش سالدى.
اسحات مەدىحات ۇلى 1997 جىلى اباي وبلىسىنىڭ جارما اۋدانىنداعى جارىق اۋلىندا دۇنيەگە كەلگەن. تۋعان اۋىلىنداعى جامبىل اتىنداعى ورتا مەكتەپتى ءبىتىرىپ, سەمەي قالاسىنداعى ەۋرازيالىق تەحنيكا-گۋمانيتارلىق كوللەدجىنە جول قوزعالىسىن ۇيىمداستىرۋ كافەدراسىنا وقۋعا تۇسەدى. وقۋ ورنىن 2017 جىلى ويعا العانىنداي اياقتاپ, جول قوزعالىسىن ۇيىمداستىرۋ ماماندىعىن الىپ شىعادى. اسكەري بورىشىن وتەپ كەلگەننەن كەيىن 2019 جىلى سەمەي قالاسى پوليتسيا ءبولىمى كاۆالەريا بولىمشەسىنە جۇمىسقا كىرىستى. اعا سەرجانت شەنىندە شەكتەن شىققانداردى تارتىپكە شاقىرىپ, قىزمەتىن ابىرويلى اتقارىپ كەلەدى.
اكەسى مەدىحات فايزۋللين جارىق ەلدى مەكەنىندە ەلەكترشى قىزمەتىن اتقارسا, اناسى گۇلسان مۇحامەتكارىمقىزى ەسەپشى بولىپ جۇمىس ىستەيدى. اسحاتتىڭ اپايى مەن قارىنداسى دا ومىردەن ءوز ورىندارىن تاپقان جاندار. بالا كۇنىنەن باستاپ ءتارتىپ ساقشىسى بولۋدى قيالداعان ول ارمانىنىڭ ورىندالعانىنا ءدان ريزا. الدىڭعى بۋىن وكىلدەرىنەن كوپ نارسەنى ۇيرەنىپ ءجۇر. ءاردايىم ءوتىپ تۇراتىن وقۋ-جاتتىعۋ جيىندارىنا قاتىسىپ, قوعامعا, ادامدارعا قاۋىپ تونگەندە قالاي ارەكەت ەتۋ كەرەك ەكەنىن مەڭگەرۋگە تىرىسادى.
پىشاق جاراقاتىن العان وقيعا جايىندا سۇراعانىمىزدا, ارىپتەستەرىنىڭ قولداۋ كورسەتكەنىن باسا ايتتى. مۇنداي وقيعا ءدال باسىنان ءجيى ءوتىپ تۇرماسا دا قىزمەت بابىندا ۇنەمى بەتپە-بەت كەلەتىنىن جەتكىزدى. انا جۇرەگى قاشاندا بالاسىنا بۇرىپ تۇراتىنى راس. بالاسىنىڭ جاراقات العانىن ەستىگەندە, ەت جاقىندارىنىڭ ىشىندە اناسى مەن قارىنداسى قاتتى الاڭداۋشىلىق بىلدىرگەن كورىنەدى.
قىلمىسكەردى قۇرىقتاۋدا قىراعىلىق تانىتقان پوليتسيا سەرجانتى اسحات احاتوۆتىڭ كوزسىز ەرلىگى كىم-كىمگە دە بولسا ۇلگى. ارىپتەستەر اراسىندا العىسقا بولەنىپ جۇرگەن جىگىتتىڭ شىعار تاۋى بيىك, جەتەر جەتىستىگى كوپ بولارىنا تاۋداي تالابى, بويىنا بىتكەن قايسارلىعى كۋا.
اباي وبلىسى
