- F توبىنىڭ العاشقى تۋرىن باستاعان تۇركيا مەن گرۋزيا قۇرامالارى اراسىنداعى تارتىس دورتمۋند قالاسىنداعى «سيگنال يدۋنا پارك» ستاديونىندا ءوتتى. ماتچ الدىندا ەكى قۇرامانىڭ قىزۋقاندى جانكۇيەرلەرى جاعا جىرتىسىپ, جۇدىرىق سىلتەسىپ تە الدى. قالا اسپانىن تورلاپ, جوڭكىلە كوشكەن بۇلت بۇركىپ جاڭبىر دا تولاسسىز جاۋىپ تۇردى. تابيعاتتىڭ توسىن مىنەزى دە, جانكۇيەرلەردىڭ تەكەتىرەسى دە تارتىستى ماتچتىڭ وتۋىنە كەدەرگى بولا المادى.
ءسوز جوق, ويىندا تارازىنىڭ اۋىر باسى تۇركيا قۇراماسىنا قاراي قيساياتىنى بەلگىلى ەدى. ولار ەۋروپا چەمپيوناتىنا التىنشى مارتە ات بايلاپ وتىر. 2008 جىلى جارتىلاي فينالعا دەيىن جەتىپ, قولا جۇلدە ولجالاعانى تاعى بار. وسىنداي ولشەمگە سالعان جاۋىرىنشىلار تۇركيا قۇراماسىنىڭ جەڭىسىنە ءشۇباسىز سەندى.
ويىننىڭ 25-مينۋتىندا مەرت ءمولدىر ەسەپ اشىپ, تۇركيا قۇراماسىن العا شىعارعان. 32-مينۋتتا جورج ميكاۋتادزە ەسەپتى تەڭەستىردى. گرۋزيا فۋتبولىنىڭ تاريحىنا ەسىمىن قاشاعان ميكاۋتادزە وسىلايشا ەۋروپا چەمپيوناتىندا تۇڭعىش گول سوققان فۋتبولشى اتاندى. ەكىنشى تايمدا سۇعىنا شابۋىلداپ, ەمىنە ەنتەلەگەن تۇرىكتەر دەگەنىنە جەتىپ توقتادى. تۇركيانىڭ مەسسيى دەگەن ماداققا يە 19 جاستاعى اردا گۇلەر 65-مينۋتتا الىستان شىرەنە تارتىپ, گيورگي ءمامارداشۆيليدى سان سوقتىرىپ كەتتى. ارگەنتينالىق تورەشى فاكۋندو تەلو نەگىزگى ۋاقىتقا 6 مينۋت قوسقان. گرۋزيندەر تارازى باسىن تەڭەستىرۋگە تايلى-تاياعىمەن شابۋىلدادى. ءتىپتى سوڭعى شابۋىلعا قاقپاشى ءمامارداشۆيليدىڭ ءوزى دە كەلگەن ەدى. تۇرىكتەردىڭ تاس قامال قورعانىسى تويتارىس بەردى. قارىمتا شابۋىلدا الا دوپتى الدىنا سالىپ انتالاي ۇمتىلعان كەرەم اقتۇرىكوعلى يەسىز قالعان قاقپاعا ءۇشىنشى گولدى توعىتتى. ەسەپ – 3:1. وسىلايشا, تۇرىكتەر ەۋروپا چەمپيوناتىنىڭ توپتىق كەزەڭىنەن شىعۋدىڭ قادامىن ءساتتى باستادى. 2021 جىلى وتكەن ەۋروپا چەمپيوناتىنىڭ توپتىق كەزەڭىندە وتكىزگەن ءۇش ماتچتىڭ بارلىعىندا ويسىراي ۇتىلعان تۇرىك فۋتبولشىلارى جەڭىسكە سۋساپ كەلگەندىگىن كورسەتتى.
- وسى توپتاعى كەزەكتى تارتىس لەيپتسيگ قالاسىندا ءوربىدى. 2016 جىلى ەۋروپا چەمپيونى اتانعان پورتۋگاليا قۇراماسى چەحيا ۇلتتىق قۇراماسىن 2:1 ەسەبىمەن ۇتتى. ماتچتىڭ اۋتسايدەرى سانالعان چەحيا فۋتبولشىلارى قىرىقتان اسقان پەپە, وعان تەتە رونالدۋ (39 جاستا) باستاعان كارى تارلانداردىڭ قىسپاعىنا توتەپ بەردى. ءتىپتى تەڭ دارەجەدە تارتىستى دەۋگە دە بولادى. ەۋروپا چەمپيوناتىنىڭ دۋىن 19 جاسىنان بەرى كورىپ كەلە جاتقان كريشتيانۋ رونالدۋ التىنشى مارتە الامانعا قوسىلىپ وتىر. 2004 جىلى 19 جاسىندا ەۋروپا چەمپيوناتىنىڭ كۇمىس جۇلدەسىن, 2012 جىلى قولا مەدالىن ولجالادى. 2016 جىلى پورتۋگاليا قۇراماسىنىڭ كاپيتانى رەتىندە الاڭعا جىگىتتەردى باستاپ شىققان رونالدۋ ەۋروپا چەمپيونى اتاندى. دەگەنمەن دە اڭىز فۋتبولشىنىڭ شاۋ تارتىپ قالعانى شابان قيمىلىنان اڭعارىلىپ-اق تۇردى. ايتپەسە, پورتۋگاليا فۋتبولىنىڭ تاريحىندا ەۋروپا چەمپيوناتىنا ەڭ كوپ قاتىسقان (25 ماتچ), قۇرلىق بىرىنشىلىگىنىڭ ەڭ ۇزدىك سۇرمەرگەنى (14 گول) اتانعان ساڭلاقتىڭ گول سوعاتىن مۇمكىندىگى بولدى. 7-مينۋتتا اۋەلەپ جەتكەن پاستى باسىمەن بۇرۋعا تالپىنعانىمەن, يىعىنا ءتيىپ, قيىس كەتتى. ودان كەيىن دە بىرنەشە مۇمكىندىگىن ءمۇلت جىبەرىپ الدى.
چەح فۋتبولشىلارى جۇلدىزدى قۇرامانىڭ داڭقىنان دا, داقپىرتىنان دا ىققان جوق. ءتىپتى ەسەپتى قوناقتار اشتى. 62-مينۋتتا پروۆود گول سوعىپ چەحيا قۇراماسى العا وزعان. 2023 جىلى پورتۋگاليا ۇلتتىق قۇراماسىنىڭ باس باپكەرى لاۋازىمىنا تاعايىندالعان روبەرتو مارتينەس الاڭ جيەگىندە ابدەن دەگبىرى قاشتى. 69-مينۋتتا پورتۋگاليا قۇراماسىنىڭ شابۋىلى ءساتتى اياقتالدى. اۋەلەپ جەتكەن پاستى نۋنۋ مەندەش ماڭدايىمەن سۇزە چەحيا قاقپاشىسى يندريح شتانەككە باعىتتاعان. قاقپاشى قاۋىپتى شابۋىلدىڭ بەتىن تويتارىپ, دوپتى قاققانىمەن, ورتالىق قورعاۋشى روبين گراناچتىڭ اياعىنا ءتيىپ اۆتوگول تىركەلدى. بيىلعى ەۋروپا چەمپيوناتىنىڭ العاشقى تۋرىندا اۆتوگول ءجيى سوعىلدى. ماتچتاعى جەڭىستى گولدى نەگىزگى ۋاقىتقا باس تورەشى ۇستەگەن قوسىمشا مينۋتتا سوعىلدى. كەزەكتى شابۋىلدى گولعا ۇلاستىرعان – فرانسيشكۋ كونسەيساۋ. 21 جاستاعى ساڭلاق ءومىر دەرەگىنە ەۋروپا چەمپيوناتىندا سوققان العاشقى گولىن جازدى. كونسەيساۋ – «پورتۋ» كلۋبىنىڭ شابۋىلشىسى. بۇل كلۋبتى فرانسيشكۋدىڭ اكەسى سەرجيۋ كونسەيساۋ باپتايدى. 2000 جىلى وتكەن ەۋروپا چەمپيوناتىندا جاسىنداي جارقىلداپ, گەرمانيا قۇراماسىنا 3 گول توعىتقان دا وسى سەريجۋ كونسەياۋ ەدى. اكەسىنىڭ تالىمىندەگى ساڭلاق الاڭعا 90-مينۋتتا شىققانىنا قاراماستان «التىن كەزدىك قاپ تۇبىندە جاتپايتىنىن» كورسەتتى. ەۋروپا چەمپيوناتىندا اكەسى دە, بالاسى دا ويناپ قانا قويماي گول سوققان ساڭلاقتار تىم سيرەك.
پورتۋگاليا قۇراماسى – ەۋروپا چەمپيوناتىنىڭ كۋبوگىن يەلەنۋدەن ءۇمىتتى كوماندانىڭ ءبىرى. كريشتيانۋ رونالدۋ سپورتتىق مانسابىنداعى سوڭعى قۇرلىق بىرىنشىلىگىن كوڭىلدى نوتادا اياقتاعىسى كەلەتىنى بەلگىلى.
كەشە ەۋروپا چەمپيوناتىنىڭ ەكىنشى تۋر ويىندارى ءوتتى. ۆ توبىندا حورۆاتيا قۇراماسى البانياعا قارسى ويناسا, ا توبىندا گەرمانيا – ماجارستان, شوتلانديا – شۆەيتساريا تارتىسقا ءتۇستى.
