كوللاجدى جاساعان – زاۋرەش سماعۇل, «ەQ»
وبلىستىق بالالار كلينيكالىق اۋرۋحاناسىنىڭ ەسكى عيماراتى كۇردەلى جوندەۋدەن ءوتىپ, «دارىگەرلەر ءۇيى» دەپ اتالىپ, جاڭا عيمارات جاس مەديتسينا ماماندارىنا باسپانا ەتىپ بەرىلدى. تۇرعىن ءۇي دارىگەرلەر اراسىندا 12 مەديتسينالىق ۇيىمعا ءبولىنىپ, ءدال وسى ۇيدەن 94 جاس مامان قىزمەتتىك پاتەر كىلتىن الدى.
جاڭا باسپانا يەلەرىنە ۇيلەردىڭ كىلتىن دەنساۋلىق ساقتاۋ ءمينيسترى اقمارال ءالنازاروۆا مەن وبلىس اكىمى ەرماعانبەت بولەكپاەۆ تابىستاپ, جاڭا قونىستارىنا قۇتتى بولسىن ايتتى.
– كاسىبي مەرەكە قارساڭىندا وسىنداي تاماشا سالتاناتقا جينالدىق. مەن كىلت تاپسىرۋعا ارنايى كەلدىم. بۇگىن ءبىز دەنساۋلىق ساقتاۋ قىزمەتكەرلەرىنە قانداي الەۋمەتتىك قولداۋ كورسەتەتىنىن كورىپ وتىرمىز. كوپ ماسەلەنىڭ شەشىمىن تابۋى وبلىس اكىمدەرىنە بايلانىستى. ءسىزدىڭ ايماقتارىڭىزدا دارىگەرلەرگە وسىنداي قولداۋ كورسەتىلەتىنى قۋانتادى. جاڭا پاتەرلەرگە باقىت ورناسىن! – دەدى ءوزىنىڭ قۇتتىقتاۋىندا مينيستر اقمارال ءالنازاروۆا.
سۋرەتتى تۇسىرگەن – جانگەلدى ابدىعالىم
سونىمەن قاتار مينيستر ايماقتا اتقارىلىپ جاتقان يگى باستامالارعا دا توقتالا ءوتىپ, وعان دا وڭ باعا بەردى. اسىرەسە اۋىل مەديتسيناسىن دامىتۋ ءۇشىن سالىنىپ جاتقان 155 نىسانعا. ەندى ءبىر-ەكى جىل ۋاقىت ىشىندە تولىق پايدالانۋعا بەرىلىپ قالادى.
وڭىردە مەديتسينا سالاسى قىزمەتكەرلەرىنىڭ جاعدايىن جاقسارتۋ ءارى كادر تاپشىلىعىن شەشۋ ماقساتىندا جۇزەگە اسىپ جاتقان باسپانامەن قامتۋ جۇمىسى ءارى قاراي دا جالعاسا بەرەدى. باسپانا ماسەلەسى شەشىلسە, كادر تاپشىلىعى دا جويىلادى. سول سەبەپتى, دارىگەرلەرگە جىل سوڭىنا دەيىن تاعى باسپانا بەرىلەدى.
– مەملەكەت باسشىسى قاسىم-جومارت توقاەۆ مەديتسينا سالاسىنىڭ قىزمەتكەرلەرىنە جاعداي جاساۋ كەرەكتىگى جونىندە باسا ايتقان ەدى. وسى رەتتە بيىل ءبىز 220 پاتەر بەرەمىز. دارىگەرلەردى تۇرعىن ۇيمەن قامتاماسىز ەتۋ جۇمىسى جالعاسادى. سىزدەرگە دەنساۋلىق جانە جاڭا باسپانادا تەك شاتتىق تىلەيمىز! – دەدى ايماق باسشىسى.
«دارىگەرلەر ۇيىندەگى» پاتەرلەردىڭ جارتىسى – بىربولمەلى, جارتىسى – ەكىبولمەلى. بارلىق ءۇي جوندەۋدەن وتكىزىلگەن. جيھازبەن, قاجەتتى تۇرمىستىق تەحنيكامەن قامتىلعان.
قىزمەتتىك پاتەرگە قول جەتكىزگەندەردىڭ ءبىرى – ۋميدا پازىلوۆا. ول – قالانىڭ پريشاحتينسك بولىگىندەگى №2 ەمحانانىڭ جالپى پراكتيكا دارىگەرى. قاراعاندىعا كەلىپ, جۇمىس ىستەپ جاتقانىنا ەكى جىل بولىپتى.
– وبلىس اكىمدىگىنە العىسىمىز شەكسىز. جولداسىممەن, ەكى بالاممەن ەكى بولمەلى پاتەر يەسى اتاندىق. كادر جەتىسپەۋشىلىگىنە بايلانىستى قاراعاندى وبلىسىنا تۇركىستان وبلىسىنان شاقىرتۋمەن كەلگەنبىز. جاڭا پاتەرگە كوشىپ, ەندى الاڭسىز ەڭبەك ەتەمىز, – دەيدى ۋميدا پازىلوۆا.
№3 كوپسالالى اۋرۋحانانىڭ انەستەزيولوگ-رەانيماتولوگى ونلاسىن توقاەۆ پەن «Jysan Med» ەمحاناسىنىڭ ونكولوگى جازيرا ناۋقانوۆا دا جاڭا باسپاناعا يە بولعاندارىنا قۋانىشتى.
– پاتەرلەر جايلى ءارى جارىق. 2023 جىلدىڭ قازانىندا وتباسىن قۇرىپ, پاتەر جالداپ تۇردىق. ءۇيلى بولساق دەگەن ارمانىمىز بار ەدى. ايتپەسە, ءۇي جالداپ تۇرۋ جاس ماماندار ءۇشىن قىمباتقا تۇسەدى. ەندى, مىنە, قۋانىشىمىزدا شەك جوق. الاڭسىز جۇمىس ىستەۋگە مۇمكىندىگىمىز بار. تاعى ءبىر ارتىقشىلىعى – قالا ورتالىعىندا ورنالاسقاندىعى. قالانىڭ كەز كەلگەن جەرىنە بارىپ-كەلۋگە ءتيىمدى. ارمانىمىزدى جۇزەگە اسىرعان مەملەكەتتىك ورگاندارعا راحمەت, – دەيدى و.توقاەۆ.
بۇعان دەيىن بۇقار جىراۋ اۋدانى دوسكەي اۋلىنداعى جوندەۋدەن وتكەن ۇيدە 40 مەديتسينا قىزمەتكەرى قىزمەتتىك تۇرعىن ۇيگە قول جەتكىزگەن ەدى. مۇنىمەن قوسا, بيىل اۋىلعا باراتىن مەديتسينالىق قىزمەتكەرلەر 8,5 ملن تەڭگەدەن الادى.
قاراعاندى وبلىسى
