سۋرەتتى تۇسىرگەن – م. اياعانوۆ
اققۋلى اۋدانىنا قارايتىن تىلەكتەس اۋلىنداعى مەكتەپتىڭ ابدەن كونەرىپ تۇرعانى تۋرالى ماسەلە كەيىنگى ەكى جىلدا بيىك مىنبەرلەردەن ءجيى ايتىلا باستاعان. عيمارات قامىستان سالىنعان, ەسىك-تەرەزەسىنەن, قابىرعا جارىقتارىنان جەل گۋلەپ, قىستا ءىشى سالقىنداپ كەتەدى. 2022 جىلى وعان مەملەكەتتىك تەحنيكالىق ساراپتاما تاعايىندالىپ, نىسانعا كۇردەلى جوندەۋ جۇرگىزۋ قاجەت دەگەن تۇجىرىم جاسالدى. ءسويتىپ, بيىل بيۋدجەتتەن 150 ملن تەڭگە قاراجات ءبولىنىپ, ونى جوندەۋگە كونكۋرس جاريالاندى. بالالارىنىڭ سۋىق ءارى توزعان عيماراتتا وقىپ جاتقانىنا قاشانعى توزە بەرسىن, جەرگىلىكتى اتا-انالار بۇل شەشىممەن كەلىسپەي باس كوتەردى. مەكتەپتىڭ قامىستان سالىنعانىن, ونى جوندەۋ ەمەس, ورنىنان سىرىپ تاستاپ, زامانعا ساي جاڭاسىن سالۋدى تالاپ ەتتى. ءتىپتى بولماعان سوڭ, جەرگىلىكتى بەلسەندى ازاماتتار مەن قوعامدىق ۇيىمداردىڭ قولعا الۋىمەن تاۋەلسىز ساراپتاما ۇيىمداستىرماق بولدى. ابىروي بولعاندا, وڭىرلىك ءبىلىم باسقارماسى اۋىل مەكتەبىنە قايتادان ساراپتاما جۇرگىزىپ, ناتيجەسىندە شىن مانىندە عيماراتتىڭ اپاتتىق جاعدايدا تۇرعانى بەلگىلى بولدى.
اققۋلى اۋدانىنىڭ بەلسەندى تۇرعىنى, كاسىپكەر رۋسلان مۋسين جەرگىلىكتى شەندىلەر جاڭا مەكتەپ سالۋعا اسىقپاي وتىرعانىن سىنعا الدى. ايتۋىنشا, ول سالىنعانعا دەيىن تىلەكتەس اۋلىنىڭ بالالارىن جاقىن جەردەگى قىزىلقوعام اۋلىنا تاسۋعا تۋرا كەلەدى. وتكەن جىلى وبلىستىڭ بىرنەشە اۋدانىندا قىسقا مەرزىمدە جاڭا مەكتەپتەر تۇرعىزىلدى. سونداي قاۋىرت تىرلىكپەن جۇمىس ىستەسە, كۇزگە دەيىن تىلەكتەستە جاڭا ءبىلىم ۇياسىن اشىپ تاستاۋعا ابدەن بولار ەدى دەپ ەسەپتەيدى ول.
تىلەكتەس ورتا مەكتەبىنىڭ ديرەكتورى اينۇر بەكباۋوۆانىڭ سوزىنشە, عيماراتتىڭ توبەسىنەن سۋ سورعالاپ, كەيبىر جەرلەرىندە توبەسى وتىرا باستاعان.
«قابىرعاسىنىڭ جارىلعان جەرلەرىن ۇنەمى تسەمەنتپەن بىتەپ, اعارتىپ وتىرامىز. بۇل مەكتەپتى كەزىندە ءوزىم دە اياقتاعانمىن. پەداگوگتەر مەن شارۋاشىلىق قىزمەتكەرلەرىنىڭ ارقاسىندا وسى ۋاقىتقا دەيىن مۇمكىندىگىنشە ۇستاپ كەلدىك. بالالار قالىپتى جاعدايدا وقۋى ءۇشىن عيماراتتارداعى كەيبىر كەمشىلىكتەردى جاسىرۋعا تۋرا كەلدى. بارلىق سانيتارلىق نورمالاردى ساقتاپ وتىردىق. الايدا مەكتەپتە سپورتزال مەن ءماجىلىس زالى جوق. سوندىقتان قىستىڭ كۇندەرى دەنەشىنىقتىرۋ ساباقتارىندا بالالار ارقالارىن جازىپ ويناي المايدى. مەكتەبىمىز مەملەكەتتىك تىلدە ءبىلىم بەرەدى. قازىرگى ۋاقىتتا 51 بالا ءبىلىم الىپ جاتسا, الداعى ۋاقىتتا اۋلىمىزعا ەلىمىزدىڭ وڭتۇستىگىنەن كوپتەگەن وتباسى كوشىپ كەلەدى دەگەن جوسپار تۇر. ياعني كەلەشەكتە وقۋشى سانى ۇلعايا تۇسەدى», دەيدى ول.
وڭىرلىك ءبىلىم باسقارماسىنىڭ باسشىسى سامال ايتقازينا اتالعان مەكتەپ قۇرىلىسى بويىنشا قازىرگى ۋاقىتتا جوبالىق-سمەتالىق قۇجاتتار ازىرلەنىپ جاتقانىن, الايدا مەكتەپتى كۇزگە دەيىن سالىپ ءبىتىرۋ ويعا سىيمايتىنىن مالىمدەدى.
«وسىدان 1,5 جىل بۇرىن ءبىزدىڭ باسقارمانىڭ تاپسىرىسىمەن تىلەكتەس اۋلى مەكتەبىنىڭ جاعدايىن ءبىلۋ ءۇشىن تەحنيكالىق ساراپتاما جۇرگىزىلدى. تاپ سول ۋاقىتتاعى ساراپتاما ناتيجەسى مەكتەپ عيماراتىن اپاتتىق جاعدايدا تۇرعان جوق دەپ كورسەتتى. ياعني ءبىز ونى اپاتتىق جاعدايدا تۇرعان ءبىلىم ۇيالارىنىڭ تىزىمىنە قوسقان جوقپىز. ەستەرىڭىزدە بولسا, بىلتىر وڭىرىمىزدە 3 مەكتەپتىڭ اپاتتىق جاعدايدا تۇرعانى انىقتالعان. وبلىس باسشىلىعىنىڭ شەشىمىمەن ولاردىڭ ورنىنا جاڭادان ءبىلىم عيماراتتارى تۇرعىزىلدى. اتاپ ايتقاندا, جەلەزين اۋدانىنداعى مويسەەۆكا, پاۆلودار اۋدانىنداعى سىچەۆكا, باياناۋىلداعى قاراجار مەكتەپتەرى. ەگەر وسىدان ءبىر جارىم جىل بۇرىن تىلەكتەستەگى وقۋ عيماراتىنىڭ اپاتتىق جاعدايدا تۇرعانى بەلگىلى بولسا, بىلتىر ول جەرگە دە جاڭا مەكتەپ سالىنعان بولار ەدى. ال تىلەكتەس مەكتەبىنىڭ اتا-انالارى بۇل ماسەلەنى جۋىقتا عانا كوتەردى. سوعان وراي ءبىز بيىلعى كوكتەمدە مەكتەپكە قايتادان تەحنيكالىق ساراپتاما جۇرگىزۋگە تاپسىرىس بەردىك. ونىڭ ناتيجەسىندە قامىستان سالىنعان نىساننىڭ شىن مانىندە اپاتتىق جاعدايدا تۇرعانى ءمالىم بولدى. ەندى ءبىز سوعان ساي ارەكەت جاساپ جاتىرمىز. ياعني مەكتەپتى اپاتتى دەپ تانىپ, ورنىنا جاڭا عيمارات تۇرعىزۋعا كىرىستىك. قۇرىلىس باسقارماسى قازىرگى ساتتە جوبالىق-سمەتالىق قۇجاتتاردى دايىنداتقىزۋ ۇستىندە. ول دايىن بولىسىمەن قۇرىلىسقا كىرىسەدى», دەپ جاۋاپ بەردى باسقارما باسشىسى.
جاڭا مەكتەپ 50 بالاعا شاقتالىپ سالىنادى. وندا 13 وقۋ كابينەتى, سپورت زالى, ەكى كيىم اۋىستىراتىن ورىن, 40 وقۋشىعا شاقتالعان اسحانا, تەحنولوگيا كابينەتى, ءماجىلىس زالى, 20 بالا تاربيەلەنەتىن شاعىن ورتالىق بولادى. سونداي-اق جوبادا شاعىن فۋتبول مەن باسكەتبول الاڭدارى, بالالارعا ارنالعان ويىن الاڭى قاراستىرىلعان. مەكتەپ سالىنىپ بىتكەنشە جاڭا وقۋ جىلى جەتى شاقىرىم جەردەگى قىزىلقوعام اۋلىندا ۇيىمداستىرىلادى. اۋدان بيلىگى قازىرگى ۋاقىتتا ءبىلىم باسقارماسىنا اۆتوبۋس ءبولۋ تۋرالى ءوتىنىم جىبەرگەن.
جاقىندا اققۋلى اۋدانىنا ارنايى بارعان پاۆلودار وبلىسىنىڭ اكىمى اسايىن بايحانوۆ 50 ورىندىق مەكتەپ سالۋ قارجىلىق تۇرعىدان تيىمدىرەك ەكەنىن جانە وقۋشىلار ەكى اۋىسىممەن ءبىلىم الا الاتىنىن جەتكىزدى.
«ۇلكەن مەكتەپتى ۇستاپ تۇرۋدىڭ شىعىنى كوپ بولادى. جىل سايىن ەلەكتر قۋاتى, جاعاتىن كومىرى بار. ءتىپتى ەدەن جۋدىڭ ءوزى شارشى مەترمەن ەسەپتەلەتىنى ءمالىم. مىسالى, 50 بالا وقيتىن 100 ورىندىق مەكتەپتىڭ كۇتىمىنە جىلىنا 100 ميلليون تەڭگە بولەتىن بولساق, 50 بالا وقيتىن ءبىلىم ۇياسىنا 50 ميلليون تەڭگە قاراستىرىلادى. سوندىقتان تۇپتەپ كەلگەندە بۇل جوبا ءتيىمدى», دەدى ءوڭىر باسشىسى.
ايتسە دە, تىلەكتەس اۋلىنىڭ تۇرعىندارى مەكتەپتى 100 ورىندىق ەتىپ سالىپ بەرۋدى سۇراپ وتىر. جاقىن ۋاقىتتا وڭتۇستىكتەن وتباسىلار كوشىپ كەلە باستايدى. سول كەزدە مەكتەپتى كەڭەيتۋ ماسەلەسى الدان شىعۋى مۇمكىن. قازىردىڭ وزىندە مۇندا 51 بالا بار, ال قىركۇيەكتە ءبىرىنشى سىنىپقا بەس بالا بارادى دەپ كۇتىلەدى. سوندىقتان كوپتىڭ بۇل بۇيىمتايى ابدەن زاڭدى دەپ ويلايمىز. قازىرگى ۋاقىتتا تىلەكتەس اۋلىندا 256 ادام تۇرىپ جاتىر.
پاۆلودار وبلىسى,
اققۋلى اۋدانى,
تىلەكتەس اۋلى
