وسكەمەندەگى كەڭ داڭعىلدىڭ بويىنان اشىلعان ۆيزيت ورتالىق تۋريستەر مەن ءوڭىر تۇرعىندارىنا وبلىستىڭ تابيعي, مادەني جانە تاريحي كورىكتى جەرلەرى, سونداي-اق تۋريستىك مارشرۋتتار مەن قىزمەتتەر تۋرالى تولىق اقپارات بەرۋگە ارنالعان. ىشىندە كادەسىيلارعا دەيىن ساتىلادى. التايعا اياعى ءتيىپ, تاريحىمەن, تابيعاتىمەن تەرەڭىرەك تانىسقىسى كەلەتىن تۋريستەر الدىمەن اتالعان ۆيزيت ورتالىققا ات باسىن بۇرعاندارى ابزال.
سالتاناتتى ءىس-شارا باستالماس بۇرىن تۋريستىك اقپاراتتىق ورتالىقتىڭ اۋلاسىندا ساياحاتشىلارعا ارنالعان كورمە ۇيىمداستىرىلدى. ءبىرى بالى مەن شايىن ۇسىنسا, ەندى ءبىرى رافتينگكە ارنالعان قايىق تۇرلەرىن كورسەتتى. التايدا كەزدەسەتىن ءتۇرلى تاستاردان جاسالعان كادەسىيلار دا بۇگىنگى كورمەدەن تابىلدى.
– بۇل اقپاراتتىق ورتالىقتىڭ وڭىردەگى ءتۋريزمدى دامىتۋعا قوسار ۇلەسى زور. ەندىگى كەزەكتە ءبىزدىڭ وڭىرگە كەلەتىن شەتەلدىك جانە قازاقستاندىق كەز كەلگەن تۋريست وسى ورتالىقتان تولىققاندى اقپارات الاتىن بولادى. قايدا, قالاي, قاي باعىتپەن, قانشا ۋاقىتتا بارۋعا بولاتىنىن جانە قاي جەردە دەمالىس ورىندارى, ەمدەۋ ورتالىقتارى بار ەكەنى تۋرالى اقپاراتتى وسى ورتالىق بەرىپ وتىرادى. وبلىس اۋماعىنداعى بارلىق ساياحات ورىندارى, تۋريستىك فيرمالار تۋرالى اقپارات وسىندا شوعىرلانعان, – دەدى شىعىس قازاقستان وبلىسى اكىمىنىڭ ورىنباسارى دارحان ساپانوۆ.
بۇدان بولەك, وڭىردەگى تۋريستىك ورتالىقتار مەن ساياحات ورىندارى تۋرالى اقپارات پاراقتارى اۋەجايدا جانە ۆوكزالداردا دا بولادى. وسىلايشا, وبلىستا ءتۋريزمدى دامىتۋعا ناقتى قادام جاسالىپ جاتىر.
– ءبىز وبلىس ورتالىعىنا ات باسىن تىرەگەن كەز كەلگەن تۋريستكە قىزمەت كورسەتەتىن بولامىز. قاجەت بولسا, 24 ساعات قىزمەت ەتۋگە دايىنبىز. بۇل تۋريستىك ورتالىقتا وڭىردەگى بارلىق ساياحات ورىندارى مەن دەمالىس ورىندارى تۋرالى اقپارات بار. ەڭ قىزىعى, مۇندا التايدىڭ برەندتىك ونىمدەرى, قولونەر بۇيىمدارى ساۋدالاناتىن بولادى, – دەيدى وبلىستىق تۋريستىك اقپاراتتىق ورتالىعى باسشىسىنىڭ ورىنباسارى تالعات ورازگەلدى ۇلى لەنتاسى قيىلىپ, ەسىگى بۇگىن ايقارا اشىلعانىمەن, ەرتەڭگى كۇنى تۋريستەرگە شىنايى ءارى ساپالى قىزمەت كورسەتىلسە ەكەن دەستى جينالعان جۇرت.
– مەن تۋريستەرگە ارنالعان كيىم تىگۋمەن اينالىسامىن. ەندى وسى جەردە ءوز ونىمدەرىمدى ساتۋعا مۇمكىندىك تۋىپ وتىر. مۇنداي ورتالىقتىڭ اشىلعانى وتە دۇرىس بولدى. سەبەبى كەيبىر تۋريستەر بۇل ءوڭىردىڭ اۋا رايىن بىلمەيتىندىكتەن جەڭىل كيىممەن كەلەدى. ونداي جاعدايدا ءبىزدىڭ تاۋعا شىعۋعا, ساياحاتتاۋعا ارنالعان كيىمدەر دايىن تۇرادى. اقپاراتتىق ورتالىق جۇمىسىنىڭ جاندانۋىنا بارىنشا ۇلەسىمىزدى قوسامىز, – دەيدى «Altay outwear» برەندىن قالىپتاستىرۋشى كاسىپكەر سايات باۋىرجان ۇلى.
ەندى التايعا ات باسىن تىرەگەن تۋريست الدىمەن وسىناۋ ورتالىققا كەلىپ, باعىت-باعدارىن ايقىنداپ الۋىنا ابدەن بولادى. قايتىپ بارا جاتىپ اۋىلىنا ءتۇرلى كادەسىي دا الا كەتە الادى.
شىعىس قازاقستان وبلىسى
