فوتو: ۇكىمەتتىڭ ءباسپاسوز قىزمەتى
«بۇرىن-سوڭدى بولماعان سۋ تاسقىنى, تيىسىنشە, زارداپ شەككەن مىڭداعان ازاماتتار ءۇشىن, جالپى ەل ءۇشىن, ونىڭ ەكونوميكاسى مەن ينفراقۇرىلىمى ءۇشىن وتە اۋىر زارداپتار. تەك 120 مىڭنان استام ازامات ۇيلەرىنەن كوشىرىلدى. بۇگىنگى تاڭدا 67 570 ادام ۇيلەرىنە ورالدى. بۇگىن تاڭەرتەڭگى جاعداي بويىنشا ەۆاكۋاتسيالاۋ پۋنكتتەرىندە 3952 ادام قالدى. جەكە تۇرعىن ءۇي قۇرىلىسىن ايتاتىن بولساق, بارلىعى 12 مىڭ تۇرعىن ءۇيدى جانە 26 مىڭ ساياجايدى سۋ باسقان. بۇگىنگى تاڭدا 98 ءۇي سۋ استىندا قالىپ وتىر», دەدى پرەمەر-مينيستر.
بەكتەنوۆتىڭ ايتۋىنشا, زارداپ شەككەندەرگە كومەك كورسەتۋ بويىنشا اۋقىمدى جۇمىستار ءالى دە جالعاسىپ جاتىر.
«مۇندا ءىرى بيزنەس وكىلدەرى ەلەۋلى قولداۋ كورسەتتى, بيۋدجەتتىك رەسۋرستار وتە بايىپتى تارتىلدى. بۇگىنگى تاڭدا 33 141 وتباسى 100 اەك كولەمىندە وتەماقى الدى. بۇل ماقساتتارعا بيۋدجەتتەن 12 ميلليارد تەڭگەدەن استام قاراجات ءبولىندى», دەدى و.بەكتەنوۆ.
سونداي-اق و.بەكتەنوۆ بۇگىنگى كۇنگە دەيىن 17 982 ۇيگە زەرتتەۋ جۇرگىزىلىپ, 15 685 ۇيگە باعالاۋ جۇرگىزىلگەنىن اتاپ ءوتتى. باعالاۋ بويىنشا ۇيلەردىڭ جارتىسىنا جۋىعى جوندەۋ مەن قالپىنا كەلتىرۋدى قاجەت ەتەتىنى بەلگىلى بولدى. قازىردىڭ وزىندە 5823 وتباسى جوندەۋ-قالپىنا كەلتىرۋ جۇمىستارى ءۇشىن وتەماقى الدى. بۇل ماقساتتارعا 38,6 ملرد تەڭگە ءبولىندى. بۇگىندە 8 مىڭنان استام ءۇي قاۋىپتى دەپ تانىلدى.
«بۇگىنگى تاڭدا 3155 وتباسى جاڭا باسپاناعا يە بولدى. ءار وڭىردە 2049 تۇرعىن ءۇيدىڭ قۇرىلىسى بەلسەندى جۇرگىزىلۋدە. تۇرعىن ءۇيدى قالپىنا كەلتىرۋ مەن سالۋعا بارلىعى 251 ميلليارد تەڭگە ءبولىندى, ونىڭ ىشىندە قايىرىمدىلىق كومەك پەن بيۋدجەت قاراجاتى بار», دەپ تۇيىندەدى ولجاس بەكتەنوۆ.
قىرمىزى جۇماعاليقىزى,
ەۇۋ ستۋدەنتى
