قازىرگى تاڭدا اتالعان مەكتەپ قابىرعاسىندا 1-11 سىنىپتار بويىنشا 604 وقۋشىعا 86 پەداگوگ ءبىلىم بەرەدى. 3 مۇعالىم ماگيستر, 77 مۇعالىم جوعارى ءبىلىمدى, 6 مۇعالىم-ارناۋلى ورتا ءبىلىمدى دەسەك, ونىڭ ىشىندە 23 مۇعالىم پەداگوگ-زەرتتەۋشى, 18 وقىتۋشى پەداگوگ-ساراپشى, پەداگوگ-مودەراتور ساناتىندا 19 مۇعالىم بار.
– مەكتەبىمىزدىڭ رەسپۋبليكا بويىنشا «ۇزدىك اۋىل مەكتەبى» قاتارىنا قوسىلۋى ءبىز ءۇشىن ۇلكەن جەتىستىك جانە وتە قۋانىشتى جاڭالىق. مەكتەبىمىزدىڭ تاريحىندا العاشقى رەت وسىنداي جەتىستىككە قول جەتكىزدىك. وقۋشىعا ساپالى ءبىلىم مەن سانالى تاربيە بەرۋ ءىسىن جاڭا تالاپ تۇرعىسىنان وڭتايلاندىرىپ, ءارى قاراي جۇمىس ىستەي بەرەمىز. شاكىرت جەتىستىگى – ۇستاز مەرەيى. بۇل جەتىستىك بىزگە شابىت سىيلادى. ءارى قاراي ەڭبەك ەتۋگە جىگەرلەندىردى. مەكتەبىمىزدە ءالى دە تالاي دارىندى وقۋشىلارىمىز بار. سولارعا زور ءۇمىت ارتامىز, – دەگەن م.اتىموۆ اتىنداعى №6 جالپى ءبىلىم بەرەتىن مەكتەپ ديرەكتورى ءايتبيبى ۇلىقمانوۆا مەكتەپتىڭ ايتارلىقتاي جەتىستىككە جەتۋىنە بىردەن-ءبىر سەبەپشى بولىپ وتىرعان ۇستاز دەپ ارىپتەسى الماجان قۇراشوۆا وتەسبايقىزىنا العىسىن جەتكىزدى.
م.اتىموۆ اتىنداعى ورتا مەكتەپ وقۋشىلارىنىڭ سايىستان جۇلدەسىز ورالۋى سيرەك. بىرقاتارىنا توقتالساق, اۋىل بالالارىنا ارنالعان «اۋىل وليمپياداسىنىڭ» وبلىستىق كەزەڭىندە ورىس ءتىلى ءپانى بويىنشا 10-سىنىپ وقۋشىسى جانبوتا ماقسات 3-ورىن الىپ, قولا مەدال يەگەرى اتانعان. ال قازاق ءتىلى ءپانى بويىنشا 10-سىنىپ وقۋشىسى ديدار بيعالي 3-ورىن, قولا مەدال يەگەرى, فيزيكا پانىنەن 9-سىنىپ وقۋشىسى نازيپا جولداس 4-ورىن ديپلومىمەن ماراپاتتالعان. سونداي-اق 2023-2024 وقۋ جىلى بويىنشا اۋىل بالالارىنا ارنالعان «اۋىل وليمپياداسىنىڭ» رەسپۋبليكالىق كەزەڭى بويىنشا قازاق ءتىلى پانىنەن 1-ورىندى «التىن القا» يەگەرى نۇرساۋلە ءجۇسىپ يەلەنىپ, حالەل دوسمۇحامەد ۇلى اتىنداعى پەداگوگيكالىق ۋنيۆەرسيتەتىنىڭ گرانتىن ۇتىپ الدى. وسىلايشا, مەكتەپتىڭ ماقتانىشى بولعان نۇرساۋلە بيىل ۇلتتىق بىرىڭعاي تەستىلەۋدەن 137 بالل جيناپ, وبلىس ماقتانىشىنا اينالدى.
تەرەڭ ءبىلىم بەرۋدى باستى ماقسات ەتكەن م.اتىموۆ اتىنداعى ورتا مەكتەپتەن ەل بولاشاعىنا ءبىلىمدى, بىلىكتى جاستار دايىندالا بەرەدى دەپ سەنەمىز.
ماڭعىستاۋ وبلىسى
