فوتو: سەنات
جوبانىڭ ماقساتى - پارلامەنت دەپۋتاتتارىنىڭ, بارلىق دەڭگەيدەگى ءماسليحاتتاردىڭ, مەملەكەتتىك ورگانداردىڭ جانە قازاقستان حالقى اسسامبلەياسىنىڭ ءوزارا تۇراقتى ءىس-قيمىل جۇيەسىن ۇيىمداستىرۋ. سەناتور زاكيرجان كۋزيەۆ ۇلتتىق قۇرىلتاي وتىرىسىندا مەملەكەت باسشىسى جاڭا قوعامدىق ەتيكانى ورنىقتىرۋدا ورتالىق ورگاندار عانا ەمەس, سونىمەن قاتار وڭىرلىك بيلىك ءرولىنىڭ ماڭىزدىلىعىن دا اتاپ وتكەنىن ەسكە سالدى. قوعامدا وسكەلەڭ ءومىردى باعدار ەتەتىن جانە دۇنيەتانىمنىڭ اجىراماس بولىگىنە اينالاتىن ۇستانىمنىڭ كەڭىنەن قانات جايۋى ءۇشىن ءتيىمدى تەتىكتەر ىزدەۋ مەن ۇسىنۋ جانە ىلگەرىلەتۋدە ورتالىق پەن وڭىرلەر تىعىز بايلانىستا جۇمىس ىستەۋى كەرەك.
«جوبانى ىسكە اسىرۋ بارىسىندا حالىقتىڭ وزەكتى ماسەلەلەرى ايقىندالاتىن بولادى, ول پارلامەنت, ءماسليحاتتار دەپۋتاتتارىنىڭ جۇمىسىندا جانە ولاردىڭ ءوزارا ءىس-قيمىلىندا كورىنىس تابادى. ءبىز ءوز جۇمىسىمىزدا اسسامبلەيانىڭ جانە وكىلدى بيلىكتىڭ وزەكتى ماسەلەلەرى مەن مىندەتتەرىنىڭ بارلىق سالاسىن قامتيتىن بولامىز, سونداي-اق پارلامەنت پەن بارلىق دەڭگەيدەگى ءماسليحات دەپۋتاتتارىنىڭ قحا وكىلدەرى مەن ەتنومادەني بىرلەستىكتەر باسشىلارىنىڭ قاتىسۋىمەن جەرگىلىكتى جەردەگى ەتنوسارالىق قاتىناستار ماسەلەسىن تۇراقتى قاراۋدى قامتاماسىز ەتەمىز. ءبىزدىڭ جۇمىسىمىزدىڭ باستى باعىتى ارقاشان ەتنوالەۋمەتتىك شيەلەنىستىڭ ىقتيمال وشاقتارىن انىقتاۋ جانە الدىن الۋ بولۋى ءتيىس», دەدى زاكيرجان كۋزيەۆ.
سەناتور ولگا بۋلاۆكينا قازاقستاندا 100-دەن استام ەتنوس بار ەكەنىن اتاپ ءوتتى, بۇل ءبىزدىڭ ەلىمىزدى بەيبىت قاتار ءومىر ءسۇرۋ مەن ءوزارا سىيلاستىق دەموكراتيالىق قۇقىقتىق ازاماتتىق قوعام قۇرۋعا نەگىز بولعان الەمدەگى ەڭ كوپ ۇلتتى ەلدەردىڭ بىرىنە اينالدىرادى. «اسسامبلەيا. پارلامەنت. ءماسليحاتتار» جوباسىنىڭ اۋقىمىنداعى سىندارلى ديالوگ زاڭمەن بەكىتىلە وتىرىپ, قوعامدىق, كونفەسسياارالىق جانە ەتنوسارالىق كەلىسىمدى ساقتاۋدىڭ نەگىزگى قۇرالدارىنىڭ بىرىنە اينالادى. سونداي-اق ءپىسىپ-جەتىلگەن الەۋمەتتىك وزگەرىستەردى ۋاقتىلى جانە قولايلى شەشۋگە, لايىقتى ءومىر ءسۇرۋ جاعدايىن جاساۋعا ىقپال ەتەتىن بولادى.
شىعىس قازاقستان وبلىسى ءماسليحاتىنىڭ توراعاسى دەنيس رىپاكوۆ ءوز كەزەگىندە وڭىرلەر ءماسليحاتتارىنىڭ جانە قحا قۇرىلىمدارىنىڭ جۇمىسى تۋرالى ايتىپ بەردى. ماسەلەن, ءماسليحات توراعالارى مەن دەپۋتاتتار كەڭەستەردىڭ وتىرىستارىنا, وڭىرلىك سەسسيالارعا قاتىسادى جانە ەتنومادەني بىرلەستىكتەردىڭ وكىلدەرىمەن كەزدەسەدى. جوبانى ىسكە اسىرۋ بۇل جۇمىستى بارلىق وڭىرلەردە جۇيەلەۋگە, مەكەمەارالىق جۇمىس جوسپارلارى مەن جول كارتالارىن ازىرلەۋگە مۇمكىندىك بەرەدى.
