جاقىندا قارا شاڭىراق قارساقبايدا بولعانىمىزدا, ولكەتانۋشى توڭبولات مۇحان ۇلىمەن كەزدەسۋدىڭ ءساتى ءتۇستى. ول ولكەنىڭ كەشەگىسىن دە, بۇگىنىن دە جاقسى بىلەتىن, قارساقبايعا قانداي قوناق كەلەدى, سولاردىڭ بارىمەن ديدارلاسىپ, اڭگىمە-دۇكەن قۇرۋعا ىنتىق كىسى. سول جولى ول كىسىدەن ءبىز دە ءبىر كەرەمەت اڭگىمە ەستىدىك.
«2023 جىلى قارساقبايعا الكەي مارعۇلاننىڭ قىزى, حالىقارالىق ءا.مارعۇلان قورىنىڭ ۆيتسە-پرەزيدەنتى دانەل مارعۇلان جانە زەيىن ساتباەۆتىڭ شوبەرەسى, ساياسي عىلىمدار دوكتورى, فيلوسوفيا, ساياساتتانۋ جانە ءدىنتانۋ ينستيتۋتىنىڭ جەتەكشى عىلىمي قىزمەتكەرى ءادىل ءجۇنىسوۆ كەلدى. ۇلىلاردىڭ ۇرپاعىن قۇراق ۇشا قارسى الدىق, جاقسى-جاقسى اڭگىمە-سىرعا قانىقتىق. ماعان, اسىرەسە ءادىلدىڭ اڭگىمەسى وتە قاتتى اسەر ەتتى», دەگەن توڭبولات اعا بىزگە سول اڭگىمەنى ادەمىلەپ وتىرىپ جەتكىزدى.
«ورازاي اعا ءشامشيابانۋ اپامىز ومىردەن وتكەن سوڭ, ونىڭ رۋحىن ايالاۋمەن, ارداقتاۋمەن ءوتتى. ءبىر كۇنى ۇيىنە بارسام, اعا ۇيدەگى زاتتاردى اقتارىپ الدەنە ىزدەستىرىپ جاتىر ەكەن. مەن «اعا, نە ىزدەستىرىپ ءجۇرسىز؟ مۇمكىن مەن بىلەتىن شىعارمىن», دەپ ەدىم, ول كىسى ء«شامشيابانۋدىڭ شاشى بار ەدى, ساقتاپ جۇرەتىنمىن, سونى تابا الماي جاتقانىم», دەدى. ال مەن بۇل جاعدايدان حاباردار ەدىم. ورازاي اعا بىردە ۇيدەگى قۇمىرالاردىڭ ىشىنەن اق شۇبەرەككە ورالعان شاشتى الىپ شىعىپ كورسەتكەن بولاتىن. سوسىن ونىڭ تاريحىن ايتقان ەدى. ءشامشيابانۋ اپامىز كەزىندە شاشىن قيدىرعاندا, قيىلعان شاشتى شاشتارازعا تاستاپ كەتپەي, ۇيىنە الىپ كەلىپ ساقتاپ قويعان كورىنەدى. اپاي دۇنيەدەن وتكەن سوڭ, ورازاي اعا ساعىنىشىن باسۋ ءۇشىن شۇبەرەككە ورالعان شاشتى الىپ, ءبىر مەزگىل يىسكەپ وتىرادى ەكەن. مەن ءبىر بارعانىمدا سونداي ءساتتىڭ ۇستىنەن تۇسكەنمىن. سوندا اعا ماعان: «ەرتەڭ مەن دۇنيەدەن وتكەندە اتا-بابامنىڭ جاتقان جەرىنە, قارساقبايداعى قورىمعا بارامىن. بىراق ءشامشيابانۋدىڭ مىناۋ شاشىن دا مەنىمەن بىرگە جەرلەڭدەر» دەپ, قولىنداعى اق شۇبەرەكتى قۇمىرانىڭ ىشىنە سالعان ەدى. شاماسى, سونى ەسىنەن شىعارىپ السا كەرەك. مەن دەرەۋ تاۋىپ بەردىم. سوندا اعا ماعان: «دۇرىس بولدى عوي, ەندى مۇنى كورىنەتىن, كەيىن ءوزىڭ قينالماي تاۋىپ الاتىن جەرگە اپارىپ قوي» دەپ تاپسىردى. اعانى قارساقبايداعى قورىمعا اكەلىپ جەرلەگەندە اپايدىڭ اق شۇبەرەككە ورالعان شاشىن دا بىرگە كومگەن بولاتىنبىز». توڭبولات اعانىڭ ءادىل جۇنىسوۆتەن ەستىگەن اڭگىمەسى وسى.
ورازاي باتىربەكوۆ كوپتەگەن جىل بويى پارتيا قىزمەتىندە بولعان, الماتى پارتيا مەكتەبىن ون ءۇش جىل باسقارعان ازامات ەدى. قانىش ساتباەۆتىڭ كۇيەۋ بالاسى بولۋ باقىتى بۇيىرعان ورەكەڭ دە تەكتى تۇقىمنىڭ تۇياعى بولاتىن. تۋعان جەردىڭ توسىندە تىنىستاۋدى ۇيعارعانى دا سول تەكتىلىكتىڭ ءبىر بەلگىسى دەسە بولعانداي. ال قانىش اتامىزدىڭ قىزى ءشامشيابانۋ اپامىزدىڭ قيىلعان شاشىن شاشتارازدا قالدىرىپ كەتپەي, ۇيىنە اكەلىپ ساقتاپ قويعانى دا, كەرەمەت ەمەس پە؟
ادەتتە ەرلى-زايىپتىلار و دۇنيەدە دە قاتار جاتقاندى قالايدى. سونىمەن بىرگە اتا-بابا قورىمى, كىندىك قانى تامعان توپىراقتا ماڭگىلىك جاي تابۋ دەيتىن قاستەرلى تۇسىنىكتەر دە بار. ورازاي اعامىز سول ەكەۋىن قالاي قيۋلاستىرا بىلگەن دەسەڭىزشى! ول ادال جارىنىڭ بۇرىمىن جانىنا الىپ, اتا-بابالارى جاتقان توپىراققا كەلىپ ماڭگىلىككە جاي تاپتى.
ۇلىتاۋ وبلىسى,
قارساقباي كەنتى
