مايبۇرشاق وڭدەيتىن جاڭا زاۋىت

ءوڭىر ەكونوميكاسىنىڭ دامۋى جەدەل يندۋستريالاندىرۋ ارقىلى ينفراقۇرىلىمداردى دامىتۋمەن ولشەنەتىندىكتەن وسى باعىتتاعى جوبالاردىڭ جۇزەگە اسۋىنا ءاردايىم ءجىتى نازار اۋدارىلىپ كەلەدى. ناتيجەسىندە بيىلعى جىلى ءوندىرىسى باستالاتىن جوبالار تىزىمىندەگى كوكسۋ اۋدانى, بالپىق بي كەنتىندەگى “ەكسترا مايبۇرشاق وڭدەۋ زاۋىتى” جاۋاپكەرشىلىگى شەكتەۋلى سەرىكتەستىگىندەگى قۇرىلىس, جابدىقتاۋ جۇمىستارى اياقتالىپ, ونىڭ اشىلۋ سالتاناتى ءوتتى. وسىلايشا ەلباسىنىڭ بيىلعى جولداۋىنداعى اۋىل شارۋاشى­لىعىن ءارتاراپتاندىرۋ مەن شيكىزاتتى قايتا وڭدەۋدى شۇعىل ارتتىرۋ ماسەلەلەرى شەشىمىن تاپقانىن كورۋگە بولادى. جاڭا تەحنولوگيالار مەن قۇرال-جاب­دىقتاردى وندىرىسكە ەنگىزۋ ار­قىلى الەمدىك تاجىريبەنى بارىنشا پايدالانۋ مۇمكىندىگى قاراس­تىرىلعان زاۋىتتىڭ الماتى-وسكەمەن كۇرەجولىنىڭ بويىنداعى 2 گەكتار جەرگە ورنالاستىرىلعانى دا ەكى جاققا ءتيىمدى ەكەنىن كورسەتەدى. زاۋىتتاعى نەگىزگى قۇرال-جابدىق گوللانديا مەن رەسەي, كورەيا جانە قىتايدان اكەلىنىپ, بىلىكتى مامان­داردىڭ قاتىسۋىمەن قۇراس­تىرىلىپتى. مۇندا ساعاتىنا 4 توننا, جىلىنا 24 مىڭ توننا جارما شىعارىلىپ, ادەمى قاپشىقتارمەن اتالعان ءونىم وڭىردەگى قۇس فابريكالارى مەن بالىق شارۋاشىلىقتارىنا جونەلتىلمەكشى. ءونىمنىڭ رىنوكتاعى باعاسى  تومەن, ساپاسى جاقسى. ويتكەنى, ول وسى وڭىردە ءوندىرىلىپ, الىستان تاسىمالدانبايدى. اتالعان كاسىپورىننىڭ اشى­لۋىنا وبلىس اكىمىنىڭ ورىن­باسارى تىنىشباي دوسىمبەكوۆ قاتىسىپ, وڭىردەگى يندۋستريالاندىرۋ باعىتىنداعى قولعا الىنعان جۇمىس­تارعا توقتالدى. ەندى ساناۋلى كۇندەردە تاعى دا جەتى كاسىپورىن ىسكە قوسىلاتىنىن اتاپ ءوتتى. وڭىردەگى ديقان قاۋىمى جىلىنا 145 مىڭ توننا مايلى داقىل وندىرەتىنىن ەسكەرسەك, شيكىزات وڭدەيتىن كاسىپورىننىڭ وزىمىزدە بولعانى ءتيىمدى. بۇعان دەيىن اتالعان داقىلداردى وڭدەيتىن ورىندار حالىققا دەر كەزىندە اقشاسىن بەرمەي, الەككە سالاتىن. ديقان­داردىڭ وسى ماسەلەسىن شەشۋ ءۇشىن سويا وڭدەيتىن ەكى زاۋىت اش­قالى وتىرمىز. ونىڭ العاشقىسى وسى زاۋىت بولسا, ەكىنشىسى جىلىنا 70 مىڭ توننا مايبۇرشاق وڭدەيتىن سارىبۇلاق زاۋىتى, دەدى. ءبىر قۋانىشتىسى, شارۋالار ءۇشىن كاسىپورىننىڭ سويانى قابىل­داۋ باعاسى دا ءتيىمدى. ماسەلەن, وتكەن جىلى مايبۇرشاقتىڭ كيلوسى 45 تەڭگە شاماسىندا بولسا, جاڭا زاۋىت ونى 62 تەڭگەدەن قابىل­دايتىن بولىپ كەلىسىم-شارت جاساۋدا. كاسىپورىننىڭ ءوندىرىس كولەمى ۇلكەن, بۇگىنگى رىنوكتاعى ورنى دا ەرەكشە. ءونىم قۇرامىندا پروتەيننىڭ كوپ بولعاندىعىنان ونىڭ قۇس جانە بالىق شارۋاشى­لىعىن دامىتۋداعى ماڭىزى زور ەكەنىن دە ايتقان ءجون. “EXTRA” مايبۇرشاق وڭدەۋ زاۋىتىنىڭ باس ديرەكتورى قايرات كوپەسوۆ جولداۋدا ايتىلعانداردى ءوز جۇمىسىمىزدا جۇزەگە اسىرۋ بارىسىندا اتالعان ءوندىرىس ورنى ىسكە قوسىلدى. قازىردىڭ وزىندە كوپتەگەن اۋىلشارۋاشىلىق قۇرى­لىمدارىمەن كەلىسىم-شارت جاسادىق. زاۋىت اۋىلداعى جۇمىس­سىزدىقتىڭ الدىن الۋعا دا سەپتىگىن تيگىزىپ وتىرعانىن ايتقان ءجون. تۇراقتى جۇمىس, جوعارى جالاقى الاتىندار ۇجىمداعى ەڭبەك ونىمدىلىگىنىڭ ارتۋىنا ءوز ۇلەستەرىن قوساتىنى انىق, دەيدى. جاڭا زاۋىتتاعى جۇمىسقا تارتىلعان­داردىڭ ءبىرى جايدار نۇعىمانوۆ تا ءوزىنىڭ ريزاشىلىعىن  ءبىلدىردى. –جۇمىسسىز وتىر ەدىك. زاۋىتتىڭ اشىلعانى بىزگە جاقسى بولدى. ونىڭ ۇستىنە ايلىعى دا كوتەرىڭكى. تەك تاپسىرىلعان جۇمىسقا دەگەن تياناقتىلىق قاجەتت­ىگىن تۇسىنەمىز. كورسەتىلگەن سەنىمنەن شىعۋ ءۇشىن قايتارىمدى ەڭبەك ەتەمىز, – دەيدى جارقىن كوڭىلمەن. اگروكەشەندى دامىتۋ باعدار­لاماسىنىڭ اياسىندا جۇزەگە اسقان ينۆەستيتسيالىق جوبالار قاتارىن­داعى جاڭا زاۋىت وسىلايشا ءوز جۇمىسىن باستادى.  مايبۇر­شاق­تى وڭدەۋ ارقىلى شىعارىلعان قاپتالعان دايىن ءونىم  بەلگىلەنگەن نىساندارعا جول تارتتى. كۇمىسجان بايجان. الماتى وبلىسى.