كوكتەمگى سۋ تاسقىنى كەزىندە ەلدىكتىڭ ەرەن ۇلگىسى ءۇمىت وتىن لاۋلاتا ءتۇستى. ەل پرەزيدەنتى قاسىم-جومارت توقاەۆ تاسقىنمەن كۇرەس شارالارىنا بەلسەنە اتسالىسقان ەل ازاماتتارىن ماراپاتتاۋ راسىمىندە ءسوز سويلەدى. وندا «بۇل – قۇتقارۋشىلار مەن ۇشقىشتاردىڭ قاجىرلى ەڭبەگىنىڭ ناتيجەسى. ءابىش كەكىلباەۆ: «ەلىن سۇيگەن ازاماتقا ەڭ ۇلكەن قايعى – ءوز حالقىنىڭ تاعدىرىنان تىس قالۋ», دەپ ايتقان. ۇلتتىق ەرىكتىلەر جەلىسى تابيعي اپات بولعان ساتتەن باستاپ ەرەكشە بەلسەندى بولدى. 50 مىڭنان استام ۆولونتەر كومەك كەرۋەندەرىن ۇيىمداستىردى. ولار اپات ايماقتارىنا ازىق-ت ۇلىك جانە باسقا دا قاجەتتى زاتتاردى جەتكىزۋگە اتسالىستى. قازاقستان حالقى اسسامبلەياسىنىڭ «جۇرەكتەن جۇرەككە» اكتسياسى ورتاق ىسكە مول سەپتىگىن تيگىزدى», دەدى پرەزيدەنت.
كوكشەتاۋلىق انارگۇل مۋشكانوۆا – «Lider.kz» مەيىرىمدى جۇرەك» ەرىكتىلەر ۇيىمىنىڭ مۇشەسى. سالتاناتتى جيىنعا قادام باسقاندا بۇرىن-سوڭدى مۇنداي مارتەبەلى كەزدەسۋگە قاتىسىپ كورمەگەندىكتەن بە ەكەن, قۇتتى ءوڭ مەن ءتۇستىڭ اراسىندا جۇرگەندەي بولدى. كوز الدىنان وتكەن ءومىر سوقپاعى, قىزىلدى-جاسىلدى دۇنيەدەگى قۋانىشى مەن قيىندىعى, مۇقتاج جاندارعا قولۇشىن سوزعان ساتتەرى كولبەپ وتە باستادى.
كىر جۋىپ, كىندىك كەسكەن توپىراعى – ومبى. ەس بىلگەلى اكەسىنىڭ قازاق دالاسى, جانىنان ارىن بيىك قويعان الاش بالاسى تۋرالى كوپ-كوپ كەرىم اڭگىمەنى ەستىپ وسكەن. قازاقتىڭ دالاسى قانداي كەڭ بولسا, پەيىلى دە سونشالىقتى دەر ەدى قايران دا قايران اكە. بالكىم امانات ىسپەتتى اكە اقىلى سول كەزدەن سۇيەگىنە سىڭگەن شىعار. ومبى اگرارلىق ۋنيۆەرسيتەتىندە وقىپ جۇرگەندە كەشكىلىك جۇمىس ىستەدى. تاپقان ازىن-اۋلاق اقشاسىن جۇمساپ, قاراجاتتان قىسىلعان ستۋدەنتتەرگە كومەكتەسىپ تۇراتىن. القاۋسىز جان قالاۋى. تۇلكىقۇرساق جۇرگەن قۇربىلارىنىڭ ءماز-مەيرام بولىپ قۋانعانىن كورۋدىڭ ءوزى ءبىر مەرەي.
سپورتپەن ۇزبەي, شىنداپ اينالىستى. ارمرەستلينگتەن ومبى قالاسىندا وتكەن جارىستا ءبىرىنشى ورىنعا يە بولدى. قۇربىلارىنا تىرشىلىكتە تەمىردەي ءتوزىمدى بولۋى ءۇشىن سالاماتتى ءومىر سالتىن ساقتاپ, سپورتپەن اينالىسۋ كەرەك دەگەن پىكىرىن ءجيى ايتاتىن. اگرارلىق ۋنيۆەرسيتەتتەن كەيىن ومبىنىڭ ىرگەسىندەگى «ستەپنوە» كەڭشارىنا زووتەحنيك بولىپ ورنالاستى, عىلىمي جۇمىسپەن اينالىستى. ارىپتەستەرىمەن بىرگە ءىرى قارا مالدى بۋدانداستىرۋ ارقىلى ونىمدىلىگى جوعارى ەتتى تۇقىم شىعاردى. ارادا جىلدار وتكەن سوڭ, رازدولنوە سەلوسىندا كلۋب مەڭگەرۋشىسى بولىپ جۇمىس ىستەدى. جاس بالالاردى سپورتقا تاربيەلەدى.
2006 جىلى كوكشەگە قونىس اۋداردى. قۋانىشى قوينىنا سىيماعان. اتا-باباسىنىڭ توپىراعى. وبلىس ورتالىعىنداعى اباي مىرزاحمەتوۆ اتىنداعى ۋنيۆەرسيتەتتىڭ زاڭ فاكۋلتەتىن ءتامامدادى. كوكشەتاۋلىق كاسىپكەر اسقار حاسەنوۆتىڭ شارۋاشىلىعىندا ەكى جىل مال دارىگەرى بولىپ جۇمىس ىستەدى. كەيىن سايراپ جاتقان تاعدىرى جولىندا كەسە-كولدەنەڭ تۇسكەن قيىندىق باس كوتەرتپەگەن. شىداپ باقتى. تۋمىسىنان ءتوزىمدى ەدى, قيىندىققا مويىمايتىن. ۇلاعاتى مول ۇشقان ۇيانىڭ ءتالىمى. 2008 جىلى ۋاقىتشا بولسا دا پانالايتىن باسپانا تابا المادى, ونىڭ ۇستىنە جارىق دۇنيەگە كىشكەنتاي قىزى كەلگەن. تۇراقتى جۇمىس بولسا جوق, قوس ديپلومى بولعانىمەن, جۇمىسقا ورنالاسۋ مۇمكىندىگى بولمادى. تۇراتىن جەرى بولماي, بەيىمدەۋ ورتالىعىندا ءۇش كۇن قونىپ شىقتى. وسى جەردە تاعدىردىڭ تالكەگىنە تۇسكەن قانشاما اداممەن تانىستى. تىرشىلىكتىڭ قارا داۋىلى ۇيتقي سوعىپ, ءوزىن دە ءبىر قيىرعا شىعارىپ تاستاسا دا, ۇنەمى وزگەگە قامقور بولىپ جۇرەتىن ادەمى ادەتىنەن جاڭىلعان جوق. جەتى كەزبەنىڭ ەت جاقىن تۋىستارىن تاۋىپ, تىلدەسىپ, اعايىنعا قامقورلىق جاساۋ ادامگەرشىلىك ەكەندىگىن جەتەلەرىنە جەتكىزە ايتىپ, تابىستىرعان. جەتەۋى دە اعايىننىڭ القاۋىمەن ەل قاتارىنا قوسىلىپ كەتتى. ءبىر كەزدە جازا باسقان جالعىز قادامنىڭ كەسىرىنەن باس كوتەرتپەس بۇرالاڭ جولعا تۇسكەن الگى جەتەۋدىڭ يىندەرى بۇتىندەلىپ, قارىندارى تويىپ, قۋانعاندارىن كورگەندە كوڭىلى بۇرلەگەن. وسى جەردە عازەز اقساقالمەن تانىستى. جەتپىستى القىمداپ قالعان ادام ەكەن. اۋەلى ورتالىقتا جاتقانىنا قاراعاندا جاناشىرى جوق شىعار دەپ ويلاعان. سويتسە, بار ەكەن. ىلە تەلەفوندارىن تاۋىپ حابارلاسقان. نەمەرە ءىنىسى كەلىپ اقساقالدى الىپ كەتتى. وعان دەيىن انارگۇل اقساقالدى مۇنتازداي ەتىپ كيىندىرىپ, جۋىندىرىپ, ساقال-مۇرتىن باستىرىپ, دايىنداپ قويعان. تاعدىردىڭ ادامدى اياۋدى بىلمەس تاياعى ارقاسىنا باتقان اقساقال وسى ءبىر ساتتە كوڭىلى بوساپ, كەمسەڭدەپ سويلەي دە الماي قالدى. تولىقسي تولعانىپ وتىرىپ, اقكوڭىل انارگۇلگە اق باتاسىن بەرگەن.
تورتكۇل دۇنيەنى تۇمشالاپ, قاھارىن شاشا كەلگەن جامان تۇماۋدىڭ جايىلعان كەزىندە التى بەكەتتىڭ اراسىندا جۇگىرىپ, كەزەكشىلىك اتقاردى. ىمىرت ۇيىرىلگەننەن باستاپ بوزارىپ تاڭ اتقانشا كوز ىلمەيتىن. ەشكىم قولىنان جەتەكتەپ اكەلىپ مىندەتتەگەن ەمەس, ءوز ەركىمەن. حالقىنا سەپتىگىم ءتيسىن دەگەن پەرزەنتتىك پەيىل. تاڭەرتەڭ بەكەتتەگى كەزەكشىلىگى بىتكەن سوڭ, جۇمىسىنا جۇگىرەتىن. ارىپتەستەرى قاجىمايتىن قايراتىنا تاڭعالۋشى ەدى.
بيىلعى كوكتەم جالپاق جۇرتقا سىناق بولدى. وبلىس ورتالىعىن قاق جارىپ وتەتىن قىلداي قىلشاقتى وزەنى جاعالاۋدى بۇزىپ, تۇرعىن ۇيلەردى باسىپ قالدى. قاۋمالاعان قارا ورتكە قاناتىمەن سۋ شاشاتىن قارلىعاش ىسپەتتى انارگۇل ەرجانقىزى تاۋلىك بويى تىنىم تاپپاي, قارعىن سۋمەن الىسقان ازاماتتارعا ءدام دايىندادى. مىنە, وسى كەزدە ەل بىرلىگى, جالپاق جۇرتتىڭ تۇتاستىعىن ءوز كوزىمەن كورگەن. قانداي ابزال ازاماتتار دەسەڭىزشى. كوكتەمنىڭ قارا سۋىعىندا بەلۋاردان سۋ كەشىپ جۇرسە دە مويىماعان, تابيعاتتىڭ توسىن مىنەزىنە توتەپ بەرگەن حالقىنىڭ ماحابباتىنا ءتانتى بولعان. بىلايعى جۇرتقا دا ءدان رازى. قازان-وشاقتىڭ باسىندا جۇرگەندە قالا حالقى دۇمەپ كەلدى دەيسىز. توپان سۋدى توقىراتۋعا تالپىنىپ جاتقان قۇتقارۋشىلارعا قۋات بولسىن دەپ ءدام-تۇزىن اكەلىپ جاتىر. كاسىپكەرلەر عانا ەمەس, جاي ادامدار دا. مىنە, سول كەزدە بىرلىگى بار ەلدىڭ تىرلىگى ءتاۋىر بولاتىنىن ۇققان.
«ەلدىڭ وسى ءبىر ىستىق ىقىلاسى, كەڭ پەيىلى مەنىڭ جانىمدى جادىراتىپ جىبەردى, – دەيدى انارگۇل مۋشكانوۆا. – جامبىلدان ەلۋ شاقتى قۇتقارۋشى كەلگەن. ءبىزدىڭ اق داستارقانىمىزدان ءدام تاتقان سول ازاماتتار ءالى كۇنگە دەيىن حابارلاسىپ, العىسىن ايتىپ جاتادى. ءبىز دە قيىن ۋاقىتتا قولۇشىن بەرگەن اتپال ازاماتتاردىڭ ەرلىككە بەرگىسىز ەڭبەگىن ۇمىتا المايمىز. شىن ەرلىكتىڭ, شىنايى ەلدىكتىڭ بەلگىسى وسى ەمەس پە؟
وزگەگە جان شۋاعىن توككىسى كەلىپ تۇراتىن انارگۇلدىڭ ءوز باسىندا دا شۋاقتى كۇندەر تۋا باستادى. مارات ەسىمدى ازاماتپەن تانىسقان. اۆتوبۋس جۇرگىزۋشىسى ەكەن. العاشقى جارى ومىردەن وزىپتى. مۇمكىندىگى شەكتەۋلى ءبىر قىزى بار. اۋەلى قىزىن باۋرىنا باسقان. جاپ-جاس بالانىڭ بولمىسىن كورىپ, باۋىرى ەزىلگەندەي. كەيىن شاڭىراق كوتەرىپ, بار تۇرمىسىن زاڭداستىرىپ, ءتۇتىن تۇتەتىپ وتىر. قازىر وبلىس ورتالىعىنداعى قان ورتالىعىندا ەدەن جۋشى بولىپ ەڭبەك ەتەدى. نەسى بار, ادال كاسىپ.
تىلدەسە وتىرىپ بايقاعانىم, كەيىپكەرىمنىڭ جانارىنان شۋاق توگىلىپ تۇرادى ەكەن. قوعامدى ىزگىلەندىرەتىن دە وسىنداي كەڭپەيىل, ەلجاندى ادامداردىڭ جۇرەگىنىڭ جىلۋى مەن جانارىنىڭ جارقىن ساۋلەسى عوي.
كوكشەتاۋ
