ات سپورتىنىڭ وبلىستا ءداستۇرلى تۇردە وتەتىن بيىلعى ۇلتتىق ويىندارى تاسقىننىڭ كەسىرىنەن جىلداعىدان كەشتەۋ بولىپ وتىر. بىراق «ەشتەن كەش جاقسى» دەمەكشى, ءاتۇستى ويىندارىن جاقسى كورەتىن حالىق جارىس بولعان كۇنى يپپودرومعا بالا-شاعاسىمەن بىرگە كوپ جينالدى. بۇل كۇنى جورعا جارىس, جەلىستەن جارىس, الامان بايگەلەرمەن قاتار «قىز قۋ», «تەڭگە الۋ» سياقتى ۇلتتىق ات سپورتى ويىندارى دا كورسەتىلدى.
قىز-جىگىتتىڭ قانىن قىزدىرعان «قىز قۋعا» جاستار قازاقتىڭ ۇلتتىق كيىمدەرىمەن شىقتى. بارلىق جۇپتاردا دا جىگىتتەر دە, قىزدار دا دىتتەگەنىنە جەتىپ, حالىقتى ءماز قىلدى. قۇمار ەتكەن قىزدىڭ ۇلبىرەگەن القىزىل بەتىنەن ءسۇيىپ, جازاسىن ارقاسىمەن كوتەرگەن جىگىتتىڭ دە قۋانىشى ءبىر بولەك...
جەتى مىڭ مەترلىك جورعا جارىسىندا اعايىندى ارتەم مەن ەۆگەني چيبيسوۆتەر ءبىرىنشى, ەكىنشى ورىندى ولجالادى. ولاردىڭ اسىل تۇقىمدى «اكۆامارين» مەن «پروگنوز» اتتى سايگ ۇلىكتەرىنە قۇيرىق تىستەسە وتىرىپ, ءۇشىنشى بولىپ مارەگە ءاليا توقتاسىنوۆا ءوزىنىڭ «فيالكا» اتتى جۇيرىگىمەن جەتتى. جارىس بارىسىندا ونىڭ جۇيرىگى ەكى جىگىتتەن كەيدە وزىپ وتىرعانىمەن مارەگە تاجىريبەسى مولداۋ جىگىتتەر الدا كەلدى.
جەلگىرلەردىڭ جەلدەي ەسكەن جەلىسىندە اۋەز, ابدىكارىم, ءابدى- ءۋالي نۇراحمەتوۆتەردىڭ جۇيرىكتەرى باسقالاردى شاڭ قاپتىرىپ كەتتى. ميحايل سكوپتسەۆ پەن ۆاسيلي تكاچۋكتىڭ جەلگىرلەرى كوپ ارتتا قالدى.
جارىستىڭ ەڭ ۇلكەنى دە, شوقتىعى بيىگى دە الامان عوي. كوپشىلىك سونى توسىپ, دەگبىرسىزدەنىپ تۇردى. سونىمەن 13 شاقىرىمعا سوزىلعان الامان دا باستالدى. قيقۋ مەن ايعايدىڭ كوكەسى ەندى بولدى. جاندارىنان زۋلاعان جۇيرىكتەر وتكەندە دەلەبەسى قوزباعان ادام جوق شىعار. جۇيرىكتەردىڭ ءبارى دە ويقاستاتىپ, كوسىلە شاۋىپ بارادى, بىرىنەن-ءبىرى وتەدى. بىراق جۇزدەن جۇيرىك, مىڭنان تۇلپار عانا وزادى ەمەس پە, اقىرىندا ءسالىم ءابىلمانسۇردىڭ «قاراگەرى» مارە سىزىعىن ءبىرىنشى بولىپ بۇزدى. مارەدەن ەكىنشى بولىپ «فاۆوريت» دەگەن جۇيرىگىمەن رىمحان نۇرتىلەۋ ءوتتى. ءۇشىنشى ورىندى بيجۇما تىلەكبەرگەن الدى. ءسويتىپ, قىزىلجارلىقتاردىڭ قانىن ءبىر قىزدىرىپ, رۋحىن ءبىر كوتەرىپ قىزىقتى دا, قىلىقتى دا ۇلتتىق ات ويىندارى دا ءوز مارەسىنە جەتتى.
سولتۇستىك قازاقستان وبلىسى
