جامبىل جاباەۆ, بالۋان شولاق سەكىلدى ءداۋىر دارابوزدارىمەن رۋحاني بايلانىس ورناتقان داڭقتى ونەر يەسى بۇگىندە قازاق-قىرعىز حالقىنا ورتاق تۇلعاعا اينالىپ وتىر. سودان دا بولسا كەرەك, قورداي توپىراعىندا وتكەن «الاتاۋدىڭ بۇلب ۇلى» اتتى حالىقارالىق فەستيۆالعا اسىققان الاتاۋدىڭ ارعى بەتىندەگى سۇيەگىنە ونەر قونعان وعلاندار ءتاڭىرتاۋدىڭ بەرگى بەتىنە استى, ولاردى قوردايلىقتار باۋىرعا باستى.
ءيا, مەرەيتوي اياسىندا ۇيىمداستىرىلعان ءىس-شاراعا ايىر قالپاقتى اعايىنداردىڭ اقىندارى مەن ماناسشىلارى ارنايى ات باسىن بۇردى. كەنەن ونەرىنە باس يگەن ولار وسىلايشا ءىلتيپات كورسەتتى. ءوڭىردىڭ ايتىسكەرلەرى مەن جىرشى-تەرمەشىلەرى دە قورداي تورىنەن تابىلىپ, اۋداندىق مادەنيەت ۇيىندە وتكەن ءىس-شارانىڭ كوركىن قىزدىردى.
«قوردايدىڭ عانا ەمەس, قازاق دالاسىنىڭ ماقتانىشىنا اينالعان كەنەن ازىرباەۆتىڭ مەرەيتويىنا وراي قولعا الىنعان ءىس-شاراعا ەلىمىزدىڭ ءار قيىرىنداعى تالانتتار عانا ەمەس, باۋىرلاس ەلدىڭ ماناسشىلارى مەن اقىندارى دا كەلىپ جەتتى. بۇل – ءبىز ءۇشىن ۇلكەن مارتەبە. وسىلايشا, ولار اقىننىڭ مۇراسىنا قۇرمەت كورسەتىپ وتىر. وسىنىڭ ءوزى-اق داڭقتى دارىن يەسىنىڭ مۇراسى ەشقاشان ولمەيتىندىگىن ايقىنداپ تۇر ەمەس پە؟» دەيدى اۋدان اكىمى بەكزات بولاتبەكوۆ.
قوڭىرلاتىپ ءان سالعان قوردايلىق ونەرپازدار قوناقتاردى ءسان-سالتاناتىمەن كۇتىپ العان سوڭ اۋدان باسشىسى كورشى ەلدەن كەلگەن مارتەبەلى مەيماندارعا دەگەن قۇرمەتىن كورسەتىپ, ارنايى سىي-سياپات ۇسىندى. ۋاقىتىندا تالاي ءىرى دودادا اتوي سالعان كۇمىسكۇل سارسەنباەۆا جىردان شاشۋ شاشىپ, ەكى ەل اراسىنداعى دوستىق پەن باۋىرمالدىقتى شۇرايلى شۋماقتارىنا ارقاۋ ەتتى.
ەلدىك پەن بىرلىك, باۋىرمالدىق ماسەلەلەرى, كەنەن شىعارماشىلىعى اڭگىمەگە ارقاۋ بولعان ءىس-شارا بارىسىندا قىرعىزداردى باستاپ كەلگەن ازيز بيمىرزا ۇلى مەن وبلىستىق ايتىس اقىندارى مەن جىرشى-تەرمەشىلەر وداعىنىڭ توراعاسى احمەتجان وزبەكوۆ ەكى ەلدىڭ ءتول ونەرىن وركەندەتۋگە باعىتتالعان مەموراندۋمعا قول قويدى.
ۇلتتىق ونەردىڭ ورىنە شىعىپ, تورىندە قالعان كەنەن ازىرباەۆ مۇراسى دارىپتەلگەن فەستيۆال بارىسىندا ەكى ەلدىڭ ونەرپازدارى ونەرلەرىن ورتاعا سالدى.
ايىرقالپاقتى اعايىندار تاراپىنان بىرنەشە ەلارالىق ايتىستىڭ جەڭىمپازى مامبەتتوكتو مامبەتوروزو, ماناسشى تولوبەك مۇسا ۇلى, توكپە اقىن تۋرات جۇماشەۆ, تەرمەشى باكىت اكماتوۆ ساحناعا كوتەرىلسە, قازاقتار جاعىنان «جەتى قازىنا» جوباسىنىڭ جۇلدەگەرى مەرەي ابۋەۆا, كۇيشى ديدار باسىقاراەۆ, ايتىسكەر اقىندار اسەت دۇيسەباەۆ پەن نۇرلىبەك قۇرمانوۆ ونەر كورسەتتى.
ەكى ەلدىڭ ءسوز ۇستاعان ازاماتتارى بۇل كۇنى القىن-جۇلقىن ايتىسقا ءتۇسىپ, قانداي دا ءبىر بايگەگە تالاسقان جوق. كەنەن مۇراسىنىڭ تەرەڭدىگى مەن كەمەلدىگى, ومىرشەڭدىگى تۋرالى تەرەڭنەن تولعاندى. ەلدىك پەن بىرلىكتى, باۋىرلاس ەلدەردىڭ تاتۋلىعىن شۇرايلى شۋماقتارىنا سىيعىزىپ, پەندەشىلىك اتاۋلىعا پاراسات بيىگىنەن قارادى.
كەيىننەن جامبىلدىق ايتىسكەرلەر مەن قىرعىز ەلىنەن كەلگەن ونەرپازدار شاعىن فۋتبولدان جولداستىق كەزدەسۋ وتكىزىپ, اششى تەرىن شىعاردى. مۇندا دا دوستىق جەڭدى. ايتسە دە, قوناق سىيلاپ ۇيرەنگەن جامبىلدىق وعلاندار فۋتبولعا تىگىلگەن جۇلدەنى قوناقتارعا تارتۋ ەتىپ, كىسىلىك كورسەتتى.
جامبىل وبلىسى,
قورداي اۋدانى
