بىلتىر اتالعان ۋنيۆەرسيتەت Times Higher Education بەدەلدى حالىقارالىق رەيتينگىنە ساي الەمدەگى ۇزدىك زەرتتەۋ جوعارى وقۋ ورىندارىنىڭ 30 پايىزدىق قاتارىنا ەندى. بيىل ۇزدىك ازيا ۋنيۆەرسيتەتتەرىنىڭ 11 پايىزدىق ساپىنان كورىنىپ, الەمدەگى مىقتى دەگەن 100-گە جۋىق جوعارى وقۋ ورنىنىڭ قاتارىنا جايعاستى. ۋنيۆەرسيتەت پرەزيدەنتىنىڭ مىندەتىن اتقارۋشى, دوكتور يلەسانمي ادەسيدانىڭ ايتۋىنشا, مۇنىڭ ءبارى – 14 جىل ىشىندە اتقارىلعان جۇمىستىڭ جەمىسى. سونىمەن قاتار جوعارى وقۋ ورنى بيىل Quality Assurance Agency (QAA) جالپى ينستيتۋتسيونالدىق اككرەديتاتسياسىن الۋ ءۇشىن جۇمىس ىستەپ جاتىر ەكەن.
ءىس-شارا بارىسىندا حالىق قالاۋلىلارى ۋنيۆەرسيتەت كامپۋسىن, گەنومدىق جانە دەربەستەندىرىلگەن مەديتسينا, يمپۋلستىك ۇدەتكىش, ەلەكتروندى ميكروسكوپيا زەرتحانالارى مەن مەديتسينالىق روبوتتەحنيكا جانە زەرتتەۋلەر ورتالىعىن ارالادى. سونداي-اق قوناقتارعا اقىلدى جۇيەلەر مەن جاساندى ينتەللەكت ينستيتۋتىنىڭ (ISSAI) ازىرلەمەلەرى تانىستىرىلدى.
پارلامەنت ءماجىلىسىنىڭ قارجى جانە بيۋدجەت كوميتەتىنىڭ حاتشىسى تاتيانا ساۆەلەۆا ۋنيۆەرسيتەتتىڭ عىلىمي ازىرلەمەلەرىنە ءتانتى ەكەنىن جەتكىزدى.
«ۋنيۆەرسيتەت پەن نازارباەۆ زياتكەرلىك مەكتەبىنىڭ تاجىريبەسىن ءبىلىم جانە عىلىم سالاسىنا تاراتۋ وتە ماڭىزدى. ءبىز ءوز تاراپىمىزدان وسى وقۋ ورىندارىنىڭ الەۋەتىن بارىنشا ساقتاپ, نىعايتۋ ماقساتىندا جۇمىس ىستەيتىن بولامىز», دەدى ول.
جوعارى وقۋ ورنىنىڭ جاس عالىمدارى ءماجىلىس دەپۋتاتتارىنا ەل تۇرعىندارىنىڭ گەنومىن جانە ولاردىڭ ءارتۇرلى اۋرۋلارعا بەيىمدىلىگىن زەرتتەگەن جوبالارىن كورسەتتى. سونىمەن بىرگە قاتەرلى دەرتكە قارسى ءدارى-دارمەكتەردى اعزاداعى كەرەكتى جاسۋشالارعا تىكەلەي جەتكىزۋ ءتاسىلىن ازىرلەۋ جۇمىسى تۋرالى دا ايتىپ بەردى. اسىرەسە ولار موتورلى فۋنكتسيالارى بۇزىلعان ناۋقاستاردى وڭالتۋ ماقساتىندا قولدانىلاتىن ەكزوسكەلەتكە ەرەكشە نازار اۋداردى.
حالىق قالاۋلىلارىنا ەكزوسكەلەت ازىرلەنگەن مەديتسينالىق روبوتتەحنيكا جانە زەرتتەۋلەر ورتالىعىنىڭ (CEBR) جەتىستىگىن پروفەسسور ايبەك نيەتقاليەۆ اڭگىمەلەدى.
«ورتالىقتا ءبىز حيرۋرگيا جانە وڭالتۋ, سونداي-اق قاتەرلى ىسىكتى دياگنوستيكالاۋ ماقساتىندا جاساندى ينتەللەكتىگە نەگىزدەلگەن ەسەپتەۋ پاتولوگياسى ءۇشىن زەرتتەۋ جۇرگىزىپ, روبوت قۇراستىرامىز. دۇنيەجۇزىلىك بانكتىڭ گرانتى ەسەبىنەن ءبىزدىڭ ۋنيۆەرسيتەتتە وڭالتۋ روبوتتارى جاسالدى. قازىر ولاردى مۇگەدەكتىگى بار ادامداردى ەمدەۋ ءۇشىن قولدانادى», دەدى عالىم.
ءماجىلىس دەپۋتاتتارى يمپۋلستىك ۇدەتكىش زەرتحاناسىندا «I-NURA» جوباسىمەن دە تانىستى. PhD مارات قايقانوۆتىڭ ايتۋىنشا, بۇل ۇدەتكىش ماتەريالدارعا وتە جىلدام ەنەرگەتيكالىق اسەر ەتەدى. اتالعان جوبا بەركليدەگى (اقش) لوۋرەنس ۇلتتىق زەرتحاناسى مەن ۋنيۆەرسيتەتتىڭ باسقا دا سەرىكتەستىك ىنتىماقتاستىعى اياسىندا قۇرىلعان.
سونداي-اق قوناقتاردى نانووبەكتىلەردى زەرتتەيتىن وتە قۋاتتى ميكروسكوپتاردىڭ جۇمىسى دا قىزىقتىردى. ولار اقىلدى جۇيەلەر مەن جاساندى ينتەللەكت ينستيتۋتىنىڭ (ISSAI) زەرتتەۋشىلەرىنىڭ AI سالاسىنداعى سوڭعى ىستەگەن جۇمىستارىن كوردى. بۇعان دەيىن ISSAI عالىمدارى قازاق تىلىندەگى داۋىس دەرەكقورىن جيناۋ مەن تالداۋ ارقاسىندا مەملەكەتتىك ءتىلدى اۆتوماتتى تۇردە تانيتىن العاشقى مودەلدى (ASR) ازىرلەگەن ەدى. ودان كەيىن قازاقشا ءماتىندى دىبىستايتىن ءبىرىنشى كورپۋستى (KazakhTTS) جاسادى.
ءىس-شارا سوڭىندا پارلامەنت ءماجىلىسى توراعاسىنىڭ ورىنباسارى دانيا ەسپاەۆا ۋنيۆەرسيتەتتە ىسكە اسىپ جاتقان عىلىمي جوبالاردان العان اسەرىمەن ءبولىسىپ, اتالعان جوعارى وقۋ ورنىن قارجىلاندىرۋدى ودان ءارى ساقتاۋ ماڭىزدى ەكەنىن ايتتى.
