كەشە عانا رەسپۋبليكاداعى ۇزدىك ون اۋىل مەكتەبىنىڭ ءبىرى بولىپ تانىلعان م.اتىموۆ اتىنداعى مەكتەپتىڭ تۇلەگى نۇرساۋلە ءجۇسىپ 2022-2023 وقۋ جىلىندا «جارقىن بولاشاق» وليمپياداسى مەن «بىلگىرلەر سايىسى» اتالىمىندا جانە رەسپۋبليكالىق اۋىل بالالارىنا ارنالعان جالپى ءبىلىم بەرەتىن پاندەر بويىنشا وليمپياداسىندا توپ جاردى. سونداي-اق وقۋ-اعارتۋ مينيسترلىگىنىڭ «ۇزدىك اۋىل مەكتەبىنىڭ وقۋشىسى – 2024» اتاعى مەن بيىلعى وقۋ جىلىندا رەسپۋبليكالىق جالپى ءبىلىم بەرەتىن پاندەر بويىنشا وليمپيادانىڭ رەسپۋبليكالىق كەزەڭىنەن ەكىنشى ورىن يەلەندى. ءبىلىم دودالارىنان جۇلدەسىز ورالماعان وقۋشى ۇزدىك جەتىستىكتەرى ناتيجەسىندە, اتىراۋ قالاسىنداعى حالەل دوسمۇحامەد ۇلى اتىنداعى پەداگوگيكالىق ۋنيۆەرسيتەتىنىڭ وقۋ گرانتىن ۇتىپ الدى.
وتباسىنداعى ءتورت بالانىڭ ۇلكەنى, ياعني اتا-اناسىنىڭ تۇڭعىشى نۇرساۋلە كىشكەنتايىنان ونەرگە, وقۋعا قۇمار بولىپ وسكەن.
– بەس جىل ونەر مەكتەبىنىڭ دومبىرا سىنىبىندا وقىدىم. ونى ۇزدىك اياقتادىم. ولەڭ جازعاندى جاقسى كورەمىن. سىڭلىلەرىم جۇلدىزاي مەن ۇلدانا دا ونەر مەكتەبىنىڭ قولونەر سىنىبىندا وقيدى, – دەيدى نۇرساۋلە. جاس تۇلەك قازاق ءتىلى مەن ادەبيەتى ءپانىنىڭ مۇعالىمى بولۋدى ماقسات ەتىپ وتىر.
ۇبت-دا جوعارى بالل جيناپ, ماڭعىستاۋ مەكتەپتەرىنىڭ مەرەيىن اسىرعان نۇرساۋلەنىڭ قۇرداستارى از ەمەس. سونىڭ ءبىرى – اقتاۋ قالاسىنداعى تۇتقاباي اشىمباەۆ اتىنداعى №11 ليتسەيدىڭ وقۋشىسى جانسايا احمەتوۆا. ول گەوگرافيا-ماتەماتيكا ءپانىن تاڭداپ, ۇبت-دان 136 بالل جينادى. جانسايا ماتەماتيكا ءپانى بويىنشا رەسپۋبليكالىق «التىن تۇلەك» وليمپياداسىنىڭ ءبىرىنشى ورىن يەگەرى. سونىمەن بىرگە ءاليحان بوكەيحان اتىنداعى رەسپۋبليكالىق پاندىك وليمپياداسىنىڭ وبلىستىق كەزەڭىندە جەڭىمپاز اتاندى. ال تۇپقاراعان اۋدانى اقشۇقىر اۋلىنداعى اقشۇقىر مەكتەپ-ليتسەيىنىڭ تۇلەگى ايدا ەرمۇقان ينفورماتيكا-ماتەماتيكا ءپانىن تاڭداپ, 134 بالل جينادى.
– نەگىزگى پاندەردەن ءتيىستى ۇپايدىڭ بارلىعىن جيناعان تۇلەگىمىزبەن ماقتانامىز. وسى تۇستا ايدانىڭ ماتەماتيكا پانىنەن تولىق بالدى ەنشىلەۋىندە ماتەماتيكا ءپانىنىڭ مۇعالىمى وسەر اعايىنىڭ ەڭبەگى ەرەكشە ەكەنىن اتاپ وتكىم كەلەدى. جىل باسىنان بەرى ۇنەمى بايقاۋ سىناقتارىنان 120-دان جوعارى بالل جيناپ جۇرگەن ءبىلىمدى تۇلەگىمىزدەن كەلەسى مۇمكىندىكتە دە جوعارى ناتيجە كۇتەمىز, – دەيدى مەكتەپ ديرەكتورى قالامقاس تىلەۋباەۆا.
قۇربىلارىنىڭ جەڭىستى جولىن اقتاۋ قالاسىندا №12 مەكتەپتىڭ وقۋشىسى مادينا رامازانوۆا دا جالعاستىرىپ, ءوزى تاڭداعان فيزيكا-ماتەماتيكا ءپانى باعىتى بويىنشا 128 بالل جينادى.
وڭىردە ۇبت ءالى جالعاسىپ جاتىر. تۇلەكتەردىڭ باعى جانىپ, ءبىلىم شامشىراعى مازداي بەرگەي.
ماڭعىستاۋ وبلىسى
