سۋرەتتەردى تۇسىرگەن – قىرمىزى جۇماعاليقىزى
تەك تاۋىقتىڭ ءتوس ەتىنەن عانا ءونىم دايىندايتىن سەرىكتەستىك بۇگىنگى ازىق-ت ۇلىك جەلىسىندە تانىمال كوتلەت, شنيتسەل, ميتبول, ستريپ مەن ناگگەتس سياقتى تاماق تۇرلەرىن شىعارىپ وتىر. ال نەگىزگى شيكىزات – تاۋىق ەتى «ماكينسك قۇس فابريكاسىنان» كەلەدى.
«زاۋىتتىڭ اشىلعانىنا ءبىر اي بولدى. كۇنىنە ءارتۇرلى اتاۋمەن جانە ءتۇرلى كولەمدە دايىن ءونىم شىعادى. ءبىر ساعاتتا 400-600 كيلوعا دەيىن كوتلەت نەمەسە باسقا دا تاماق ءتۇرىن دايىنداۋىمىز مۇمكىن. ال ەسەپ بويىنشا زاۋىتتىڭ جىلدىق قۋاتتىلىعى – 3 346 توننا. وسى ۋاقىتقا دەيىن ءبىزدىڭ ونىمگە ۇقساس ءونىم كورشى ەلدەردەن تولىقتاي يمپورتتالىپ كەلدى. ەندى مۇنداي جارتىلاي فابريكاتتار شىعاراتىن كاسىپورىن وزىمىزدە بار دەپ تولىق سەنىممەن ايتا الامىن. ءبىز ءونىم ساپاسىنا كەپىلدىك بەرەتىن ەۋروپالىق تەحنولوگيالار مەن ستاندارتتاردى قولدانامىز», دەيدى زاۋىتتىڭ وپەراتسيالىق ىستەر جونىندەگى ديرەكتورى سانيا وماروۆا.
سانيانىڭ سوزىنشە, ءوندىرىس جەلىسى ەڭ زاماناۋي جانە جوعارى تەحنولوگيالىق اپپاراتتارمەن جابدىقتالعان. مۇنداعى ەڭ قاجەتتى – ەتتى تارتۋ, ارالاستىرۋ, ءپىسىرۋ قۇرالدارى گەرمانيادان, بەلگىلى «Alco-food-machines» كومپانياسىنان شىققان.
80-نەن استام ادام جۇمىس ىستەيدى. كوبى – جەرگىلىكتى تۇرعىن. جۇمىس ۋاقىتى تاڭعى 7-دە باستالىپ, تۇنگى 12-گە دەيىن جالعاسادى. ارينە, وسى ۋاقىت ارالىعىندا قىزمەتكەرلەردىڭ ەكى اۋىسىممەن جۇمىس ىستەيتىنىن اتاپ وتكەن ءجون.
«جۇمىستى «ماكينسك» قۇس فابريكاسىنان كەلگەن شيكى تاۋىق ەتىن قابىلداۋدان باستايمىز. ولاردى ارناۋلى مۇزداتىلعان كامەرالارعا ورنالاستىرامىز. ءار كامەرانىڭ كولەمى – 64 شارشى مەتر. مۇزداتۋ تەمپەراتۋراسى – 18 گرادۋس. كەي كامەرانىڭ تەمپەراتۋراسى شيكىزاتتى پايدالانۋ رەتىنە قاراي بولەك بولادى. سونداي-اق مۇندا ەتتى قۋىرۋعا ارنالعان سۇيىق ماي, تۇز, ۇن نەمەسە ءارتۇرلى دامدەۋىش ساقتايتىن بولمەلەر دە بار. ال كەسۋ بولمەسىندە ەتتى تارتۋ, ياعني فارش ستانوگىنا دايىندايدى. ودان سوڭ ءتۇرلى دامدەۋىشتەردى قوسا وتىرىپ, ارنايى ستانوكتا ارالاستىرىپ, بىتكەن سوڭ فورمالىق اپپاراتقا جىبەرەدى. سول جەردە اپپارات ەتتى كوتلەت نەمەسە شنيتسەل, ميتبول سياقتى ءتۇرلى ءونىم فورماسىنا سالىپ, ءتۇرلى قوسپا قوسۋ ارقىلى ءپىسىرۋ ۇدەرىستەرىن جۇرگىزەتىن پەشكە جىبەرىلەدى», دەيدى تاۋارلاردى ساپالىق باقىلاۋ ءبولىمىنىڭ باسشىسى تالعات تۇرسىنوۆ.
ايتۋىنشا, دايىن ءونىم شىعارۋدا ءوندىرىس جەلىسىندە نەگىزگى قىزمەتتى زاماناۋي پەش اتقارادى. ءارتۇرلى فورمادان شىققان تاۋىق ەتى الدىمەن 185-190 گرادۋستا 30 سەكۋندتىق قۋىرىلۋ كەزەڭىنەن وتەدى. ول كەزدە ەت تولىق ءپىسىپ ۇلگەرمەيدى, سىرتقى قاباتى عانا قىتىرلاق كۇيدە قالادى. ودان سوڭ پەشكە بارىپ, وندا 165 گرادۋستا 7 مينۋت اينالدىرا پىسىرىلەدى. ال پەشتەن شىققان ءونىم -40 گرادۋستىق مۇزداتقىشقا جىبەرىلىپ, جىلدام سالقىنداتۋ ۇدەرىسىنە تۇسەدى.
«مۇزداتىلعان ءونىمدى ارنايى قاپتامادا وراپ, ءتۇرلى سالماقتا دايىندايمىز. مىسالى, 600 گرامنان باستاپ 2 كيلوعا دەيىن ءارتۇرلى تاۋىق ەتىنىڭ دايىن ءونىمى بولۋى مۇمكىن. ول قاپتامالار تاۋارلىق بەلگىسى بار 12 كيلولىق قاعاز قوراپتارعا سالىنىپ, قويماعا جىبەرىلەدى. سوندا تارازىدا ولشەنىپ, كۇندەلىكتى ءونىم سالماعى دا انىقتالىپ وتىرادى. جالپى, كومپانيا شيكىزاتتان باستاپ ءونىمدى قاپتاۋعا دەيىنگى بارلىق كەزەڭدە ەڭ جوعارى ساپاعا كەپىلدىك بەرەدى. بىزدە دايىندالعان دايىن فابريكاتتاردىڭ جارامدىلىق مەرزىمى – 90 كۇن», دەيدى تالعات.
بايقاعانىمىزداي, تسەح ىشىنە بارلىق جۇمىسشى باسىنان اياعىنا دەيىن تۇگەل زالالسىزداندىرىلىپ, شاش نەمەسە باسقا دا زاتتار ونىمگە تۇسپەۋ ءۇشىن ارنايى كيىممەن عانا كىرگىزىلەدى. ەگەر ول ءتارتىپ ساقتالماعان جاعدايدا اۆتوماتتى تۇردە كىرە بەرىستەن «جاسىل» بەلگىسى قوسىلمايدى, ونداي جاعدايدا ول قىزمەتكەرگە تسەح ىشىنە بارۋعا رۇقسات بەرىلمەيدى.
كاسىپورىن الداعى ۋاقىتتا ءوزىنىڭ وندىرىستىك قۋاتىن جىلىنا 10-12 مىڭ تونناعا دەيىن ۇلعايتۋدى جوسپارلاپ وتىر. جوبا ىسكە اسسا, قىزمەتكەر سانى 150-گە دەيىن كوبەيەدى. سونداي-اق كورشىلەس ەلدەرگە ءونىمدى ەكسپورتتاۋ جونىندە قۇجاتتار دا ازىرلەنىپ جاتقان كورىنەدى.
