2023–2024 جىلدارداعى ماۋسىمنىڭ فينالىندا «قايرات» پەن «سەمەي» سايىسقا ءتۇستى. العاشقى ءۇش ويىننىڭ ناتيجەسى بويىنشا داۆي پەرەيرا دە مەندونكانىڭ شاكىرتتەرى 2:2 ەسەبىمەن الدا كەلە جاتتى. شەشۋشى ءتورتىنشى ماتچ تا وتە شيەلەنىستى ءوتتى. ءبىرىنشى تايمنىڭ وزىندە قوس كوماندا ءبىر-ءبىرىنىڭ قاقپاسىنا ءۇش گولدان سالدى – 3:3. ۇزىلىستەن كەيىن الماتىلىقتار الىمدى كورىنگەنىمەن, قارسى جاقتىڭ قورعانىس شەبى ساۋاتتى وينادى. تابلوداعى ەسەپ وزگەرمەگەننەن كەيىن ەكسترا-تايم بەلگىلەندى. قوسىمشا ۋاقىتتا كايو توررەس نىسانانى ءدال كوزدەدى. بۇل – سەمەيلىكتەردىڭ ساپىنداعى برازيليالىق لەگيونەردىڭ وسى كەزدەسۋدەگى ءۇشىنشى گولى! حەت-تريك! دەسەك تە كوپ ۇزاماي اليسون تارازى باسىن تەڭەستىردى – 4:4.
باسەكە تەڭ اياقتالعاننان سوڭ پەنالتيلەر سوعىلدى. بۇل تارتىستا «سەمەيدىڭ» اسىعى الشىسىنان ءتۇستى – 3:1. ءسويتىپ, بىلتىر عانا ىرگەتاسىن قالاعان اباي وبلىسىنىڭ كومانداسى ەل چەمپيونى اتاندى. ال مارلونا ۆەلاسكو باپتاعان جىگىتتەر كۇمىس مەدالدى قاناعات تۇتتى. «ناعىز سەنساتسيا!» دەپ وسىنى ايتىڭىز.
ەستەرىڭىزگە سالا كەتەيىك, كەلەسى جىلى 30 جىلدىق مەرەيتويىن تويلاعالى وتىرعان «قايرات» 2003-2024 جىلدار ارالىعىندا قاتارىنان 20 رەت قازاقستان چەمپيونى اتاندى. 18 مارتە ەل كۋبوگىن جانە 8 رەت سۋپەركۋبوكتى ولجالادى. سونداي-اق الماتىلىقتاردىڭ ۋەفا چەمپيوندار ليگاسىنىڭ ەكى دۇركىن جەڭىمپازى (2012/13, 2014/15) جانە قۇرلىقارالىق كۋبوكتىڭ يەگەرى (2014) دەگەن اتاعى بار.
