تورتكۇل دۇنيە جانكۇيەرلەرى ءتورت جىل بويى تاعاتسىزدانا كۇتكەن ءدۇبىرلى دوپ دوداسىنا گەرمانيا وتە جاقسى دايارلانعان ەكەن. اشىلۋ سالتاناتىنداعى كەرەمەت كورىنىستەردى ايتپاعاندا, تۇساۋكەسەر باسەكە بارىسىندا دا ول انىق اڭعارىلدى. ماتچ باستالعان بەتتە تىزگىندى بىردەن قولعا العان نەمىستەر شوتلانديا قۇراماسىنىڭ قاقپاسىنا تولاسسىز شابۋىلدار ۇيىمداستىردى. الاڭ يەلەرىنىڭ قارقىنىنا قوناقتار 10 مينۋت قانا شىدادى. سودان كەيىن ولاردىڭ قورعانىس شەبى سىر بەردى. ناتيجەسىندە, 10-مينۋتتا «ەۋرو-2024» تۋرنيرىندەگى العاشقى گولدى 21 جاستاعى «بايەردىڭ» بەتكەۇستارى فلوريان ۆيرتتس سوقتى. ونىڭ قاقىراتا تەپكەن دوبى باعاناعا ءتيىپ بارىپ, نىساناعا ءدوپ ءتۇستى. ارادا ءسال عانا ۋاقىت وتكەندە ءۆيرتتستىڭ قۇرداسى, «باۆاريانىڭ» حاۆبەگى دجامال مۋسيالا ەسەپتى ەسەلەدى. ءبىرىنشى تايمنىڭ سوڭىندا ءوز ايىپ الاڭىندا يلكاي گيۋندوگانعا قارسى ويىن ەرەجەسىن بۇزعانى ءۇشىن رايان پورتەۋس قىزىل قاعاز الدى. «ارسەنالدىڭ» جارتىلاي قورعاۋشىسى كاي حاۆەرتس 11 مەترلىك نۇكتەدەن ءمۇلت كەتكەن جوق.
ەكىنشى كەزەڭ بەل ورتادان اۋعان تۇستا نيكلاس فيۋللكرۋگ ءتورتىنشى گولدى سوقتى. 87-مينۋتتا قاقپاعا باعىتتالعان دوپتى كەرى قايتارماق بولعان انتونيو ريۋديگەر ونى ءوز قاقپاسىنا ەنگىزدى. ويسىراي ۇتىلىپ جاتقان شوتلانديالىقتار بۇل گولعا اسا ءبىر قۋانا قويعان جوق. ال باسەكە اياقتالار تۇستا ەمرە دجان سوڭعى نۇكتەنى قويدى. ەسەپ – 5:1.ءسويتىپ, ەۋروپا چەمپيوناتىنىڭ تۇساۋكەسەر كەزدەسۋى «اليانس-ارەناعا» جينالعان 66 000 كورەرمەن مەن كوگىلدىر ەكرانعا كوز تىككەن جەر-جاھاننىڭ سان ميلليون جانكۇيەرىنە كوتەرىڭكى كوڭىل كۇي مەن كەرەمەت ەموتسيالار سىيلادى.
كەلندەگى «رەين ەنەرگي» ستاديونىندا ماجارستان مەن شۆەيتساريا شەبەرلىك بايقاستى. بۇل باسەكە الپى تاۋى ەتەگىنەن كەلگەن اياقدوپ شەبەرلەرىنىڭ باسىمدىعىمەن ءوتتى. 13-مينۋتتا كۆادۆو دۋا ەسەپ اشسا, 45-مينۋتتا ميشەل ەبيشەر دوپتى توردا تۋلاتتى. 66-مينۋتتا بارناباش ۆارگا سوققان گول ماجارستاندىقتاردىڭ ءۇمىت وتىن وياتتى. دەسەك تە 90-مينۋتتا برەل ەمبولو ولاردىڭ سەنىمىن تۇبەگەيلى سەيىلتتى – 1:3.
* * *
كوپ ۇزاماي ۆ توبىنداعى باسەكەلەر باستالىپ, جاسىل الاڭعا يسپانيا مەن حورۆاتيانىڭ فۋتبولشىلارى شىقتى. بەرليندەگى «وليمپياشتاديونعا» جينالعان 68 844 جانكۇيەر ازۋلى قوس كوماندادان تارتىسقا تولى ايقاس كۇتكەن ەدى. بىراق پيرەنەي تۇبەگىنەن كەلگەن جىگىتتەر قارسىلاستارىنا ادىم اشتىرمادى. ۇزىلىسكە دەيىن الۆارو موراتا, فابيان رۋيس جانە داني كارۆاحال قاتارىنان ءۇش دوپتى قاقپاعا توعىتتى. حورۆاتتاردىڭ جالعىز گولمەن جاۋاپ قايىرۋعا دا شامالارى جەتپەدى. ەكىنشى تايمدا دا وسى ەسەپ ساقتالدى – 3:0.
يتاليا مەن البانيا اراسىنداعى باسەكە باستالعان بەتتە قورعاۋشى فەدەريكو ديماركو دوپتى اۋتتان لاقتىرعان كەزدە ورەسكەل قاتەلىك جىبەردى. كەرەمەت مۇمكىندىكتى نەديم بايرامي ۇتىمدى پايدالانىپ, 22-سەكۋندتا البانيالىقتاردى العا شىعاردى. بۇل – ەۋروپا چەمپيوناتى تاريحىنداعى ەڭ جىلدام سوعىلعان گول! بۇعان دەيىنگى رەكورد رەسەيلىك دميتري كيريچەنكوعا تيەسىلى ەدى. 2004 جىلى پورتۋگاليادا وتكەن جارىستا ول گرەكيا قۇراماسىنىڭ قاقپاسىن 68-سەكۋندتا ءدال كوزدەدى.
الايدا البانيا فۋتبولشىلارىنىڭ قۋانىشى ۇزاققا سوزىلمادى. لەزدە-اق ەس جيعان يتاليا قۇراماسى قارسى جاقتىڭ ايىپ الاڭىنا قايتا-قايتا باسا-كوكتەپ ەنىپ, ولاردى ءبىراز ابىگەرگە سالدى. اقىرى 11-مينۋتتا الەسساندرو باستوني مەن 16-مينۋتتا نيكولو بارەللا مەرگەندىك تانىتتى. وسىلايشا, باس-اياعى بەس مينۋت ارالىعىندا «سكۋادرا ادزۋررانىڭ» سايىپقىراندارى العا شىقتى – 2:1. بۇل ەسەپ ويىننىڭ سوڭىنا دەيىن وزگەرگەن جوق.
* * *
D توبىنداعى پولشا مەن نيدەرلاند قۇرامالارى اراسىنداعى ماتچ وتە شيەلەنىستى ءوتتى. پولياكتاردىڭ باستى جۇلدىزى روبەرت لەۆاندوۆسكي جاراقاتىنا بايلانىستى جاسىل الاڭعا شىقپادى. سوعان قاراماستان ميحال پربەجدىڭ كومانداسى وتە جاقسى ويناپ, العاشقى گولدى 16-مينۋتتا ادام بۋكسا سوقتى. بۇل جاعداي قىزعالداقتار ەلى وكىلدەرىن ەش قاناعاتتاندىرماعانى انىق. سودان ولار قارسىلاستار قاقپاسىن تورۋىلداۋعا كوشتى. اراعا سەگىز مينۋت سالىپ كودي گاكپو تارازى باسىن تەڭەستىردى. سودان كەيىن دە رونالد كۋماننىڭ شاكىرتتەرى قارقىندارىن ەش باسەڭدەتكەن جوق. پولشانىڭ فۋتبولشىلارى دا ايانباي ايقاستى. بىراق 83-مينۋتتا ۆاۋت ۆەگحورست ۆويتسەح ششەنسنىي قورعاعان قاقپادان ساڭلاۋ تاۋىپ, نيدەرلاندقا جەڭىس سىيلادى – 2:1.
جەكسەنبىدەن دۇيسەنبىگە قاراعان ءتۇنى س توبىنداعى كوماندالار كۇش سىناستى. 17-مينۋتتا كريستيان ەريكسەن مەرگەندىك تانىتقاندا, شتۋتگارتتاعى «محپ-ارەناعا» جينالعان 54 000 كورەرمەن «ەندى دانيا قۇراماسى اتالعان جارىسقا ەكىنشى رەت قانا قاتىسىپ وتىرعان سلوۆەنياعا باس كوتەرتپەيتىن شىعار» دەپ ويلادى. بىراق مۇلدە ولاي بولمادى. ارادا تۋرا جارتى ساعات وتكەندە ماتياج كەك جاتتىقتىراتىن كوماندا ەسەپتى تەڭەستىردى – 1:1. ول گولدى ەريك يانزا سوقتى.
گەلزەنكيرحەندەگى «فەلتينس-ارەنادا» سەربيا مەن انگليانىڭ فۋتبولشىلارى شەبەرلىك بايقاستى. 50 مىڭعا جۋىق جانكۇيەر تاماشالاعان باسەكەنىڭ تاعدىرىن 13-مينۋتتا بريتانيالىق جارتىلاي قورعاۋشى دجۋد بەللينگەمنىڭ سوققان جالعىز گولى شەشتى – 0:1.
* * *
ە توبىنداعى جارىستى رۋمىنيا مەن ۋكراينانىڭ فۋتبولشىلارى باستادى. بۋكمەكەرلەر سەرگەي رەبروۆتىڭ كومانداسىن وسى ماتچتىڭ ءفاۆوريتى رەتىندە تانىدى. بۇل پايىم نەگىزسىز ەمەس ەدى. ويتكەنى ولاردىڭ ساپىندا ارتەم دوۆبيك (لا ليگانىڭ سۇرمەرگەنى), ميحايل مۋدريك («چەلسيدىڭ» ترانسفەرلىك رەكوردشىلارىنىڭ ءبىرى), اندرەي لۋنين (ۋەفا چەمپيوندار ليگاسىنىڭ جەڭىمپازى), الەكساندر زينچەنكو (اپل-داعى بەلدى ويىنشىلاردىڭ ءبىرى), سونداي-اق, نيكولاي ماتۆيەنكو, تاراس ستەپانەنكو, ۆيكتور تسىگانكوۆ, اندرەي يارمولەنكو, گەورگي سۋداكوۆ, رومان يارەمچۋك, رۋسلان مالينوۆسكي سىندى دۇدۇلدەر بار. سوعان قاراماستان كيەۆتەن كەلگەن جىگىتتەردىڭ سول كەشتە ويىنى ەش جۇرمەدى. ناتيجەسىندە, ۋكراينالىقتار ميۋنحەندە 0:3 ەسەبىمەن جەڭىلىستىڭ كەرمەك ءدامىن تاتتى. بۇل گولداردىڭ اۆتورلارى – نيكولاە ستانچۋ, رەزۆان مارين جانە دەنيس درەگۋش.
كەلەسى ويىندا وسى چەمپيوناتتاعى العاشقى سەنساتسيالىق ناتيجە تىركەلدى. كىلەڭ جۇلدىزداردان جاساقتالعان بەلگيا قۇراماسى ماينەدەگى فرانفكۋرتتە سلوۆاكياعا ەسە جىبەردى. 7-مينۋتتا يۆان شرانتس نىسانانى ءدال كوزدەدى – 0:1. وسى ەسەپ كەزدەسۋدىڭ سوڭىنا دەيىن ساقتالدى. ءسوز ورايى كەلگەندە, 57 جانە 88 مينۋتتاردا رومەلۋ لۋكاكۋدىڭ ەكى رەت مەرگەندىك تانىتقانىن ايتا كەتەيىك. بىراق VAR جۇيەسىنە جۇگىنگەن تورەشى بەلگيالىق سۇرمەرگەننىڭ گولدارىن ەسەپكە المادى.
دۇيسەنبىدەن سەيسەنبىگە قاراعان ءتۇنى D توبىنداعى اۋستريا مەن فرانتسيانىڭ فۋتبولشىلارى كەزدەستى. بۇل باسەكەدە دە ءبىر عانا دوپ سوعىلدى. ونىڭ ءوزى – اۆتوگول. 38-مينۋتتا قارسىلاستارىنىڭ ايىپ الاڭىندا بىرنەشە قورعاۋشىنىڭ اراسىنان سىتىلىپ شىققان كيلليان مباپپە قاقپانىڭ وڭ بۇرىشىنان ارىپتەستەرىنە پاس بەرەدى. سونى قايتارماق بولعان ماكسيميليان ۆەبەر دوپتى باسپەن ۇرىپ, ءوز قاقپاسىنا ەنگىزدى – 0:1.
