فوتو. اسىلحان سەيداحمەت
بيىلعى سۋ تاسقىنى سالدارىنان اقمولا وبلىسىندا بارلىعى 1 817 ءۇي سۋ استىندا قالدى, ونىڭ 359-ى اپاتتى دەپ تانىلسا, قالعان ۇيلەر جوندەۋگە بولاتىن باسپانالار ساناتىنا جاتقىزىلدى. قازىرگى ۋاقىتتا زارداپ شەككەندەرگە كەلتىرىلگەن زالال وتەلىپ, جاڭا ۇيلەر سالىنىپ, جان-جاقتى كومەك كورسەتىلىپ جاتىر.
ءدال سول ۋاقىتتا كومەك قولىن سوزعاندار كوپ بولدى. قانداي دا ءبىر ماسەلە بولماسىن, حالقىمىز بىرىگىپ, مۇقتاجدارعا كومەكتەسەتىنى جانعا جىلۋ ۇيالاتادى عوي. بارلىق ءوڭىر تۇرعىندارى, وتاندىق ۇيىمدار, ءىرى كومپانيالار, باۋىرلاس مەمەلكەتتەر گۋمانيتارلىق كومەك جيناپ, 10 اپاتتى وبلىسقا جونەلتكەن. كىشكەنتاي بۇلدىرشىندەر دە ەرەسەكتەرگە ءتان شەشىم قابىلداپ, تيىن-تەبەندەرىن شىعارعان. ادام بالاسىنان بولەك, ءتىپتى يت-مىسىقتار دا بوگەت تۇرعىزۋعا اتسالىسقانىن كوردىك.
بۇل رەتتە ەرىكتىلەردىڭ دە ەڭبەگىن ەرەكشە ايتا كەتكەن ءجون. «ۆولونتەرلىكتىڭ دامۋ دەڭگەيى - قوعام وركەنيەتىنىڭ بەلگىسى». اقمولا وبلىسىنداعى ەرىكتىلەر وسىلاي دەيدى. ولار اۋىر دەرتكە شالدىققاندارعا اقشا جيناۋعا, جالعىزباستى زەينەتكەرلەرگە ازىق-ت ۇلىك الىپ بەرۋگە, قوعامدا ءتارتىپ ورناتۋعا, باسپاناسىز قالعانداردى تاماقتاندىرۋعا, جوعالعان جەرلەستەرىن ىزدەۋگە, قاڭعىباس جانۋارلارعا مەيىرىم بەرۋگە جانە بالالاردىڭ تاربيەسىنە ۇلەس قوسۋعا كومەكتەسەدى. بۇگىندە ەرىكتىلەرگە دە قولداۋ كورسەتۋ شارالارى جاڭا سەرىپ الىپ كەلەدى.
سۋ تاسقىنى كەزىندە جەرلەستەرىنە قول ۇشىن سوزعان جانداردىڭ ءبىرى - انارگۇل ەرجانقىزى. كوكشەتاۋلىق ەرىكتىنىڭ ءومىر تاريحى كينو ستسەناريىنە ۇقساس دەۋگە بولادى. ونىڭ جوعارى ءبىلىمى بار, بىراق قان ورتالىعىندا سانيتار بولىپ جۇمىس ىستەيدى. 100 مىڭ تەڭگە كولەمىندە جالاقى الىپ, كوشە كەزىپ جۇرگەن ادامدارعا تاماق دايىنداپ, تاراتادى. كەزىندە كورشى مەملەكەتتەن قازاقستانعا كوشكەن ول دا ءبىراز ۋاقىت بويى باسپاناسىز جۇرگەن, وعان دا كومەك كورسەتكەندەر تابىلعان.
انارگۇل ەرجانقىزى «دوبروە سەردتسە Lider.kz» ۇيىمىنىڭ ۇجىمىنا قوسىلىپ, ءبىراز شارۋا اتقاردى.
«سۋ تاسقىنى كەزىندە تاماق ءپىسىرىپ, زارداپ شەككەندەرگە تاراتتىق. بۇل ىسكە ءبىزدىڭ ۇيىمنىڭ ەرىكتىسى يۋليا حانىم باستاماشى بولدى, دالاداعى قازان-وشاققا تاماق ءپىسىرىپ جاتقانىن كورىپ, ءبىز دە كىرىسىپ كەتتىك. سول كەزدە كۇن سۋىق بولدى, قار ەرىپ, كوشەلەردى سۋ باستى. قيىن ءارى كۇردەلى ساتتە بىرلىك پەن قامقورلىقتىڭ نە ەكەنىن تۇسىندىك. سۋ تاسقىنى رامازان ايىنا تۇسپا-تۇس بولعان ەدى, ورازا ۇستاعاندار كوپ بولدى. ەشكىمگە «جوق» دەمەدىك, تاڭەرتەڭ دە تۇندە دە جۇمىسىمىزدى ىستەدىك. قاجەتتى ازىق-ت ۇلىكتى كوكشەتاۋ تۇرعىندارى مەن باسقا ەرىكتىلەر جينادى», دەيدى كەيىپكەرىمىز.
ونىڭ ايتۋىنشا, قالا اكىمدىگى وبلىس اۋماعىندا بوگەتتەردى تۇرعىزۋ جۇمىستارىن, وزەن-كولدەردىڭ شامادان تىس تاسىپ كەتپەۋىن, كەلتىرىلگەن شىعىندى ەسەپتەۋ جانە باسقا دا ماڭىزدى ماسەلەلەرگە نازار اۋداردى. ال تۇرعىنداردى تاماقتاندىرۋ, ازىق-ت ۇلىك, كيىم-كەشەك تاراتۋ ىسىمەن ەرىكتىلەر كوبىرەك اينالىسقان, شىعىنداردىڭ باسىم بولىگىن «دوبروە سەردتسە Lider.kz» ۇيىمىنىڭ جەتەكشىلەرى وزدەرىنە العان.
«قارعىن سۋمەن كۇرەسكەن قۇتقارۋشىلاردى دا نازاردان تىس قالدىرماۋدى ءجون دەپ ەسەپتەدىك. ولارعا دا دالادا تۇرىپ تاماق پىسىردىك, سۋ باسقان ورىندارعا اپاردىق. بۇل ىستەن قالا تۇرعىندارى دا قالىس قالمادى. كوكشەتاۋلىقتارعا العىسىم شەكسىز», دەپ قوستى انارگۇل مۋشكانوۆا.
كوكشەتاۋلىق ەرىكتى مۇنداي تابيعي اپاتتار ەندى قايتالانباسا ەكەن دەپ تىلەيدى. حالىق اراسىندا جۇرگەن ۆولونتەر قوعام وسى سىندى كۇردەلى كەزەڭدەردە قاتتى قامىعىپ قالاتىنىن جاسىرمادى.
«تاسقىن كەزىندە باسپاناسىنان, مال-مۇلكىنەن ايىرىلىپ قالعان تۇرعىنداردى كوردىم. ونداي ماتەريالدىق زاتتار, ارينە, ادام دەنساۋلىعىنا قاراعاندا قۇنسىز. دەسە دە ءومىر بويى ەڭبەك ەتىپ, جىلدار بويى بالا-شاعا, وتباسى ءۇشىن جيعان-تەرگەننەن ءبىر ساتتە ايىرىلىپ قالۋ, ءۇيسىز قالۋ - وتە قيىن. وسىنىڭ بارلىعى ادامدى كۇيزەلىسكە ۇشىراتادى, بولاشاققا دەگەن سەنىمىن جويادى. ال ءبىز, سول جاندارعا ءۇمىت بەرگىمىز كەلدى», دەپ تۇيىندەدى انارگۇل ەرجانقىزى.
