فوتو: ءماجىلىستىڭ ءباسپاسوز قىزمەتى
دەپۋتاتتىڭ ايتۋىنشا, الەۋمەتتىك جەلىلەردە قازاقتىڭ ۇلتتىق قۇندىلىقتارىنا اقپاراتتىق شابۋىل جاسالىپ جاتىر.
«بابادان قالعان ەڭ قاستەرلى مۇرامىزدىڭ ءبىرى – كيىز ءۇي ەدى. سان عاسىر بويى حاندارىمىزعا ەڭسەسى بيىك اق وردا, حالقىمىزعا قۇت ۇيالاعان باسپانا بولعان سول كيىز ۇيگە جانە باسقا دا قۇندىلىقتارىمىزعا اقپاراتتىق شابۋىل دا باستالدى. كۇنى كەشە ويۋلاعان كيىز ۇيدە ۇلتتىق كيىم كيىپ, جارتىلاي جالاڭاشتانىپ ويقاستاعان ۇشەۋدىڭ الەۋمەتتىك جەلىنى شارلاعان بەينەروليگى قازاقتىڭ اشۋ-ىزاسىن تۋدىرىپ وتىر. حالىقتىڭ بۇعان نارازىلىعى ابدەن ورىندى. ەڭ اياۋلى دۇنيەڭدى اياققا تاپتاسا, ۇلتتىق كيىممەن جالاڭاشتانسا, تورىڭدە اۋرەتىن اشىپ تايراڭداسا – بۇل بۇكىل ۇلتتى, دەنى قازاق, رۋحى بيىك ەلىمىزدى قورلاۋمەن پارا-پار. ەڭ سوراقىسى – الگى جىن-ويناقتاعى ءۇش ۇزىننىڭ ورتاداعى «سيراقتى پريماسى» ەز ەكەن», دەيدى ول دەپۋتاتتىق ساۋالىندا.
سامات مۇساباەۆ اتاپ وتكەندەي, بۇل – حالقىمىزعا قارسى مىسىق تىلەۋلى, تەرىس نيەتتىلەردىڭ الدىن الا جەتە ويلاستىرىپ, قازاقى دۇنيەنى, ۇلتتىق قۇندىلىقتاردى قۇنسىزداندىرۋعا, مازاق ەتۋگە باعىتتالعان قاساقانا جاۋلىق ارەكەتى.
«تال تۇستە تورىمىزدە تايراڭداعانى – ناعىز باسىنعاندىق. ولار بۇگىن تورىمىزدە تايراڭداسا, ەرتەڭ توبەمىزدە ويناماسىنا كىم كەپىل؟! سوندىقتان بۇعان كوز جۇمىپ قاراپ, جاي قالدىرا سالۋعا بولمايدى. «الباستى قاباققا قاراپ باسادى» دەگەن. بۇل بىرىنشىدەن, قوعامنىڭ وسى ارەكەتكە قالاي ءۇن قاتاتىنىن بايقايىن دەگەن استىرتىن سىر تارتۋ ءتاسىلى بولسا, ەكىنشىدەن, لگبت ناسيحاتىنا توسقاۋىل قويماق تالاپقا دەگەن اشىق قارسىلىق, ۇشىنشىدەن, وسكەلەڭ بۋىندى ءوز ۇلتتىق قۇندىلىقتارىنان جەرىندىرۋ ارەكەتى», دەپ تولىقتىردى دەپۋتات.
ونىڭ ايتۋىنشا, بۇل ماسەلە وتكەن جىلى دا ءماجىلىس مىنبەرىنەن كوتەرىلىپ, بارلىق پلاتفورمالاردا, الەۋمەتتىك جەلىلەردە ۇلتتىق مادەنيەتكە سايكەس كەلمەيتىن اقپاراتتىق ونىمدەردى تاراتۋعا تىيىم سالۋعا, تەرىس اعىمداردى ناسيحاتتايتىن اقپارات كوزدەرىنەن ساقتايتىن زاڭ نورمالارىن ازىرلەۋ ۇسىنىلعان ەدى.
ايتا كەتەيىك, تاياۋدا قوعام بەلسەندىلەرى لگبت ناسيحاتىنا قارسى پەتيتسيا جاريالاعان. نەبارى 2 اپتا ىشىندە پەتيتسيانى 50 مىڭ ادام قولدادى.
«الدا وتەتىن پەتيتسيا قورىتىندىسىن قاراۋ وتىرىسىنا قوعام بەلسەندىلەرىن, ۇلت جاناشىرلارىن بەلسەنە قاتىسۋعا شاقىرامىن. بەينەروليكتەگى ۇلتتىق قۇندىلىقتارىمىزدى قورلاۋ كورىنىسى – ابدەن شەكتەن شىققاندىق. سوندىقتان قۇقىق قورعاۋ ورگاندارى وسى ماسەلە بويىنشا ناقتى قۇقىقتىق باعاسىن بەرۋى ءتيىس. بۇدان بىلاي ۇلتتىق قۇندىلىقتارىمىز – دومبىرا, قوبىز, كيىز ءۇي, ۇلتتىق كيىم, ۇلتتىق تاعام سەكىلدى اسىل جادىگەرلەرىمىزدى قانداي-دا تەرىس ماقساتتا پايدالانۋ, مازاق ەتۋ – ۇلت نامىسىنا قول سۇعۋ, ۇلتتىڭ بەدەلىن تۇسىرۋگە باعىتتالعان قىلمىستىق ارەكەت دەپ باعالانىپ, قىلمىستىق جاۋاپتىلىقپەن جازالانۋى ءتيىس», دەپ تۇيىندەدى دەپۋتات.
وسى ورايدا سامات مۇساباەۆ اتالعان بەينەروليك بويىنشا قۇقىقتىق باعا بەرىلىپ, وعان قاتىستى ناقتى شارا قولدانۋدى سۇرادى.
