اۋماعىنا 15 اۋىل اكىمدىگى, 28 ەلدى مەكەن كىرەتىن ىرگەلى اۋداننىڭ پوليتسيا بولىمىندە 16 جىلعا جۋىق قىراعىلىق, تاباندىلىق تانىتىپ كەلە جاتقان پوليتسيا مايورى ازامات اسقار ۇلى باسشىلىق جاسايتىن بولىمشەگە كامەلەتكە تولماعاندار قاۋىپسىزدىگى بويىنشا ينسپەكتورلاردى, ءپاترۋلدى پوليتسەيلەردى, باقىلاۋ قىزمەتىن, ۋچاسكەلىك ينسپەكتورلاردى, يۋۆەنالدى پوليتسيا ينسپەكتورلارىن, ايەلدەرگە زورلىق-زومبىلىق كورسەتۋگە قارسى ينسپەكتورلاردى, سونداي-اق تابيعاتتى قورعاۋ ينسپەكتورلارىنىڭ قىزمەتىن قاداعالاپ, جۇيەلى جۇمىس ىستەۋىن ۇيىمداستىرۋ مىندەتى جۇكتەلگەن. وسىنداي سان سالالى جاۋاپتى قىزمەتتى تىزگىندەپ جۇرگەن ازامات ابراحمانوۆ ۇجىمعا عانا ەمەس, وبلىستىڭ قۇقىق سالاسىندا ۇتقىر ۇيىمداستىرۋشى, بىلىكتى باسشى رەتىندە تانىلىپ, ىسىمەن ۇلگى-ونەگە بولىپ ءجۇر.
«اۋدانىمىزدا ەگىن, مال شارۋاشىلىعىمەن قاتار بالىق جانە اڭ اۋلاۋ كاسىبى جاقسى دامىعان. الايدا كولدەنەڭ تابىس تابۋدا قۇقىق بۇزۋشىلىقتار بولماي قويمايدى. وسى سەبەپتى كوبىنە قىلمىستىڭ الدىن الۋ جۇمىستارىن جۇرگىزەمىز. ارنايى جيىندار وتكىزىپ, ەسكەرتپە-نۇسقاۋلىقتار تاراتامىز. جەرگىلىكتى باسقارۋ ورگاندارىمەن, توتەنشە جاعدايلار بولىمشەلەرىمەن بىرىگىپ, جۇدىرىقتاي جۇمىلا جۇمىس ىستەيمىز. ەرىكتىلەر توبىنىڭ دا بەلسەندىلىك تانىتاتىن كەزدەرى وتە كوپ», دەيدى ازامات اسقار ۇلى.
پوليتسيا مايورىنىڭ ايتۋىنشا, قىلمىس پەن بۇزاقىلىقتىڭ الدىن الۋدا اۋىلدارداعى ادام اياعى ۇزىلمەيتىن دۇكەن مەن كافەلەرگە, مەملەكەتتىك مەكەمەلەرگە باقىلاۋ كامەرالارى قويىلعان. سونىمەن قاتار اۋداننىڭ ورتالىق كوشەلەرىنە, اۋىلدارعا «سەرگەك» باقىلاۋ كامەرالارى ورناتىلعان. بيىل اۋداندا باقىلاۋ كامەراسىنىڭ سانىن 800-گە جەتكىزۋ جوسپارلانىپ وتىر.
«وسى كامەرالارعا تۇسكەن بەينەجازبانىڭ ارقاسىندا زاڭ بۇزۋشىنى تەز قۇرىقتاۋ مۇمكىندىگى ارتتى. سونداي-اق كامەرادان سەسكەنىپ, زاڭعا قايشى ارەكەت جاساۋشىلاردىڭ قاتارى ازايدى. بۇرىنعى جىلدارمەن سالىستىرعاندا قىلمىستىق كورسەتكىش اجەپتاۋىر كەمىگەندىگى قۋانتادى. جاز باستالعالى بالقاش كولى مەن ىلە وزەنىنە دەمالۋشىلار قاتارى كوبەيىپ كەلەدى. بۇل ماۋسىمدا پوليتسيا قىزمەتكەرلەرى تىنىم تاپپايدى. ءبىز تۋريستەر مەن ساياحاتشىلاردىڭ زاڭ بۇزباۋىن, قاۋىپسىزدىك ەرەجەلەرىن ەسكەرۋىن قاتاڭ قاداعالاپ وتىرامىز», دەگەن بولىمشە باسشىسى تىيىم سالىنعان كەزەڭدە بالىق اۋلاپ, اڭ-قۇس اتاتىن براكونەرلەردىڭ دە قاراسى ەسەلەنە تۇسەتىندىگىن تىلگە تيەك ەتتى.
«قىزىل كىتاپقا» ەنگەن اڭ-قۇستاردى اتۋعا زاڭ جۇزىندە قاتاڭ تىيىم سالىنعاندىعىن ەلەپ-ەسكەرمەيتىندەر ءجيى كەزدەسەدى. وسى سەبەپتى ولاردىڭ قولىنداعى مىلتىقتىڭ تىركەلگەن-تىركەلمەگەندىگى تەكسەرىلەدى. بالىقتى بەلگىلى ءبىر اۋماقتا قولدان جاسالعان اپپاراتتىڭ كومەگىمەن توق سوققىزىپ اۋلايتىندار دا بار. مۇنداي زاڭسىزدىققا بارعان براكونەرلەردى سان مارتە قۇرىقتاپ, زاڭ جۇزىندە جازالاندى», دەدى.
پوليتسيا مايورى ازامات اسقار ۇلى قوعامدىق ءتارتىپتى قامتاماسىز ەتۋدە بىلىكتى باسشى عانا ەمەس, 9 قىزدى ايالاپ ءوسىرىپ وتىرعان كوپبالالى اكە ەكەندىگىن ايرىقشا اتاعانىمىز ابزال. شاڭىراعىنىڭ شىرايىن كىرگىزىپ, ماڭدايىنا باق دارىتىپ, جۇرەگىنە مەيىرىم ۇيالاتقان اسىل جارى جازيرا مەنكەتايقىزىمەن قول ۇستاسىپ, وتاۋ قۇرعالى 17 جىلعا جۋىقتاعان. وسى ۋاقىت ارالىعىندا گۇلدەي ۇلبىرەگەن قىزدارى بىرىنەن سوڭ ءبىرى دۇنيەگە كەلىپ, قۋانىشتارىن ەسەلەپ كەلەدى.
قىر قىزعالداعىنداي جايقالىپ, ءوسىپ كەلە جاتقان قىزدارىنىڭ ۇلكەنى اقنۇر بۇگىندە 9-سىنىپتى ءتامامداسا, ەكىنشىسى گۇلنۇر وسى سىنىپقا كوشتى. ال كاۋسار مەن جاسمين – باستاۋىش سىنىپ وقۋشىلارى. ولاردىڭ ىزىنەن ىلەسكەن ايارۋ مەن توميريس مەكتەپ تابالدىرىعىن اتتاۋعا تاياۋ. ال ەرەكشە قۇرمەتكە يە ەگىز قىزدارى ادينا مەن مەدينا ەكى جاستان ەندى اسسا, قىزداردىڭ ەڭ كىشكەنتايى دايانا ون ايعا تولدى. بۇيىرتسا, 9 قىزدىڭ قاتارى تاعى ءبىر نارەستەمەن تولىعىپ, جۇبى جاراسقان ازامات ابدراحمانوۆ پەن جازيرا مالگەجداروۆا ون بالانىڭ اتا-اناسى اتانادى. باق دارىعان بالقاش اۋدانىندا ەرەكشە وتباسى سانالاتىن ابدراحمانوۆتىڭ قىزدارى وسى باستان ونەرلى بوپ ءوسىپ كەلەدى. ولاردىڭ قاتارىندا اكە جولىن قۋىپ, قۇقىق قورعاۋ قىزمەتكەرى بولۋدى ارماندايتىندارى دا جوق ەمەس.
«قىزدارىمىزدى ءبىر-بىرىنەن ءبولىپ جارمايمىز. ولاردىڭ بارلىعى تالانتتى, اقىلدى ءارى ادەمى. ءتولباسى اقنۇرىمىز ساباقتى ۇزدىك وقۋمەن قاتار اعىلشىن ءتىلىن جەتىك مەڭگەرىپ كەلەدى. ال گۇلنۇرىمىز سۋرەت ونەرىنە وتە بەيىم. ءبىزدىڭ قىزمەتتە فوتوروبوت جاسايتىن ارنايى ماماندار بار. قىزىمنىڭ بويىنا سول قاسيەت دارىعان سياقتى, كەز كەلگەن زاتتى نە جان-جانۋاردى بەينەلەپ ايتسام بولدى, اينىتپاي سالىپ بەرەدى. ۇلكەن ەكى قىزىم وسكەندە جولىمدى جالعاپ, قۇقىق قورعاۋ سالاسىندا قىزمەت ەتكىسى كەلەتىندىگىن ءجيى ايتادى. مەن قىزدارىمنىڭ بۇل تاڭداۋىن قۋانا قۇپتايمىن. سەبەبى تاۋەلسىز ەلىمىزدىڭ تىنىشتىعىن قامتاماسىز ەتۋمەن قاتار قۇقىقتىق مەملەكەت بولىپ قالىپتاسۋىنا وزىندىك ۇلەستەرىن قوسسا, نەگە قۋانباسقا؟ سوندىقتان قىزدارىمىزدىڭ ۇيادا جاقسى ءتالىم-تاربيە ءسىڭىرىپ, مەكتەپتە تەرەڭ ءبىلىم الىپ, قالاعان ماماندىقتارىنىڭ يەسى بولۋىنا اناسى ەكەۋمىز بار مۇمكىندىگىمىزدى جۇمىلدىرۋدامىز», دەيدى مايور شەنىندەگى 9 قىزدىڭ اكەسى ازامات ابدراحمانوۆ.
قىزمەتىنە قىراعى, ۇجىمدا تاجىريبەلى, بىلىكتى باسشى بولا بىلگەن پوليتسيا قىزمەتكەرىن اۋدان جۇرتشىلىعىمەن قاتار ارىپتەستەرى دە اركەز قۇرمەت تۇتادى. «ازامات اسقار ۇلى جۇمىسىنا وتە تياناقتى. ول – وتباسىنا عانا ەمەس, اۋدانىمىزعا ۇلگىلى اكە. توعىز بالانى وسىرە وتىرىپ, جۇمىسىنا زور جاۋاپكەرشىلىكپەن قارايدى. بىلىكتى مامان رەتىندە قىلمىستىق ىستەردى اشۋدا دا بەلسەندىلىك تانىتىپ, ورتاسىنىڭ قۇرمەتىنە بولەنىپ جۇرەدى», دەيدى بالقاش اۋداندىق پوليتسيا ءبولىمىنىڭ باسشىسى, پوليتسيا پودپولكوۆنيگى ايدار وماروۆ.
وتباسى قۇندىلىعىن قۇنتتاپ, قۇقىقتىق قىزمەتتە دە قىراعىلىق تانىتىپ جۇرگەن ازامات اسقار ۇلى قولى قالت ەتە قالسا, كوزقۋانىشىنا اينالعان قىزعالداقتارىن وبەكتەپ, سولاردىڭ جانىنان تابىلۋعا تىرىسادى. ويتكەنى جۇمىسىنا ەرتە كەتىپ, كەش قايتاتىن اكەنىڭ جولىن كۇتىپ, موينىنا ورالاتىن قىزدارىنىڭ قىلىقتارى ءتاپ-ءتاتتى. قىرمىزى گۇلدەي جايناعان قىزدارىن كورگەندە قۋانىپ, شاتتانىپ, شارشاعانىن دا ۇمىتىپ قالاتىن پوليتسيا مايورىنىڭ بار تىلەگى – ەلىمىزدىڭ تىنىشتىعى مەن بالالاردىڭ زورلىق-زومبىلىقسىز باقىتتى ءومىر ءسۇرۋى. وسى جولدا جان-تانىمەن انتىنا ادال قىزمەت ەتۋدى ءوزىنىڭ اينىماس مۇراتى سانايدى.
الماتى وبلىسى
